¹ Gu nyima ya ilumbu itatu, gwa saleye khinji imoshi ya makwela gu kanana gu Galileya Gina Yesu wa khalele gwene. ² Yesu nu alongogi enji a tamegeye gu khinji yene ya makwela. ³ Tangwa vinu dia hwile, Gina Yesu wa mu lezele egi: " Ashi nji nu vino go." ⁴ Yesu wa mu vutudile egi : " Mukwetu, keti ndaga yiyi idi mu ngu talela? Tangwa diami khanji di kuwa go." ⁵ Ginenji wa lezele athu a gisalo egi: " ndaga ikima a mbo mi leza i kitenu." ⁶ Gwa khalele hene mabungu a maseso a sambano a meya bayuda a khalele mu salela mukunda nu shigo jiawo jia gudi wova, konso dibungu dia khalele mu ngila giteso gia ba litre khama nga ndo khama jiyadi. ⁷ Yesu wa a lezele egi: " Zalesenu mabungu nu meya. ⁸ Gu nyima Yesu wa lezele athu a gisalo egi: " Zulenu meya ene lulu ngagi a batenu gwa muthu yonu udi mu twalesa khinji." A kitile nganyi. ⁹ Muthu wa khalele mu twalesa khinji wa phagele meya a balumugile vino, uvi gwa jiyile go gwi dia katuga (Uvi athu wanyi a gisalo a zangudile meya ene a jiyile gwi a katugile). Hene wa tamegele muthu wa khalele mu kwela wa mu lezele egi: ¹⁰ " Muthu mu kima wa nu hana ha thomo matombe a bonga, gu nyima wa nu bata wanyi a bola tangwa athu akima a lauga. Uvi eye wa swegi matombe a bonga ti nu lulu ngagi." ¹¹ Gidimbu gia khumbwa gia gu kanana gu Galileya gia khalele gia thomo Yesu a kitile, ha gu monesa khembo yenji, hene alongogi enji a kwikile gwa Mwene. ¹² Gu nyima ya ndaga yene wa yile gu Kapernaum, Mwene, Ginenji, aphangienji nu alongogi enji, a kitile go gwene ilumbu ya vula. ¹³ Khinji ya pake ya bayuda ya phusanele Yesu wa yile gu Yelusalemi. ¹⁴ Wa sangele mu katshi dia inzo ya isambu athu a khalele mu diga ngombe, mameme nu phijio. Athu a nu sombegesa falanga a khalele nji hene. ¹⁵ Hene wa londele fimbu ya shinga. Wa a kayele akima gawo nu gu a zola honze ya inzo ya isambu nu mameme nu ngombe. Wa phanzele falanga jia athu a nu sombegesa falanga, wa bishidile mesa awo. ¹⁶ Wa lezele athu wanyi a khalele mu diga phijio egi: " Katulenu ima yiyi gwa leha nu haha. Bembenu gu kitula inzo ya Shami hama henu ha gu diga ima. ¹⁷ Alongogi enji a yibugile ndaga jia sonegeye gu mukanda egi: " Gikhesa gia inzo yaye mba gidi mu lema mu katshi diami ole tshiya." ¹⁸ Hene mafumu a bayuda a mu lezele egi: " Gidimbu khi wa jiya gu tu leza egi udi nu giyega gia gu kita ndaga jiji?" ¹⁹ Yesu wa a vutudile egi: " Phanzenu inzo Nzambi yiyi gu nyima dia ilumbu itatu ngu i zugise." ²⁰ Mafumu a bayuda a zwelele egi: " Gwa balegele mvula makumi a wana nu sambano ha gu tunga inzo yiyi ya isambu, eye wa mbo i zugisa mu ilumbu itatu?" ²¹ Uvi, wa zwelele nganyi mukunda nu inzo ya mwila wenji. ²² Gu nyima ya gu zuga gwenji gu lufwa, alongogi a yibugile egi wa a lezele ndaga jiji hene a kwikile gu ndaga jia sonegeye nu gu ndaga jia zwelele Yesu. ²³ Tangwa Yesu a khalele gu Yelusalemi gu khinji ya pake, mu tangwa dia khinji, athu a vula a kwikile mu jina dienji, ha gu mona idimbu ya khumbwa a khalele mu kita. ²⁴ Ata nganyi, Yesu gwa tshiginile go gu a hagela mutshima mukunda wa khalele mu a jiya akima, ²⁵ enji mukunda gwa khalele go nu funu athu a te gi themwe gia muthu muko, mukunda wa jiyile ndaga jia khalele mu katshi diawo.