¹ Ha guyandiga gwa khalele ndinga, ndinga yene ya khalele nu Nzambi, ndinga yene ya khalele Nzambi. ² Ndinga yene ya khalele nu Nzambi ha luyandigu. ³ Ima ikima ya saleye gwa Mwene, gushi go ata nu gima gimoshi gia khala gidi gia saleye go konda ndinga yene. ⁴ Gwa mwene gwa khalele monyo enji monyo yene wa khalele mwanya wa khalele mu lema mu katshi dia athu. ⁵ Mwanya udi mu lema mu phipha enji phipha ya khalele go. ⁶ Gwa khalele nu muthu mu moshi wa tumiye gwa Nzambi, jina dienji Yowani. ⁷ We jile ole themwe, ha gu ta gi themwe gia mwanya, mukunda athu akima a kwikile gwa mwene. ⁸ Yowani gwa khalele go mwanya, uvi we jile mukunda nu gu ta gi themwe gia mwanya. ⁹ Ya khalele mwanya wa kielega wa nu hana semo gwa athu, mu phila ikima we jile haha ha mavu. ¹⁰ Wa khalele wa haha ha mavu, mavu ene a salamele mu njila yenji, uvi athu a ha mavu a mu jiyile go. ¹¹ We jile gwa athu a dimbo dienji uvi athu a dimbo dienji a mu tshiginile go. ¹² Uvi gwa wanyi akima a mu yambele, wanyi a kwikile mu jina dienji, wa a hwile giyega gia gu kituga ana a Nzambi, ¹³ wanyi a butugile go mu menga nu mu musunyi, to mu lozolo lwa muthu uvi mu lozolo lwa Nzambi. ¹⁴ Ebuna ndinga ya kitugile musunyi, we jile mu jinga mu katshi dietu. Ta monele khembo yenji, khembo ya fwanana nu mona mu moshi wa katugile gwa Tata, mona yonu wa khalele wa zala nu ima ya bonga nu masonga. ¹⁵ Yowani wa tele gi themwe gienji tangwa a zwelele mu ndinga ya ngolo egi: " Yogu muthu nga zwelele mukunda nu mwene egi: " Muthu yonu udi muza gu nyima diami wa balegele gu twama diami; mukunda wa jingile gu twama diami". ¹⁶ Mukunda nu gu koma gwa mutshima wenji wa bonga ta zudile lusagumunu holu dia lusagumunu. ¹⁷ Mukunda shigo ya haneye mu njila ya Moyize, uvi gutshigina nu masonga ejile mu njila ya Yesu Kilisto. ¹⁸ Gushi go ata muthu wa monele Nzambi mu tangwa dikima. Kaka muthu mu moshi, Nzambi mwene ha khenji yonu wa butugile gwa Tata, mwene wa nu tu jiyishile nenji. ¹⁹ Tala gimbangi gia Yowani tangwa ba yuda a tumile katuga gu Yelusalemi nganga-nzambi nu enya gikanda gia ba levi ha guza mu mu hula egi: " Udi wa nanyi?" ²⁰ Mwene wa vutudile mu malembe nu gu konda gu tuna wa hanele mvutu egi: " Ngu shi gami nga Kilisto go." ²¹ Hene a mu hudile egi: " Udi wa nanyi? Wa Eliya?" Wa zwelele egi: " Ngu shi gami nga Eliya go." A mu hudile egi: " Udi wa profeta?" Wa vutudile egi: " Ndo." ²² Gu nyima, a mu hudile egi: " Udi wa nanyi " mukunda tu vutuge ha gu hana mvutu gwa wanyi a tu tumile. Ikhi udi muzwela mukunda nu eye ha khaye?" ²³ Wa vutudile egi: " Eme nga dizwi dia muthu yonu udi mu kabuga mu katshi dia temu dia zala fufuta egi: " Londenu mwa bonga njila ya Fumu mu phila profeta Yezaya a zwelele ". ²⁴ Gwa khalele hene athu a tumiye gwa afalisaye. A mu hudile egi: ²⁵ " Mukunda nu ikhi udi mu botiga athu mukunda ushi gaye wa Kilisto go, nga wa Eliya go, nga wa profeta go?" ²⁶ Yowani wa a vutudile egi: " Eme ngu mu botiga nu meya. Mu katshi dienu gudi nu muthu mu moshi yonu mushi mu jiya go. ²⁷ Muthu mwene udi yonu udi muza gu nyima diami. Ngu shi nu giyega go gia gu mu jitulula shinga jia saphatu jenji." ²⁸ Ndaga jiji jia balegele gu Betania ha sambwa dia yolodani, gunu Yowani a khalele mu botiga athu. ²⁹ Mu gilumbu gia hatele, Yowani wa monele Yesu khalele muza gwa mwene wa zwelele egi: " Talenu, muna dimeme dia Nzambi dia nu katula gubola gwa hoshia mavu. ³⁰ Yogu muthu yonu nga zwelele mukunda nu mwene egi yonu udi muza gu nyima diami udi wa ngu balega; mukunda wa jingile gu twama diami. ³¹ Nga mu jiyile gami go uvi mukunda mwene a jiyiye gu Izrayele nge jile mu botiga nu meya." ³² Yowani wa tele gi themwe egi: " Nga monele Pheve ya fwanana nu yembe mu katuga gosa muza mu bulumuga enji mu magana holu dienji. ³³ Nga mu jiyile gami go uvi yonu wa ngu tumile ha gu botiga athu mu meya wa ngu lezele egi: " Yonu mu kima mba u mona pheve muza mu bulumuga nu gu magana holu dienji, mwene mba u botiga nu Pheve Santu". ³⁴ Nga monele, nga tele gi themwe egi udi Muna Nzambi." ³⁵ Mu gilumbu gia hatele, tangwa Yowani a maganele nu alongogi muyadi, ³⁶ a monele Yesu wa khalele mu balega, Yowani wa zwelele egi: " Talenu, Muna dimeme dia Nzambi!" ³⁷ Alongogi wanyi muyadi a vile phila Yowani a zwelele, hene a hatele Yesu. ³⁸ Tangwa Yesu a balumugile gu nyima wa monele a muza mu mu hata, wa a hudile egi: " Ikhi mudi mu tshigina?" ³⁹ A mu vutudile egi, " Rabbi( disongidila Longi ), gwi wa nu jinga?" Mwene wa vutudile egi: " Gizenu mu mone." Gu nyima ejile a monele hama a khalele mu jinga. A begele nenji gilumbu giene, mukunda ya khalele mu tangwa dia kumi. ⁴⁰ Mu moshi mu katshi dia wanyi wa vile Yowani mu zwela enji wa mu hatele ya khalele Andre phangia Simoni phetelo. ⁴¹ Mwene wa monele mu mbala ya thomo phangienji Simoni hene a mu lezele egi: " Ta mona Mesiya ( disongidila Kilisto). ⁴² Wa batele phangienji gwa Yesu. Tangwa Yesu a mu talele wa zwelele egi: " Eye Simoni,Muna Yowani. U mu ka mu tamegeya egi Sefasi (disongidila seso). ⁴³ Mu gilumbu gia hatele, tangwa Yesu a tshiginile gu katuga ha guya gu Galileya, wa taganele nu Filipo wa mu lezele egi '' Ngu hate". ⁴⁴ Filipo wa khalele ,mwenya gu Betesayida, dimbo dia Andre nu Phetelo. ⁴⁵ Filipo wa taganele nu Natanayele wa mu lezele egi: " Muthu yonu Moyize a sonegele mu mukanda wa shigo, nu ba profeta a zwelele ta mu mona, Yesu Muna Yozefi, mwenya gu Nazareti. ⁴⁶ Natanayele wa mu lezele egi: " Keti gima gia bonga gia jiya gu katuga gu Nazareti?" Filipho wa mu lezele egi: " Giza u tale." ⁴⁷ Tangwa Yesu a mu monele muza gwa mwene wa mu lezele egi: " Tala mwenya gu Isalele wa kielega yonu gwa shi go nu mambo ata gabiyo:" ⁴⁸ Natanayele wa mu hudile egi: " Phila khi wa ngu jiya?" Yesu wa mu vutudile egi: " Gu twama Filipho a gu tamege, tangwa wa khala ha mu shina wa mutshi wa fige, nga gu monyi." ⁴⁹ Natanayele wa zwelele egi " Longi udi wa Muna Nzambi! Udi wa Fumu wa gu Isalele!" ⁵⁰ Yesu wa vutudile egi: " mukunda nga gu leza egi nga gu monyi ha mu shina wa mutshi wa fige hene wa kwikila? Mba udi mu mona ndaga jia gu balega gu koma." ⁵¹ Wa zwelele nji egi: " Mu masonga, masonga ngu mu gu leza egi, mba udi mu mona gosa gwa kanguga ba wanjio a Nzambi mu kanduga nu gu bulumugila Muna Muthu."