¹ Nga mi leza ndaga jiji ha gula gu bwa ndo. ² Mba adi gu mi kaya mu jinzo jiawo jia isambu; mukunda mu tangwa didi muza konso muthu mba u mi shiya mba udi mu indula egi udi mu kitila Nzambi gima gia bonga. ³ Mba a mu kita ndaga jiji mukunda a jiyile go nga Tata nga eme. ⁴ Nga mi lezele ndaga jiji mukunda mu tangwa mba dila dia kuwa mukunda ndaga jiji ji salame, mba mu yibuge enwe ha khenu mu phila nga mi lezele. Nga mi lezele go ndaga jiene gu twama mukunda nga khalele mu katshi dienu. ⁵ Nga vutuga gwa muthu yonu wa ngu tumile; uvi gushi go ata muthu mu moshi mu katshi dienu udi mu ngu hula egi: " Gwi udi muya?" ⁶ Mukunda nga mi lezele ndaga jiji, uvi mitshima yenu idi ya zala nu gikenene. ⁷ Ata nganyi, ngu mu mi leza mu masonga egi: " idi ya bonga gwa enwe ngu vutuge gami; mukunda gula nga yile gami go, muthu wa gu mi katula khenda mba gweji go gwa enwe;uvi gula nga vutuga, mba ngu mu mi tumila nenji. ⁸ Tangwa mba eza, muthu mwene wa nu katula athu khenda mba udi mu mi leza Gifu gia ha mavu mu ndaga idi mu talela masumu, nu ndaga idi mu talela gununga nu gu sambesa _ ⁹ mu ndaga idi mu talela masumu, mukunda ashi mu ngu kwikila go; ¹⁰ mu ndaga idi mu talela gu nunga mukunda ngu mu vutuga gwa Tata enji mba mushi mu ngu mona nji go; ¹¹ mu ndaga idi mu talela gu sambesa, mukunda muna fumu wa haha ha mavu wa sambeseye gale. ¹² Ngudi nu ndaga jia vula jia gu mi leza, uvi mba mu bagisa go ndaga jiene lulu ngagi. ¹³ Hene, tangwa Mwene, Pheve ya kielega mba eza mu vutuga, mba udi mu mi twalesa mu masonga; mukunda mba udi mu zwelela kaka ndaga idi mu katuga gwa mwene ha khenji; uvi ndaga jikima adi mu vwa, mba udi mu ji zwelela, mba udi mu zwelela ndaga jinyi mba jiza. ¹⁴ Mba udi mu ngu hwa lukumu, mukunda mba udi mu zula ndaga jidi mu ngu talela ha gu mi leza najio. ¹⁵ Ima ikima ya Tata idi yami; hene ngu mu zwela egi Pheve mba idi mu zula ndaga jiami ha gu mi leza najio. ¹⁶ Mu tangwa gabiyo, enwe mba mu ngu monyi nji go, gu nyima dia tangwa gabiyo nji, mba mudi mu ngu mona." ¹⁷ Alongogi ako adi zwelele ene nu ene egi: " Ndaga jia phila khi adi mu tu leza egi:" Mu ga tangwa gabiyo mba mushi mu ngu mona go; mu ga tangwa gako nji mba mudi mu ngu mona, " mukunda ngu mu vutuga gwa Tata?" ¹⁸ Adi zwelele egi: ndaga khi adi mu zwelela egi:" mu ga tangwa gabiyo?" Tu shi getu mu jiya go ndaga khi adi mu zwelela." ¹⁹ Yesu wa jiyile egi adi nu funu ya gu mu hula miehu wa a lezele egi: " mu mudi hula mu ndaga nga katuga gu zwela egi: " Mu ga tangwa gabiyo mba mushi mu ngu mona go, gu nyima dia ga tangwa gako, mba mudi mu ngu mona?" ²⁰ Mu masonga masonga, ngu mu mi leza egi, mba mudi mu dila nu gudi hwa phashi, uvi athu a ha mavu mba a khala mu kiese; enwe mu katshi dia khenda, uvi khenda jienu mba jidi mu kituga kiese. ²¹ Mukwetu wa nu nu khala mu khenda gula tangwa dienji dia gu buta dia kuya mukunda nu guvwa phashi. Uvi gula wa buta mona, gwa nu yindula nji go phashi jienji mukunda nu kiese gia guza gwa mona haha ha mavu. ²² Enwe nji, mudi mu khenda mu tangwa didi, uvi mba ngu mu mi mona nji; enji mutshima wenu mba udi mu khala mu kiese, gushi go ata muthu mba u mi katula kiese giene. ²³ Mu gilumbu giene, mba mushi mu nu hula go ata mwehu. Mu masonga masonga, ngu mu mi leza egi, gima gikima mba mu lomba gwa Tata mu jina diami, mba udi gu mi hwa nagio. ²⁴ Ti nu tangwa didi khanji mu lomba go ata gima mu jina diami; lombenu, enji mba mudi mu hwiya mukunda kiese gienu gi khala gia kuwa. ²⁵ Nga mi lezele ndaga jiji mu phila egi mu konde gu bagisa, uvi mu tangwa didi muza ngu mu khala gu mi leza ndaga mu phila egi mu bagise uvi ngu mu mi leza jia Tata ha phelo. ²⁶ Mu gilumbu giene, mba mudi mu lomba mu jina diami ngu shi gu mi leza go egi ngu muya mu bondila Shami mukunda nu enwe; ²⁷ mukunda Tata Mwene ha khenji wa mi tshigina mukunda mwa ngu tshiginile enji mukunda mwa kwikile egi nga katugile gwa Tata. ²⁸ Nga katuga gwa Tata, nge jile haha ha mavu, ngu mu zwela nji mbala iko egi ngudi mu katshi dia gu katuga haha ha mavu ha gu vutuga gwa Tata." ²⁹ Alongogi enji a zwelele egi: " Tala lulu ngagi udi mu zwela ha phelo; ushi nji go mu zwela mu gu tungagana go. ³⁰ Lulu ngagi ta jiya egi wa jiya ndaga jikima, enji ushi gaye go nu funu muthu mu moshi a gu hule muhwu. Mukunda nu nganyi, ta kwikila egi wa katugile gwa Nzambi." ³¹ Yesu wa a vutudile egi: " Mwa kwikila gia lulu ngagi?" ³² Talenu, tangwa di muza, eya, diene dieza sha, mba mudi mu phanzeya, muthu nu muthu gu inzo yenji, mba mudi mu ngu bemba ha khami. Uvi eme ngu shi ha khami go Tata udi nu eme. ³³ Nga mi lezele ndaga jiji mukunda mu zule ngemba mu katshi diami. Haha hoshia mavu mba mudi mu balega mu katshi dia phashi, uvi zulenu gikhesa; nga nungi mavu wawa."