¹ Nga mutshi wa bonga wa Vino Tata wami udi muthu wa nu sala mu gilanga. ² Wa nu khesa thango jikima jia nu buta go mabundu enji gu londa thango jinyi jia nu buta mabundu, mukunda thango jiene ji bute mabundu a vula. ³ Mudi mwa gudi londa mwa bonga mukunda nu malongi nga mi longele egi. ⁴ Khalenu mu jinga mu katshi diami eme mu katshi dienu. mu phila luthango lwa jiyille go gu buta lwene ha khawo gula lu shi go lwa kangama nu mutshi wa vinu, nganyi mwa jiyile go gu buta mabundu gula mushi mwa kangama go nu eme. ⁵ Nga mutshi wa vinu, enwe mwa thango. Yonu udi mu katshi diami eme mu katshi dienji, wa nu buta mabundu a vula, mukunda gula ngu shi go mwa jiyile go gu kita ata gima. ⁶ Gula muthu gwa shi go mu jinga mu katshi diami, mba u bishidiya mu phila luthango lwa wuma lwa nu bishidiya; gu nyima athu a nu nona thango jiene ha gu ji mba ha tshiya mukunda ji shidile ⁷ . Gula mudi mu jinga mu katshi diami enji malongi ami adi mu katshi dienu, mwa jiya gulomba ima ikima mwa tshigina mba mudi mu izula. ⁸ Lukumu lwa Tata ludi mudi monesa mu phila mudi mu buta mabundu a vula enji idi mu leza egi mudi mwa alongogi ami. ⁹ Mu phila Tata a ngu tshigina, n'eme nga nu mi tshigina; enwe khalenu mu jinga mu katshi dia gu tshigina gwami. ¹⁰ Gula mudi mu hata shigo jiami, mba mudi mu jinga mu katshi dia gu tshigina gwami mu phila eme nga nu hata shigo jia Shami nu gu jinga mu katshi dia gu tshigina gwenji. ¹¹ Nga mi lezele ndaga jiene mukunda kiese giami gi khala mu katshi dienu enji kiese gienu gi khale gia lunga. ¹² Shigo yami idi, di tshiginenu mu phila nga mi tshiginile. ¹³ Gu tshigina gwa kielega gudi gwa gu hana monyo gwa ma futa aye ¹⁴ Mudi mwa ma futa ami gula mudi mu kita ndaga jinyi nga mi lezele. Mba ngu mi tamega nji go egi athu a gisalo, mukunda muthu wa gisalo gwa nu jiya go ndaga jia nu kita fumu wenji. ¹⁵ Nga nu mi tamega egi mwa ma futa ami, mukunda nga mi lezele ndaga jikima nga vile gwa Shami. ¹⁶ Ishi go enwe mwa ngu phonele, uvi eme nga mi phonele nu gu mi tamega mukunda mu bute mabundu, enji mabundu enu a jinge mwa vula. Nganyi gima gikima mba mu lomba mu jina diami, Tata mba udi mu mi hwa nagio. ¹⁷ Nga mi leza ha gu kita ndaga jiji mukunda mu khale mudi tshigina enwe nu enwe. ¹⁸ Gula mavu adi gu mi tuna mu feti jiya egi a ngu tunyile gu twama dia gu mi tuna. ¹⁹ Gula nga mwa khalele athu a ha mavu, nga mavu a mi tshiginile ole athu enji; uvi mukunda mushi go athu a ha mavu enji mukunda nga mi phonele go mu katshi dia athu a ha mavu, hene mavu adi gu mi menga. ²⁰ Mu khala mu yibuga ndinga yinyi nga khalele gu mi leza egi : " Muthu wa gisalo gwa nu balega go fumu wenji wa gisalo ." Gula a ngu monesele phashi, mba adi mu mi monesa n'enwe nji phashi; nga a hatele ndinga wami, nga mba a mu hata nji yenu. ²¹ Mba adi mu mi kita ndaga jia phila ikima mukunda nu eme mukunda ashi go mu jiya yonu wa ngu tumile. ²² Gula nga nge jile go ha gu zwela, nga a salele go masumu; uvi lulu ngagi ashi go nu phila ya gulomba khenda mukunda nu masumu awo. ²³ Yonu udi mu ngu tuna, udi mu tuna nji Shami. ²⁴ Gula nga nga kitile go mu katshi dienu isalo yinyi ata muthu khanji a kita go, nga a kitile go masumu; uvi lulu ngagi a mona nu meso uvi adi mu ngu menga, nu gu menga Shami. ²⁵ Ndaga jiji jidi mu salama mukunda ndaga jia sonegeye mu mikanda ji lungisame mu phila ya sonegeye mu mikanda ya shigo egi : " Adi mu ngu menga mu ndaga jia phamba ." ²⁶ Tangwa mba diza muthu yonu wa nu katula athu uhote, ( yonu wa katugile gwa Shami Pheve ya masonga ya katugile gwa Tata), mba udi muta gi themwe giami. ²⁷ Enwe nji mba mudi muta gi themwe giami mukunda mwa khalele mu katshi diami katuga ha luyandigu.