¹ Mutshima wenu uzudi phashi go. Kwikilenu gwa Nzambi, kwikillenu nji gwa eme. ² Mu inzo ya Shami ifundo ya gu khala idi ya vula. Gula nga ishi go nganyi, nga nga mi lezele,mukunda ngu muya ha gu mi londela hama ha gukhala. ³ Gula ngaya ha gu mi londela hama ha gu khala, mba ngudi muza ha gu mi zangula mukunda hanyi nga mbo khala, enwe nji mu khale hene. ⁴ Mudi mu jiya njila yinyi ngudi muya." ⁵ Thoma wa lezele Yesu egi :" Fumu, tu shi mu jiya go gwi udi muya ; phila khi twa jiya gujiya njila ?" ⁶ Yesu wa mu lezele egi :" Eme, ngudi nga njila,masonga , nu monyo; gushi go nu muthu wa jiya guya gwa Tata konda gu balega gwa eme. ⁷ Gula mwa ngu jiya, mba mudi mu jiya Shami; katuga tangwa didi mwa mu jiya enji mwa mu mona." ⁸ Filipo wa lezele Yesu egi :" Fumu, tu leze Tata, nganyi tu khale na yo mu katshi dietu." ⁹ Yesu wa mu lezele egi : "Nga khala n'enu tangwa dia vula uvi mwa ngu jiyile go ti nu lulu ngagi, filipo ? Muthu yonu mu kima wa ngu mona, wa monaTata; Phila khi wa jiya gu zwela egi, " tu leze Tata ." ¹⁰ Enwe mushi go mu kwikila egi, ngudi mu katshi dia Tata, Tata nji udi mu katshi diami ? Ndinga ngudi gu mi leza, jia nu katuga go mu giyega giami ha khami ; uvi,idi Tata yonu wa nu jinga mu katshi diami udi mu kita gisalo Gienji. ¹¹ Ngu kwikilenu egi, ngudi mu katshi dia Tata, Tata nji udi mu katshi diami ; nga ndo ngu kwikilenu mukunda nu isalo yami . ¹² Mu masonga, masonga, ngu mu mi leza egi : " Yonu udi mu ngu kwikila, mba udi mu kita ima yinyi nga nu kita, " mba udi mu kita ya balega gu koma mukunda ngudi muya gami gwa Tata. ¹³ Nganyi ima ikima mudi mu lomba mu jina diami , mba ngudi mu ikita mukunda Tata a zule lukumu gwa Mona. ¹⁴ Gula mwa lomba gima gi kima mu jina diami, mba ngudi mu gi kita. ¹⁵ Gula mwa nu ngu tshiigina, mu khala mu hata shigo jiami. ¹⁶ Nganyi mba ngu bondila Tata, ha gu mi tumila muthu muko wa guza mu mi katula uhote, mukunda a khale mu katshi dienu tangwa dikima, ¹⁷ Pheve ya masonga. Athu a ha mavu a jiyile go gu mu zula mukunda a shi mu mu mona nga gu gu mu jiya. Uvi enwe mudi mu mu jiya mukunda udi mu jinga n'enu enji mba ukhala mu katshi dienu. ¹⁸ Mba ngu mi bembi go ha khenu; mba ngu muza mu vutuga ha gu mi sanga. ¹⁹ Gwa bega tangwa ga biyo mba mu ngu monyi nji go, uvi enwe mudi mu ngu mona. Mukunda ngu mu jinga, enwe nji mu jinge. ²⁰ Mu gilumbu giene mba mudi mu jiya egi ngudi mu katshi dia Tata, enwe mudi mu katshi diami, eme ngudi mu katshi dienu ²¹ Yonu mu kima udi mu hata shigo jiami nu gu ji salela,mwene yonu wa nu ngu tshigina; enji yonu udi mu ngu tshigina mba u tshiginiya gwa Shami, mba ngu mu tshigina nu gudi monesa mu katshi dienji." ²² Yudasi ( Isikaliote ndo) wa hudile Yesu egi :" Fumu, mukunda nu ikhi udi mudi monesa gwa etwe, uvi gu mavu akima ndo ?" ²³ Yesu wa vutudile egi : " Gula muthu wa ngu tshigina, ufeto hata malongi ami. Shami mba u mu tshigina enji mba tudi muza gwa mwene nu gu jinga n'enji. ²⁴ Yonu wa nu ngu tuna gwa nu hata go malongi ami. Malongi wanyi mwa nu vwa ashi ami go uvi adi a Tata yonu wa ngu tumile. ²⁵ Ngu mu mi leza ndaga jiji, tangwa ngudi mu jinga mu katshi dienu. ²⁶ Lulu ngagi, Muthu yonu wa nu katula athu uhote,( Pheve-Santu, yonu Tata mba a mi tumila mu jina diami) mba udi mu mi longa ndaga jikima nu gu mi leza ndaga jikima nga zwelele. ²⁷ Nga mi bembela ngemba; nga mi hwa ngemba yami. Ngu shi mu mi hwa go mu phila mavu adi mu hana. Mutshima wenu ukhadi go mu gisagasaga nu guvwa woma. ²⁸ Enwe mwa vile mu phila nga mi lezele egi : " Ngudi muya, mba ngu muza mu mi vutugila." Gula mudi mu ngu tshigina,mba mu khala mu kiese mukunda ngudi muya gwa Tata, mukunda Tata udi wa ngu balega. ²⁹ Lulu ngagi ngu mu mi leza ndaga jiene gu twama ndaga jiene ji salame mukunda mba mu kwikile tangwa mba ji salame. ³⁰ Mba ngu zwedi nji go n'enu mwa vula, mukunda fumia mavu udi muza. Gwa shi nu giyega holo diami go, ³¹ uvi mukunda mavu a jiye egi nga nu tshigina Shami, hene ngu mu kita kaka ndaga jinyi Tata a ngu hwile swa ya gu kita. Zugenu tu katuge haha."