¹ Gu twama fete ya phaka iyandige, Yesu wa jiyile egi tangwa diene dia lungile ha gu katuga ha mavu mukunda nu gu vutuga gwa Shenji. Mu phila a tshiginile athu enji a kima wanyi a khalele hoshia mavu, mwene wa a tshiginile nu ha suga. ² Henyanyi, diabulu wa khalele wa ngiidisa gale mu mutshima wa Yudasi Isikaliote, muna Simoni ngindu jia gu yegula Yesu. ³ Yesu wa jiyile egi Shenji wa mu hwile giyega gia ima ikima ha mago enji, enji wa katugile gwa Nzambi mba udi mu vutuga gwa Nzambi. ⁴ Wa zugile gu mesa a khalele mudia wa katudile mulele wenji. Gu nyima zudile gitemba gia mulele wa sudigile ha luketo. ⁵ Wa mbile meya ha longa wa yandigile gu wova malu a alongogi enji nu gu a dipha nu gitemba gia mulele wunu a jitshigile ha luketo. ⁶ Wa kumile gwa Simoni Petelo, hene Petelo a mu lezele egi :"Fumu, u mu ngu wova malu ?" ⁷ Yesu wa mu vutudile egi : "Ushi go mu jiya ndaga yiyi ngudi mu kita lulu ngagi, uvi mba udi mu ijiya gu twama. ⁸ Petelo wa mu lezele egi :" Ushi mu ngu wova go malu." Yesu wa mu vutudile egi :" Gula nga gu wovele go malu, mba ushi mu zula go ata ga kapho gu khanda wami. " ⁹ Simoni Petelo wa mu lezele egi :"Fumu u ngu wovi kaka malu, uvi u mu ngu wova nu mutwe." ¹⁰ Yesu wa mu vutudile egi :" Muthu yonu wa zwa meya mwila ukima gwa shi go nu funu ya gu wova go nji malu mukunda mwila wenji udi gale wa phelegeta. Enwe mudi mwa phelegeta, uvi ishi go khungienu akima." ¹¹ (Yesu wa khalele mu jiya nanyi mba u mu yegula; hene a zwelele egi :"Mushi go khengienu akima mwa phelegeta ." ¹² Tangwa yesu a manesele ha gu a wova malu, wa zudile milele yenji, wa vutugile ha mesa enji wa zwelele egi :" Enwe mudi mu jiya ndaga yinyi nga mi kitile ? ¹³ Enwe mwa nu ngu tamega egi :" Fumu " nu Longi " mwa nu zwela masonga mukunda ngudi ya masonga Fumu nu Longi. ¹⁴ Gula eme Longi nu Fumu nga mi wova malu, enwe mwa fete gudi wova malu mu katshi dienu mukunda eme nga mi leza mbandu ¹⁵ mukunda mba mu khale mu kita phila nga mi kita. ¹⁶ Mu masonga ,masonga, ngu mu mi leza egi, muthu wa gisalo gwa shi wa balege go fumu wenji wa gisalo, nga yonu wa tumiya a khale wa balega muthu yonu wa mu tumi. ¹⁷ Gula mudi mu jiya ndaga yene, mudi nu lusagumunu kaka gula mudi mu salela ndaga yene. ¹⁸ Nga zwelele go ndaga yene mukunda nu athu akima, uvi ngudi mu jiya athu wanyi nga phonele ( nga zwela nganyi mukunda ndaga jia sonegeye mu mikanda ji lungisama ) : "Yonu udi mudia dipha diami mba udi mu tuphula gidiatelo gienji ha gu ngu yegula." ¹⁹ Lulu ngagi ngudi gu mi leza gu twama ndaga jiene ji salame mukunda gilumbu mba ji bwa mba mu kwikile egi ngudi yonu ufeto khala. ²⁰ Mu masonga, masonga, ngu mu mi leza egi, muthu yonu wa ngu yamba, wa yamba yonu nga tuma, enji wa yamba yonu wa ngu tumile ." ²¹ Tangwa Yesu a zwelele nganyi, pheve yenji wa bwile tunga-tunga wa tele gimbangi egi :" Mu masonga, masonga, ngu mu mi leza egi, mu moshi mu katshi dienu wa ngu yegula." ²² Alongogi adi talele ene nu ene, nu gudi hula egi nanyi Yesu adi mu zwelela. ²³ Mulongogi mu moshi, yonu Yesu a khalele mu tshigina, wa khalele wa shiuga ha thulo ya Yesu gu mesa. ²⁴ Simoni Petelo wa kitile gidimbu gwa longogi mwene wa mu hudile egi:" Tu leze nanyi Yesu adi mu zwelela." ²⁵ Mulongogi mwene wa shiugile ha thulo ya Yesu wa mu hudile egi :" Fumu, muthu mwene nanyi?" ²⁶ Yesu wa vutudile egi :" Yonu nga mbo hwa gitshidi gia dipha nga bonda mu meya mwene ." Tangwa a bondele dipha mu meya, wa hwile Yudasi Isikaliote, muna Simoni Isikaliote . ²⁷ Gu nyima dia gudia dipha, Satana wa ngidile mu mutshima wa Yudasi. Yesu wa zwelele nji egi :" Ndaga wa tshigina gu kita, i kite mu phushi-pushi." ²⁸ Ata muthu mu katshi diawo a khalele gu mesa wa jiyile gikuma Yesu a mu lezele nganyi. ²⁹ Alongogi ako a yindudile egi, mukunda Yudasi udi muthu udi nu giyega gia gu bumba sandugu ya mbongo, hene Yesu a mu leza nganyi egi :" Sumba ima tudi nayo funu mukunda nu fete." Ako a yindudile egi Yudasi udi ne ya guhwa a sugami nga ndambu ga ima. ³⁰ Tangwa a zudile dipha, Yudasi wa zogele mbala imoshi ha guya. Ya khalele mu phipha. ³¹ Tangwa Yudasi a zogele muya, Yesu wa zwelele egi :" Lulu ngagi Muna-muthu udi mu zula lukumu enji Nzambi wa zula lukumu gwa mwene. ³² Nzambi udi mu mu hwa lukumu gwa mwene ha khenji, udi mu mu hwa lukumu kaka lulu ngagi. ³³ Anami a mitumba, ngudi n'enu kaka tangwa gabiyo. Mba mudi mu ngu kamba, mu phila nga ba lezele ba yuda " hama ngudi muya, mba mushi mu kuma hene go" lulu ngagi ngu mu mi leza nji nu enwe. ³⁴ Ngu mu mi hwa shigo imoshi ya pha egi, khalenu mudi tshigina mu katshi dienu mu phila nga mi tshignile ; hene mu khala mudi tshigina mu khatshi dienu. ³⁵ Nganyi, athu a ha mavu mba a jiyya egi mudi mwa alongogi enu, gula mudi mu di tshigina mu katshi dienu." ³⁶ Simoni Petelo wa mu hudile egi :" Fumu, gwi udi muya ?" Yesu wa mu vutudile egi :" Guma ngudi muya, wa jiyile go gu ngu hata lulu ngagi, uvi mba udi mu ngu hata gu twama." ³⁷ Petelo wa mu lezele egi :" Fumu, mukunda nu ikhi nga jiyile go gu gu hata lulu ngagi ? Mba ngudi mu hana monyo wami gwa eye." ³⁸ Yesu wa vutudile egi :" Mba udi mu hana monyo waye gwa eme ? Mu masonga, masonga ngu mu gu leza egi,kolombolo dia mbo dila go gu twama eye u tune mbala ji tatu egi u ngu jiya go."