¹ Ilumbu isambano gu twama dia pake, Yesu we jile gu Betaniya dimbo dia lazalo yonu wa zugishiye gu lufwa. ² Malata wa mu hwile madia, lazalo wa khalele mu katshi dia wanyi a khalele gu mesa nu Yesu. ³ Mariya we jile nu mulangi wa mananashi a thalo wa a phanzele mu malu a Yesu, enji wa yandigile gu mu kukumuna malu nu sugi jenji. Inzo ikima ya zalele nu vumba dia mananashi. ⁴ Yudasi isikaliote, mu moshi mu katshi dia alongogi, yonu wa yegudile Yesu, wa zwelele egi : ⁵ " Mukunda nu ikhi nu gu diga ndo mananashi mu khama ji tatu jia mbongo ha gukaphela a sugami mbongo jiene? " ⁶ Wa zwelele nganyi, mukunda mwene wa khalele mu tala a sugami, uvi mukunda wa khalele nzangi : wa khalele mubumbi wa mbongo enji mwene wa khalele mu zula ima ya khalele mu haneya. ⁷ Yesu wa zwelele egi : "bemba mukhetu yogu tedie. Wa katuga gu kita gima gigi ha gu yidiga lufwa lwami. ⁸ A sugami mba mudi mu khala nawo tangwa dikima, uvi eme mba mushi mu khala go n'eme tangwa dikima." ¹⁰ Ma fumu a nganga nzambi a tele fondo ya gu shiya Lazalo; ¹¹ A zwelele egi idi mukunda nu mwene a yuda a vula a tu katuga ha gu kwikila gwa Yesu. ¹² Mu gilumbu gia gu twama,athu a vula ejile gu fete, tangwa a vile egi Yesu udi muza gu Yelusalemi, ¹³ a zudile thango jia samba , a zogele ha guya mu mu tagana, a khalele mu kaluluga mu ndinga ya ngolo egi :"ozana! lusagumunu gwa yonu udi muza mu jina dia Fumu , fumu wa isalele." ¹⁴ Yesu wa sangele muna phunda wadi tumbigile holu ; mukunda a sonegele egi : ¹⁵ "ubangi go eye mukhetu wa siyoni ; tala, fumu waye udi muza udi holo dia muna phunda." ¹⁶ A longogi enji a khalele go mu jiya ndaga jiene gu twama, uvi tangwa yesu a hwiye lukumu, a yibugile egi ndaga jiene jia sonegeye mukunda nu mwene jia salama. ¹⁷ Lulu ngagi athu wanyi a vula a khalele nu Yesu tangwa a tamegele Lazalo gu majiamo ha gu mu zugisa gu lufwa, a tele gimbangi gwa athu ako. ¹⁸ Mukunda nu nganyi, athu a zogele ha gu mu tagana, mukunda a vile phila Yesu a kitile gidimbu gia khumbwa. ¹⁹ Afalisaye a zwelele ene nu ene egi : "Talenu, mu shi go ata gima gia gu kita; talanu, phila athu adi mu mu hata." ²⁰ Lulu ngagi gwa khalele nu ba greki ako a khalele mu katshi dia wanyi a kandugile ha guza gu fete. ²¹ A yile gwa filipo, muthu wa gu Betesayida gu Galileya ha gu hula egi : "Yala, tudi nu funu ya gumona Yesu." ²² Filipo wa lezele Andre; Andre nu Filipo a yile mu leza Yesu. ²³ Yesu wa a vutudile egi :" Tangwa dia kuwa, mukunda Muna Muthu a zule lukumu. " ²⁴ Mu masonga masonga, ngudi gu mi leza egi, kana mbuma ya ble kaka imoshi phamba ya bwa mu mavu nu gu fwa ndo, uvi gula ya fwa mba idi mu buta mbuma jia vula. ²⁵ Muthu wa nu tshigina monyo wenji, mba udi mu u totesa, uvi yonu wa nu vweza monyo wenji haha hoshia mavu mba udi mu uswega mu mvula nu mvula. ²⁶ Gula muthu wa tshigina gu ngu salela, a ngu hate; mukunda hama hanyi ngudi, hene mba ha khala athu ami a gisalo. Gula muthu udi mu ngu salela, Shami mba udi mu mu hwa lukumu. ²⁷ Monyo wami udi mu phashi mu tangwa didi :ikhi nga jiya gu zwela ? Ngu zwela egi :" Tata ngu guluse gu twama dia phashi jiji ? uvi idi mukunda nu tangwa didi eme nge jile. ²⁸ Tata, hana lukumu gu jina diaye." Ndinga ya zogele gosa egi ; " Nga hana lukumu gu jina diene, enji mba ngu di hana sha." ²⁹ Tangwa didi athu wanyi a khalele hene a vile ndinga yene a zwelele egi inyi nzaji ya bula, ako a zwelele egi :"wanjio weza mu mu leza ndaga." ³⁰ Yesu wa vutudile egi : "Ndinga yiyi ya zogele go mukunda nu eme, uvi mukunda nu enwe. ³¹ Lulu ngagi tangwa dia gu sambesa mavu a kima dia lunga : haha fumu wa ha mavu u mu kayeya. ³² Eme , tangwa mba ngu tuphudiya gosa, mba ngudi mu benda athu phene-phene n'eme." ³³ Wa zwelele nganyi ha gu leza athu phila mwene mba a fwa. ³⁴ Athu a vutudile egi : Ta tangele mu mikanda ya shigo egi Kilisto mba u jinga mvula nu mvula. Phila khi udi mu zwela egi : " Muna Muthu mba udi mu tuphudiya haha ha mavu ha mu twala gosa?" Muna Muthu mwene nanyi ?" ³⁵ Yesu wa a lezele egi :" Mwanya udi mu katshi dienu tangwa gabiyo. Enwe wendenu tangwa mudi mu mwanya, mukunda phipha gu mi bwila ndo. Muthu yonu udi mu wenda mu phipha gwa nu jiya go guma adi muya. ³⁶ Tangwa mudi nu mwanya, mu kwikila gu mwanya wene mukunda mu kituge ana a mwanya." Tangwa Yesu a zwelele ndaga jiene gwa suga, wa vutugile muya mudi swega gwa leha. ³⁷ Ata Yesu wa kitile idimbu ya vula gu twama diawo, ene a mu kwikile go ³⁸ mukunda ndinga ya zwelele profeta Yezaya ilungisame, mu phila a zwelele egi :"Fumu, nanyi wa kwikile gu sango yetu ? Gwa nanyi koko dia Fumu dia tuphudiye ?" ³⁹ Mukunda nu nganyi, a kwikile go gu ndaga Yezaya a zwelele nji egi : ⁴⁰ "Wa a shiyile meso, nu gu akolesa mitshima, mukunda mba a mone nu meso, nu gu jiya mayele ha gu balula mitshima yawo, mba eze a vutuge, mba a abelule." ⁴¹ Yezaya wa zwelele ndaga jiene, mukunda wa monele lukumu lwa Yesu, enji wa zwelele mukunda nu mwene. ⁴² Lulu ngagi, ma fumu a vula a kwikile gwa Yesu; uvi mukunda nu afalisaye a khalele mudi swega ha gula gukatudiya ndo mu inzo ya isambu. ⁴³ A khalele mu tshigina khunga jia lukumu jia athu; uvi jia lukumu lwa Nzambi ndo. ⁴⁴ Yesu wa kabugile mu ndinga ya ngolo egi : "Yonu udi mu ngu kwikila, gwa shi go mu kwikila gwa eme phamba, udi mu kwikila nu gwa muthu yonu wa ngu tumile, ⁴⁵ enji yonu wa ngu mona wa mona yonu wa ngu tumile. ⁴⁶ Eme nge jile ole mwanya haha hoshia mavu, mukunda yonu mu kima wa nu ngu kwikila a begi go mu phipha. ⁴⁷ Gula muthu udi mu vwa malongi ami, uvi gwa nu a salela go, ngu shi mu mu sambesa go; mukunda nge jile go ha gu sambesa athu a ha mavu, uvi ha gu a gulusa. ⁴⁸ Yonu wa ngu tuna gami, nu gu konda gu kwikila gu malongi ami, gudi nu nzuji mu moshi mba udi mu mu sambesa : malongi nga longele ene mba a mu sambesa mu gilumbu gia suga. ⁴⁹ Mukunda eme nga nu zwela go mu luzolo lwami. Khanda iko, idi Tata yonu wa ngu tumile, mwene wa ngu hwile giyega gia gu zwela ndaga jinyi ngudi mu zwela. ⁵⁰ Ngudi mu jiya egi shigo yenji idi monyo wa mvula nu mvula ; hene ndaga ngudi mu zwela, ngu mu ji zwela mu phila Tata a ngu lezele ha gu zwela ."