¹ Gwa khalele muthu mu moshi, jina dienji lazalo,wa khalele nu gu kata. Wa khalele muthu wa gu Betani, dimbo dia Mariya nu Malata phangi'enji wa mukhetu. ² Lazalo wa khalele phangia Mariya yonu wa kungudile Fumu mananashi, nu gu mu dipha malu nu sugi jenji. ³ A phangi'enji muyadi a akhetu a tumile muthu gwa Yesu ha gu mu leza egi :" Fumu, tala muthu yonu wa nu tshigina udi nu gukata." ⁴ Tangwa Yesu a vile ndaga yene wa zwelele egi:" gukata gwene gu shi go gwa lufwa, uvi mukunda nu lukumu lwa Nzambi, enji mukunda Muna Nzambi a zule lukumu." ⁵ Yesu wa khalele mu tshigina Malata, nu phangienji wa mukhetu nu Lazalo. ⁶ Tangwa Yesu a vile egi Lazalo udi nu gukata, wa balegesele ilumbu ya gubalega iyadi mu dimbo a khalele. ⁷ Gu nyima wa lezele alongogi egi;"Tu vutugenu gu Yudeya." ⁸ Alongogi a mu lezele egi;" Fumu, mu tangwa didi ba yuda adi mu kamba phila gu gukwata udi mu tshigina gu vutuga gwene? " ⁹ Yesu wa vutudile egi : gilumbu gi moshi gidi nu ma tangwa kumi nu muyadi gula muthu udi mu wenda mu mwanya, mba gwa shalumuga go, mukunda udi mu mona mwanya wa gifutshi." ¹⁰ Gula udi mu wenda mu phipha, mba udi mu shalumuga mukunda mwanya gu thugu. ¹¹ Gu nyima ya gu zwele ndaga jiene wa zwelele nji egi:" Futa dietu Lazalo udi gu tulo, idi ya bonga tu vutuge ha gu mu zugisa." ¹² Alongogi a mu lezele egi :" Fumu, gula udi gu tulo udi mu zuga ." ¹³ Yesu wa zwelele nganyi ha gu leza ndaga ya lufwa lwa Lazalo uvi ene a yindudile egi udi mu zwelela tulo. ¹⁴ Hene Yesu a a lezele mayilago egi: " Lazalo udi wa fwa." ¹⁵ Ngudi gu mi vila kiese mukunda ndaga yene ya salama gu nyima diami, mukunda mu kwikile. Lulu ngagi tu vutugenu gwene." ¹⁶ Thoma yonu wa diphasa wa lezele alongogi ako egi :"Tu yenu khungi ha gufwa nu Yesu." ¹⁷ Tangwa Yesu a kumile wa yindudile egi Lazalo wa lungisa ilumbu iwana katuga gilumbu gia a fundiye. ¹⁸ Betaniya ya khalele phene-phene nu Yelusalemi giteso gia ilometele kumi nu tano. ¹⁹ A yuda a vula ejile mu tala Malata nu Mariya ha gukapha phashi jia lufwa jia phangia'wo wa yala. ²⁰ Tangwa Malata a vile guza gwa Yesu, wa zugile muya ha gu mu tagana uvi Mariya wa begele monzo wa di tumbiga hoshi. ²¹ Malata wa lezele Yesu egi :"Fumu, gula nga wa khalele haha,nga phangia'mi a file go. ²² Ata lulu ngagi ngudi mu jiya egi gima gi kima wa mbo lomba gwa Nzambi , udi mu gu hwa nagio." ²³ Yesu wa mu lezele egi : " phangia'ye u mu vutuga mu lujingu." ²⁴ Malata wa mu lezele egi : " Ngudi mu jiya egi mba udi mu vutuga mu lujingu mu gilumbu gia suga gia gufutumuga gwa athu. " ²⁵ Yesu wa mu vutudile egi : " Ngudi nga lufutumugu nu lujingu; yonu udi mu ngu kwikila mba udi mu jinga ata gu nyima dia lufwa; ²⁶ uvi yonu udi nu monyo enji udi mu ngu kwikila mba gwa shi mu fwa go. Udi mu kwikila mu ndaga yene ?" ²⁷ Wa mu lezele egi : " Eya, Fumu, nga kwikila egi udi wa Kilisto Muna Nzambi udi muza ha mavu. ²⁸ Gu nyima dia masolo, Malata wa tamegele Mariya mu giswegi wa mu lezele egi :" Longi udi haha, udi mu gu tamega." ²⁹ Tangwa a vile ndaga yene, wa zugile mu phushi muya gwa Yesu. ³⁰ Yesu wa khalele ha songi ya dimbo hama Malata a mu sangele . ³¹ Tangwa ma yuda a khalele mu inzo wanyi ejile mu tala Mariya ha gu mu katula uhote a monele phila a zugile mu zoga mu phushi a mu hatele, a yindudile egi udi muya gu majiamo ha gu dila. ³² Tangwa Mariya a kumile hama Yesu a khalele, wa bwile mu malu enji nu gu mu leza egi : "Fumu, gula nga wa khalele hene phangia'mi nga gwa file go." ³³ Tangwa Yesu a monele phila a khalele mu dila, nu ha gu mona phila a yuda ejile nenji a khalele mu dila, mwene wa vile phashi jia vula goshia mutshima enji pheve yenji ya di yangishile mwa vula. ³⁴ Wa hudile egi :" Gwi mwa mu fundile?" A mu vutudile egi : "Fumu, giza u mone." ³⁵ Yesu wa didile. ³⁶ Hene a yuda a zwelele egi: " Talenu, wa tshiginile sha Lazalo!" ³⁷ Uvi a vula mu katshi diawo a zwelele egi :" Muthu yogu wa kangudile meso a gifofo, gwa jiyile go gu kita gima mu phila egi muthu yogu ale gufwa ndo ? ³⁸ Hene Yesu a vile nji phashi jia vula, wa yile gu majiamo. Gunu hama ha londeye goshia mavu ha gu haga mufi, enji a kangele seso ha mufulo. ³⁹ Yesu wa zwelele egi: "Katulenu seso!" Malata phangia mufu lazalo wa lezele Yesu egi :"Fumu, henyaha mwila wenji udi mudi batugila, mukunda gwa balega ilumbu iwana katuga gilumbu gia file." ⁴⁰ Wa mu lezele egi: "Nga gu lezele go egi gula wa kwikila, mba udi mu mona khembo ya Nzambi?" ⁴¹ A katudile seso diene. Yesu wa tuphudile meso wa zwelele egi:" Tata, nga gu vutudila matondo mukunda wa nu ngu vila. ⁴² Nga jiya egi wa nu ngu vila, ishi go mukunda nu athu wawa adi haha phene-phene nu eme ngudi mu zwela nganyi, uvi mukunda a kwikile egi eye wa ngu tumile." ⁴³ Gu nyima ya guzwela, Yesu wa kabugile mu ndinga ya ngolo egi; "Lazalo zoga !" ⁴⁴ Mufi wa zogele; mago nu malu enji a gu jitshiga nu shinga jia milele, enji gu meso gwa gu tshiga nu mulele. Yesu wa a lezele egi :" mu jitululenu mu mu bembe aye!" ⁴⁵ A yuda a vula ejile mu tala Mariya, a monele nu meso ima ya salele Yesu, hene a kwikile gwa mwene. ⁴⁶ Uvi ako a vutugile gwa afalisaye ha gu a tela ndaga phila jia balegele ⁴⁷ Ma fumu a ji nganga nzambi nu afalisaye adi bungishile adi fetegesele egi :"Ikhi tu kita?" Muthu mwene udi mu sala idimbu ya vula. ⁴⁸ Gula ta mu bemba, athu akima a mu kwikila gwa mwene; enji enya gu Roma mba adi muza ha gu tu tambula dimbo. ⁴⁹ Lulu ngagi, muthu mu moshi mu katshi diawo jina dienji Kayifa, wa khalele fumu wa nganga-nzambi mu mvula yene yinyi, wa zwelele egi:"Mushi go mu jiya gima. ⁵⁰ Mushi mu yindula go mu mabanza enu egi idi ya bonga muthu mu moshi a fwe, mukunda nu athu a kima, gula ndo tudi mu totesa dimbo di kima." ⁵¹ Ndaga yene ya zogele gwa mwene mukunda wa khalele fumu wa nganga nzambi mu mvula yene yinyi, uvi wa diangele gu zwela ha gu jiyisa gu twama egi Yesu mba udi mu fwa mukunda nu dimbo di kima; ⁵² enji ya khalele go mukunda nu dimbo di kima, uvi mukunda nu ana-a-Nzambi wanyi a phanzanele a vutuge hama ha moshi. ⁵³ Katuga gilumbu giene, a yandigile gu kamba phila ya gu shiya Yesu. ⁵⁵ Yesu gwa yandigile nji go gu wenda ha meso a ba yuda, uvi wa katugile genji ha guya mu dimbo di moshi phene-phene nu temu, mu dimbo dia nu tamegeya egi Efrayimi. wa yile mu khala gwene nu alongogi enji. ⁵⁴ Sungi ya pake ya ba yuda ya khalele phene-phene, athu a vula a kandugile gu Yelusalemi, ako a katugile mu membo ako ejile gu twama mukunda nu gudi katula masumu. ⁵⁶ A khalele mu kamba Yesu, nu gudi hula ene nu ene tangwa a khalele mu temphelo egi :"Ikhi mudi mu yindula? gwa shi go muza gu fete?" ⁵⁷ Ma fumu a nganga-Nzambi nzambi nu afalisaye a hanele mukwala gwa athu , ha gu jiyisa hama Yesu adi mu khala mukunda nu gu mu kwata.