¹ Mu masonga, masonga, ngu mu mi leza egi, Muthu yonu wa nu la gu ngila ndo mu gizo gia mameme ha mufulo, uvi wa nu ngidila mu njila yekha, muthu mwene udi nzangi enji wa nu tambula ima ya athu. ² Uvi yonu wa nu ngila ha mufulo udi mutadi wa mameme. ³ Muthu wa nu tala gizo wa nu kangula mufulo. Mameme a nu vwa ndinga yenji enji wa nu tamega mameme enji mu ma jina awo ha gu a zola mu gizo. ⁴ Tangwa mwene adi mu zola mameme wanyi adi enji, wa nu magana gu twama diawo ene a nu mu hata; mukunda adi mu jiya ndinga yenji. ⁵ Mba ashi mu hata go mwenyi uvi a feto gu mu lenga; mukunda ashi mu jiya go ndinga ya mwenyi." ⁶ Yesu wa a tele gingana gigi, uvi ene a bagisele go ndaga inyi a khalele mu a leza. ⁷ Yesu wa a lezele nji egi: " Mu masonga, masonga, ngu mu mi leza egi, ngudi nga mufulo wa mameme. ⁸ Athu wanyi akima ejile gu twama diami adi nzangi enji athu a nu tambula ima ya athu ako, uvi mameme a vile go ndinga yawo. ⁹ Ngudi nga mufulo. Yonu mukima udi mu ngidila mu njila yami mba udi mu guluga; mba udi mu ngila nu gu zoga enji mba udi mu mona idi ya gudia. ¹⁰ Nzangi wa nu za kaka mukunda nu gu kuya, gu shiya nu gu bolesa. Eme, nge jile mukunda mameme a zule monyo enji monyo wene u khale wa vula ¹¹ Eme nga mutadi wa mameme wa bonga. Mutadi wa imeme wa bonga wa nu hana monyo wenji gwa mameme enji. ¹² Muthu wa gisalo gwa shi go mutadi wa mameme gwa shi nji go fumia mameme. Gula wa mona gibulu muza, wa nu bemba mameme wa lenga genji. Gibulu gia nu za mu a kwata nu gu a phanza. ¹³ Wa nu lenga genji mukunda udi genji muthu wa gisalo gwa nu vila genji mameme khenda go. ¹⁴ Eme nga mutadi wa mameme wa bonga. Nga jiya mameme wanyi adi ami ene nji a nu ngu jiya. ¹⁵ Tata udi mu ngu jiya eme nji ngu jiya Tata; nga nu hana monyo wami gwa mameme ami. ¹⁶ Ngudi nji nu mameme ako ashi go haha mu katshi dia gizo. Idi ya bonga ngu a ngidise haha mu gizo, eze a vwe ndinga yami mukunda a vutuge mu gimvuga gi moshi a khale nu mutadi mu moshi. ¹⁷ Tala gikuma Tata a nu ngu tshiginila; nga nu hana monyo wami gu nyima nga nu u tambula. ¹⁸ Gushi go ata muthu wa nu ngu tambula nayo, uvi nga nu u hana eme ha khami. Ngudi nu giyega gia gu u hana nu giyega gia gu u tambula. Shami wa ngu hwile giyega giene." ¹⁹ Gudikapha gwa ngidile mu katshi dia bayuda mukunda nu ndinga jiene. ²⁰ A vula mu katshi diawo a zwelele egi: " Udi nu diabulu enji udi mwenya malwi. Mukunda nu ikhi mudi mu vwa ndaga jienji?" ²¹ Ako nji a zwelele egi: " Ndaga jiji adi mu zwela jishi go ndaga jia muthu udi nu diabulu. Keti diabulu wa jiya gu kangula meso a gifwa meso?" ²² Mu tangwa diene khinji ya gu tumbiga ya salamele gu Yelusalemi. ²³ Ya khalele mu sungi ya gishiyo yesu wa khalele mu wenda mu katshi dia inzo ya isambu, gu khanda ya kunji dia Salomo. ²⁴ Bayuda a mu jungile enji a mu hudile egi: " Ti nu tangwa khi wa jiya gu tu bemba mu katshi dia gudi hula? Gula udi wa Kilisto, tu leza nayo ha phelo." ²⁵ Yesu wa a vutudile egi: " Nga mi lezele gala uvi enwe mwa nu kwikila go Ndaga jinyi nga kitile mu jina dia Shami jidi mu hana gi themwe giami. ²⁶ Enwe mushi mu kwikila go mukunda mushi mwa mameme ami go. ²⁷ Mameme ami a nu vwa ndinga yami. Ngudi mu a jiya ene nji a nu ngu hata. ²⁸ Ngu mu a hwa monyo wa konda suga ene mba ashi mu fwa go enji gushi go nu Muthu wa jiya gu ngu tambula nawo ha mago ami. ²⁹ Shami wa ngu hwile nawo udi wa balega athu akima gu koma enji gushi go nu muthu wa jiya gu a tambula gu mago a Shami. ³⁰ N'eme nu Tata, tudi muthu mu moshi." ³¹ Hene bayuda a nonele nji maseso ha gu mu kwemba. ³² Yesu wa a vutudile egi: " Nga katuga gu mi leza ima ya bonga ya vula ya Shami. Idi mukunda nu gima khi mwa tshigina gu ngu shiyila?" ³³ Bayuda a mu vutudile egi: " Ishi go mukunda nu gima gia bonga ta tshigina gu gu shiya, uvi idi mukunda nu gu zweza; mukunda, eye, wa muthu, wa tshigina gudi kitula wa Nzambi." ³⁴ Yesu wa a vutudile egi: " Keti ishi go ya gu sonega mu mikanda ya shigo egi: " Nga zwelele egi mudi mwa tu nzambi? ³⁵ Gula wa a tamegele egi tu nzambi, idi egi wanyi ndinga ya Nzambi ya kanele ( ndaga ya sonegeye gula ishi ya gu balula go), ³⁶ phila khi mudi mu leza yonu Tata a kungudile mafuta a santu, nu gu mu tuma haha ha mavu egi: " udi mu zweza", Mukunda nga zwelele egi: " Nga Muna Nzambi"? ³⁷ Gula nga kitile go isalo ya Shami, nga mwa ngu kwikile go. ³⁸ Uvi gula ngu mu kita isalo yene, ata mushi mu ngu kwikila go, mwa jiya gu kwikila mukunda nu isalo yene; nganyi mba mudi mu jiya nu gu bagisa egi Tata udi mu katshi diami, eme ngudi mu katshi dia Tata." ³⁹ A Phagele ha gu kwata Yesu, uvi mwene wa shaugile nu gu tota gu mago awo. ⁴⁰ Gu nyima Yesu wa yile ha sambwa dia Yolodani, muya mu khala hama hanyi Yowani a khalele nu gikalulu gia gu botiga athu. ⁴¹ Athu a vula ejile gwa mwene a mu lezele egi: " Yowani gwa kitile go ata gidimbu gia khumbwa gi moshi, uvi ndaga gi kima a zwelele mukunda nu Muthu yogu jidi jia kielega. ⁴² Athu a vula a kwikile gwa Yesu hama hene.