¹ Kilistu wa tu katudile mu gi higa mukunda tu khale mu ngemba, hene kwatenu ngolo, mu tshigina nji go mu khale mwa a higa. ² Eme pholo ngu mu mi leza egi, gula mwa mbiye gu luyotisi ishi mu leza go egi Kilistu gwa shi go nu funu. ³ Ngu mu mi leza nji egi muthu mukima yonu wa mbiye gu luyotisi wa feto hata kaka shigo nu gu ji jitisa. ⁴ Enwe athu mudi mu kamba ha gu tshiginiya gwa Nzambi mukunda nu shigo, mwa di kaphele gale genu nu Kilistu, nganyi gwa jiyile nji go gu tu leza khenda jenji. ⁵ Mukunda etwe mu njila ya pheve nu lukwikilu, tudi mu nenga masonga ⁶ mukunda gula tudi mu gimvuga nu Yesu Kilistu, luyotisi nu gu konda luyotisi gu shi nu funu go. Uvi gima gidi nu funu gidi lukwikilu lunu ludi nu gutshigina, ⁷ mwa khalele mu zula phushi mwa bonga, nanyi wa mi kanga njila ha gu konda gu lemvuga gu masonga? Mabanza a phila yiyi a shi mu katuga go gwa yonu wa mi tamegele. ?wa tshigina gu bolesa sango ya bonga ya Kilistu. ⁸ Uvi, ata etwe, nga ndo wanjio mu moshi wa gosa weza mu mi jiyisa sango ya bonga inyi ishi ya fwanana go nu sango ya bonga inyi tudi mu mi jiyisa, wa feto shinjiya. ⁹ Ga ndambu ga khishi dia mapha ga nu jimbisa photo-photo ya nu londeya mapha. ¹⁰ Mukunda nu gimvuga mudi nagio nu Fumu, mba mushi mu khala go nu ngindu jiko. Uvi muthu yonu udi mu mi bata mu mavanga ata nanyi, mba udi mu zula ndola ¹¹ Aphangi, gula ngu mu hata ha gu mi longa ndaga ya luyotisi, mukunda nu ikhi mudi mu ngu monesa phashi? Gula idi nganyi seso didi mu budisa sakuba dia katudiya. ¹² Ngu mu tshigina egi athu adi mu mi batela mavanga a katudiye ene gibeni mu katshi dienu. ¹³ Aphangi, Nzambi wa mi phonele ha gu jinga mu ngemba, uvi mu salela go ngemba yene ha gu jinga mu njila ya gi muthu, kaka khalenu mudi kwatesa mu luzolo lwa bonga. ¹⁴ Mukunda shigo jikima jidi mu zoga mu shigo yiyi egi: " tshigina phangi'aye mu phila wa nu di tshigina eye ha khaye". ¹⁵ Uvi gula mudi mu sumana akwenu nu gudi dia enwe hakhenu, kebenu mukunda mwa jiya gudi shiya enwe nu aphangi'enu. ¹⁶ Hene, ngu mu mi leza egi, khalenu mu wenda nu pheve, nganyi mushi mu hata go luzolo lwa gi muthu. ¹⁷ Mukunda luzolo lwa gi muthu lwa nu di visa go nu luzolo lwa pheve, enwe hatenu ha gu kita ndaga jinyi mwa tshigina gu kita. ¹⁸ Uvi gula pheve idi mu mi twameza, shigo jia jiyile go gu mi yala. ¹⁹ Lulu ngagi, isalo ya gi muthu idi mu monega sha gu meso. Isalo yene idi: uthambi, ndaga jia sonyi, nu ndaga jia photo-photo, ²⁰ gu sambela itege, ndaga jia wanga, gu salela gimbenyi, gudi kapha, gudi tuna, gingonzo, khabu, gu haga thembe, ²¹ gu haga meso gu ima ya athu ako, gu lauga matombe, guya mudia hama ha mu zoleya wadi, nu gu kita ndaga jia bola. Lulu ngagi, ngu mu mi leza mu phila nga mi yibugishile mbala ya thomo egi, athu wanyi adi mu salela ndaga jia phila yene inyi, mba a zudi Gifumu gia Nzambi. ²² Uvi, ndaga jia nu salela athu mu gipheve jinyiji: gudi tshigina, kiese, ngemba, gu kanga mutshima, gu kita ndaga jia bonga, lukwikilu, ²³ mawete, gudi yala ene hakhawo. Gushi go ata shigo imoshi idi nu tuna ndaga jiji. ²⁴ Athu wanyi adi, athu a Kilisto Yesu a tuna gawo go gu kita nzala ya gi muthu, nu ndaga jiko jia bola. ²⁵ Gula tudi mu jinga mu pheve, tu wendenu nji mu gi pheve. ²⁶ Tu bembenu lulendo, tu monesa go pheve ya gudi tesa nu athu ako, nu gu konda gu vila athu ako gingonzo.