¹ Aphangi gula yala mu moshi wa kwateya nu mukhetu mu uthambi, enwe mudi nu gi pheve, mu vutulenu mu ngemba. Mudi keba enwe hakhenu, mukunda ha gula gubwa ndo ha gu dimbiya. ² Di kwatesenu ginemo, nganyi mba mudi mu lungisa shigo ya Kilisto. ³ Mukunda gula muthu mu moshi udi mu yindula egi udi gima gi moshi tangwa adi genji phamba, udi mudi mbila mambo mwene hakhenji. ⁴ Muthu mukima a talulule isalo yenji, nganyi wa jiya gudi hwa lukumu, konda gudi fwanesa nu muthu muko, ⁵ Mukunda muthu mba udi mu bata ginemo gienji. ⁶ Muthu yonu udi mu longeya sango ya bonga wa feto kapha ima yenji nu longi wenji. ⁷ Mudi dimbi go, Nzambi gwa nu leleya go. Gima gikima muthu mba a kuna, mba udi mu gi katula. ⁸ Mukunda yonu wa kuna khenyi mukunda nu ndaga jenji jia masumu, mba gwa katula go gima. Uvi yonu wa kuna mukunda nu pheve, mba udi mu katula lujingu lwa mvula nu mvula lwa gi pheve. ⁹ Tu bembi go ha gu kita ndaga jia bonga,mukunda tangwa didi muza, mba tudi mu katula mabundu a bonga. ¹⁰ Hene mu tangwa didi dia bonga tu kite ndaga jia bonga gwa muthu mukima. Tu kite ndaga jia bonga gwa wanyi tudi nawo mu gimvuga gia lukwikilu. ¹¹ Talenu phila nga mi sonegele mikanda mu isonyi ya koma yami ha khami. ¹² Wanyi a tshigina gu leza gikalulu gia bonga mu musunyi adi gu mi phusa ha gu mbiya gu luyotisi, kaka mukunda ale gu moneseya ndo phashi ha khulunji ya Kilisto. ¹³ Mukunda ata wanyi a mbiye gu luyotisi a shi mu bumba shigo go, uvi adi mu tshigina egi mu mbiye gu luyotisi mukunda a zule lukumu mu mwila wenu. ¹⁴ Nga tshiginile go a ngu hwe lukumu, gula ishi go kaka mukunda nu khulunji ya Fumu wetu Yesu Kilisto, mukunda nu khulunji yenji mavu akima a file mukunda nu eme, enji eme nga file mukunda nu mavu akima. ¹⁵ Funu gu thugu egi tu mbiye gu luyotisi to tu konde gu mbiya gu luyotisi, uvi gima gia funu gidi egi: muthu mu kima a kituge muthu wa pha. ¹⁶ Wanyi akima mba a hata shigo yiyi, ngemba nu khenda ji khale nawo nu gwa enya gu izalayele ya Nzambi. ¹⁷ Yandiga henyaha, muthu gu ngu monesa nji phashi ndo, mukunda phuta jiji ngu di najio gu mwila jidi mu leza egi ngu di nga muhiga wa Yesu. ¹⁸ Aphangi,khenda jia Fumu wetu Yesu Kilisto ji khale mu katshi dienu. Amen