¹ Nga zwelele mwa leha egi mona wa gifugo udi mona, udi giteso gi moshi nu muhiga, ata udi mwene fumia ima ikima. ² Hene wa feto lemvugila kaka shenji nu wanyi a hageye ha gu tala ima yene, ti nu tangwa dinyi shenji a hagele ha gu mu hwa gifugo giene. ³ Etwe nji tangwa ta khalele ana, ta khalele goshia giyega gia ima ya ha mavu. ⁴ Uvi gwa dile tangwa dia hageye dia lunga, Nzambi wa tumile Munenji, yonu wa butugile gwa mukhetu, yonu wa butugile mu njila ya shigo. ⁵ Wa kitile nganyi mukunda nu gu katula wanyi a khalele mu jinga mu njila ya shigo, mukunda tu tshiginiye ole ta ana. ⁶ Mukunda mudi mwa ana, Nzambi wa tumile Pheve ya Munenji mu mitshima yetu, Pheve yene idi mu kabuga egi; " Ndo Tata ". ⁷ Mukunda nu nganyi, mushi nji go mwa a higa, uvi mudi mwa ana, guma mudi mwa ana , nganyi mudi n'enwe mwa ana a gifugo mu njila ya Nzambi. ⁸ Uvi gu twama, mwa khalele khanji mu jiya Nzambi go, mwa khalele mwa a higa a wanyi a khalele athu a tu nzambi. ⁹ Henyaha mwa jiya Nzambi, nga ndo lulu ngagi Nzambi wa mi jiya mukunda nu ikhi mudi mu vutugila ndaga jia bola nu jia phashi jinyi jidi jia phamba phamba? Mwa tshigina genu gu vutugila gihiga? ¹⁰ Mudi mu talela ilumbu, nu sungi, nu mvula. ¹¹ Ngudi nu woma ha gumona egi gisalo mba tu kita nenu mba gi khala gia phamba ¹² Nga mi bondila enwe aphangi, kitugenu phila ngudi, mukunda nga kituga ole enwe. Mwa kitile go ata gima gia bola, ¹³ uvi mudi mu jiya egi mu mbala ya thomo nga mi longele sango ya bonga, ya khalele mukunda nu phete-phete ya mwila wenu. ¹⁴ Ata gifu gia mwila wami gia khalele gudi leza gu twama dienu mwa ngu bishidile go, nga ndo mwa ngu tunyile go, uvi ata nganyi mwa ngu yambele ole wanjio wa Nzambi, mu phila Kilistu Yesu mwene hakhenji. ¹⁵ Lulu ngagi lusagumunu lwenu ludigi? Mukunda nga jiya gu mi tela gi themwe egi, gula ya jiya gu salama, nga mwa di katudile meso ha gu ngu hwa nawo. ¹⁶ Lulu ngagi, nga kituga nga mbeni wenu mukunda ngu mu zwela ndaga gia masonga? ¹⁷ Gudi athu ako adi mu monesa gu kangama gwawo gu khanda yetu, uvi ishi go mukunda nu gu bonga gwenu. Adi mu tshigina gudi kapha nu eme mukunda mu a hate. ¹⁸ Idi ya bonga ha gu khala nu khenda gu ndaga jia bonga, ishi go kaka gula ngudi hene mu katshi diawo. ¹⁹ Enwe anami, ngu mu nji phashi jia gihanji mukunda nu enwe, ti nu tangwa Kilistu mba adi zalesa mu katshi dienu. ²⁰ Mba ngu tshigina ha gu khala hoho n'enwe tu zwelese ngu balumune phila ya gu zwela, mukunda ngu di nenu kiese. ²¹ Ngu lezenu,enwe mwa nu tshigina gu lemvugila shigo, mushi genu mu vwa go phila shigo idi mu zwela? ²² Mukunda ya sonegeye egi Abalayama wa khalele nu ana muyadi, mu moshi wa butugile gwa mukhetu wa muhiga, muko gwa mukhetu wa makwela. ²³ Ata nganyi, yonu wa butugile gwa muhiga wa khalele wa gi muthu, uvi yonu wa butugile gwa mukhetu wa makwela wa khalele wa laji. ²⁴ Ndaga jiji jia jiya gu tendugiya mu phila iko. Mukunda akhetu ene muyadi adi ole gu di visa gu yadi, gudi visa guko gu mu katuga gu mulundu wa Sinayi, gwene gu mu buta ana adi a higa, idi Agar. ²⁵ Lulu ngagi Agar udi mulundu wa sinayi mu ndinga ya arabe idi mu monesa Yelusalemi, mukunda wa khalele mu gi higa nu anenji. ²⁶ Uvi mukhetu yonu wa khalele wa makwela mwene udi ginetu. ²⁷ Mukunda ya sonegeye egi " khala mu kiese, eye mukhetu wa gikunya, eye ushi nu mona go; kabuga mu kiese, eye wa vile gaye go phashi jia gu buta, mukunda ana a vula adi a mukhetu wa bembeye gwa mulumienji adi a gu balega ana a mukhetu yonu udi nu yala mu moshi" ²⁸ Lulu ngagi, enwe aphangi, phila ya Izaki, mudi mwa ana a laji. ²⁹ Mu tangwa diene dinyi, yonu wa butugile mu luzolo lwa muthu, udi mu hwa yonu wa butugile lwa pheve phashi. Hene keti idi nganyi nji ti nu magino? ³⁰ Mikanda idi mu zwela ikhi? " Kaya mukhetu wa muhiga nu munenji. Mukunda muna mukhetu wa muhiga mba gwa zudi go gifugo hama ha moshi nu muna mukhetu wa makwela." ³¹ Hene, aphangi, tushi getu ta ana a mukhetu wa muhiga go, tudi ta ana a mukhetu wa makwela.