¹ Gu ndaga idi mu talela gisalo gia gu salela a santu, ishi gayo nu funu go ha gu mi sonegela. ² Mukunda ngu mu jiya luzolo lwenu lwa bonga, lunu ngu mu tuphudila phanga gwa a kilisto a gu Masedwane. Nga a lezele egi a phangi'ami a gu dimbo dia Akaya adi a yilama katuga mvula ya balegele ha gu hana makapho, enji ngolo jienu jia salesa athu a vula mu katshi diawo. ³ Nga mi tumila a phangi wawa, mukunda nu gudi kumisa gwenu gule gu khala ndo gwa phamba, enji mu khale mwa yilama mu phila nga zwelele. ⁴ Gula nganyi ndo, mba ikhala sonyi gietu nu gienu, mukunda aphangi wanyi mba tuza nawo mba adi mu mona egi mushi mwa yilama go. ⁵ Hene mukunda nu nganyi nga yindudile egi idi ya bonga ha gu mi tumila aphangi ha gu mi salesa mu khale mwa yilama nu makapho wanyi mwa yidigile ha gu a hwa mu phila mwa hagele laji, mukunda makapho ene a khalele a gu yidiga mu luzolo lwa bonga, uvi ishi mi gingolo-ngolo go. ⁶ Jiyenu egi: muthu yonu udi mu kuna khenyi gabiyo, mba udi mu hela nji gabiyo, muthu yonu mba ukuna khenyi jia vula, mba udi mu katula mabundu a vula. ⁷ Muthu mukima a hane mu phila a yindula mu mutshima wenji: konda gikenene nga ndo mukunda wa phushiya ha gu hana mu gingolo-ngolo, mukunda Nzambi wa nu tshigina muthu yonu udi mu hana nu kiese. ⁸ Nganyi Nzambi mba udi mu mi zalesela ima ya vula tangwa dikima, mba mu khala nu funu ya ima yene nganyi mba mu khale nu ima ya vula mukunda nu gisalo gia bonga. ⁹ Mu phila ya sonegeye egi: " Wa kaphele gimvwama gienji, wa gi hwile athu adi nu uphutu, mukunda gununga gienji gushi nu suga go. ¹⁰ Muthu yonu wa nu hana khenyi gwa muthu yonu wa nu kuna, nu gu hana dipha mukunda nu gudia, mba udi mu mi hwa khenyi ha gukuna, khenyi jene mba jidi mu kituga jia vula mukunda nu gununga gwenu. ¹¹ Mba udi mu mi kitula mwa vula gu ndaga jikima mukunda mba mu khale nu ima ya vula tangwa dikima mukunda nu mambote enu, nganyi athu a vula mba a vutula matondo gwa Nzambi. ¹² Mukunda gisalo gigi mudi mu kita gishi go kaka mukunda nu athu adi a santu, uvi gidi nji mukunda na athu ako a vula ha gu vutula matondo gwa Nzambi wetu. ¹³ Athu adi mu hana lukumu gwa Nzambi mukunda lusadisu lulu mudi mu hana, ludi mu monesa egi mwa nu lemvuga gu sango ya bonga mu phila mwa nu i zwela gu meso a athu akima, enji mukunda mudi mu a hwa nu athu ako makapho mu luzolo lukima. ¹⁴ Mu gutshigina gwawo mba adi mu mi lombela Nzambi mukunda Nzambi wa mi monesele gu bonga gwenji gwa vula. ¹⁵ Tu hanenu matondo a vula gwa Nzambi mukunda mwene wa tu hwile makapho enji a koma wanyi ta jiyile go gu mona phila ya gu tendula.