¹ Ta tshigina gu mi jiyisa enwe aphangi'a mala nu a akhetu ndaga jidi mu talela khenda jia Nzambi jidi mudi monesa mu dingumba dia Masedwane. ² Mu tangwa dia phashi, ata mu tangwa dia gu konda ima, athu ene a khalele nu kiese gia vula hene a hanele makapho a vula. ³ A hanele makapho mu giteso gia ima a khalele nayo, a hanele ima ya gu balega giteso mu luzolo lwawo. ⁴ A yandigile gu tu bondila mwa vula mukunda tu a hwe nswa ya gu hana makapho mukunda nu gu salesa a kilistu ako. ⁵ Ya khalele gu yituga gwa vula, mukunda adi hanele ha thomo ene ha khawo gwa fumu Yesu, nu gwa etwe mu luzolo lwa Nzambi. ⁶ Hene ta lombele gwa Tito ha guza a sale gisalo gienji mu phila a gi yandigile mwene hakhenji. ⁷ Uvi mu phila tudi mudi tuphula mu ndaga jikima, mu lukwikilu, mu guzwela, mu gu jiya, mu gudi hana nu mu phila mudi gu tu tshigina, hene khalenu mudi tuphula mu gisalo gigi gia bonga. ⁸ Ngu shi go mu zwela ndaga yiyi ha gu mi hwa mukwala, uvi mukunda nu gu mi salesa mu jiye phila athu ako adi mudi hana , enji mukunda nu gu phaga masonga a gu tshigina gwenu. ⁹ Mukunda mu jiye ikhi Fumu wetu Yesu a kitile mukunda nu etwe, wa khalele mvwama, uvi wadi kitudile uphutu mukunda nu enwe, mukunda mu uphutu wenji mu kituge mwa mvwama. ¹⁰ Ngu mu mi hwa malongi ha gu mi salesa gu ndaga yene; mukunda gwa balega mvula imoshi katuga hanyi mwa yandigile gu kita ndaga jia bonga. Mudi mwa athu a thomo ha gu kita gisalo giene, enji mudi mwa athu a thomo ha gu hwiya malongi wawa ha gu kita gisalo gigi. ¹¹ Hene tangwa didi manesenu gisalo ginyi mwa yandigile gu kita, nganyi luzolo lwenu lwa bonga lu kangame nu guwagana gunu mudi nalo. ¹² Mukunda gula luzolo lwa gu kita gisalo giene ludi gwene, idi ndaga ya bonga idi mu tshiginiya mwa bonga. Ha gu talela inyi muthu adi nayo, gula ndo ha gu konda gu talela ndaga inyi muthu a shi go nayo. ¹³ Mukunda ngu shi go mu tshigina gu monesa athu ako phashi, uvi ngu mu tshigina mu khale giteso gi moshi. ¹⁴ Mu tangwa didi mudi nu ima ya vula, mwa jiya gu salela athu wanyi a shi go nu gima, mukunda gilumbu ginyi mba mu konda gima, athu wanyi adi nu ima mba a jiya gu mi salesa. Nganyi khungienu akima mu khale giteso gimoshi. ¹⁵ Mu phila ya sonegeye egi: " Muthu yonu wa khalele nu ima ya vula gwa khalele nayo ya vula go; uvi muthu yonu wa khalele nayo gabiyo, gwa khalele mu konda gima go. ¹⁶ Hanenu matondo gwa Nzambi yonu wa hagele mu mutshima wa Tito luzolo lwa bonga lunu ngudi nalo, mukunda nu gu mi salesa. ¹⁷ Wa tshiginile ha gu kita ndaga inyi ta mu lombele ha gu kita, hene e jile mu mi vutugila mu luzolo lwenji. ¹⁸ Ta mu tumile nu phangi'etu mu moshi yonu mangumba etu akima adi mu hwa lukumu mukunda nu gisalo gienji gia gu longa ndinga ya bonga. ¹⁹ Ata nganyi wa phoneye gwa mangumba ha gu wenda nu etwe njila imoshi mu tangwa tudi muya mu kita gisalo ginyi gia bonga ha guhwa Fumu wetu lukumu, nu ha guta githemwe gia luzolo lwetu lwa bonga. ²⁰ Tudi mu kita mu phila ikima egi athu a konde gu tu tonga mu ndaga ya makapho a khenda a vula tudi mu zula ha gudi kaphela. ²¹ Tudi mu tshigina gu kita ndaga jia bonga gu meso a Fumu, nu gu meso a athu. ²² Ta a tuma mu njila nu phangi'etu mu moshi yonu ta monele gikhesa gienji mbala jia vula, udi mu monesa luzolo lwa vula adi nalo ha gu salesa athu. ²³ Mukunda nu Tito, udi phangi'etu ta nu kita nawo gisalo mukunda nu enwe. Mu ndaga idi mu talela a phangi'etu wanyi ako, adi athu a tumiye gwa mangumba ha gu leza lukumu lwa Kilisto. ²⁴ A monesenu gu tshigina gwenu, enji a monesenu egi kiese gi ta nu mu mi monesa gidi gia kielega.