¹ A phangi'ami nga tshigina, nga nu tshigina, laji dia tu teye, hene tudi wove ha gu bemba ndaga jikima jia nu bata ndaga jia bola mu mwila nu mu pheve yetu ha gu hata mambote mu njila ya gu gu vwa Nzambi woma. ² Kambenu phila ya gu tu haga mu mitshima yenu. Ta kitile getu athu ata gima gia bola go, ta zudile getu gima gia muthu go mu njila ya bola. ³ Ngu shi mu zwela nganyi go ha gu mi balela, mukunda ngu mu mi shishigisa egi ta nu mi haga mu mitshima yetu, ata tudi nu monyo nga ndo nu lufwa. ⁴ Nga nu mi hagela mutshima, ngu mu mi vila kiese gia vula, ata mu tangwa dienu dia phashi. ⁵ Ta khalele go nu tangwa dia gu hululuga tangwa ta kumile gu Masedwane. Ta monele phashi jia phila nu phila thembe jia zogele mukunda nu ndaga jene, nu gu vwa woma mu katshi dietu. ⁶ Uvi Nzambi wa nu hana gikhesa gwa athu wanyi a konda gikhesa, wa tu hwile gikhesa tangwa Tito a kumile, ⁷ hene ngu di nu kiese gia vula ishi go mukunda nu gu kuma gwa Tito, uvi mukunda nu phila ya gu mona phila mudi mu a hwa gikhesa. Tangwa a tu lezele phashi nu khenda nu ngolo mwa monesele mukunda nu eme. ⁸ Ata mushi go mu phashi mukunda nu mukanda unu nga mi sonegele, ata mukanda wene wa mi hwile phashi, nga mi monele phashi tangwa nga jiyile egi mukanda wene wa mi hwile phashi, khenda jenu jia khalele jia ga tangwa gabiyo. ⁹ Hene, ngu mu vwa kiese, ishi go mukunda nga mi hwile phashi, uvi idi mukunda phashi jene jia baludile mitshima yenu. Phashi jenu jene jia khalele jia ginzambi, hene mwa totesele go ata gima. ¹⁰ Phashi jia nu katuga gwa Nzambi jia nu balula mitshima wa muthu, jia nu bata muthu ha gu guluga konda gu mona phashi; uvi phashi jia haha hoshia mavu jia nu bata gu lufwa. ¹¹ Hene talenu tangwa didi phashi jia gi nzambi jia nu mi batela mabanza a bonga. Jia nu mi hwa gikhesa gia gu lwila ndaga jenu, mwa nu vwa khabu gula muthu wa mi kitila gima gia bola, mwa nu vwa woma, mwa nu vwa nji nzala ya gu ngu mona, mwa nu di hana gu gisalo, mwa nu tshigina gu hwa athu ndola gu ndaga jiawo jia bola! gu ndaga jiji jikima mwa nu leza egi mushi mu ji jiya go. ¹² Ata nga mi sonegele mukanda wuwu, nga u sonegele go mukunda nu muthu yonu wa kitile ndaga jia bola, to mukunda nu muthu yonu mwene a kitile gu bola, uvi nga u sonegele mukunda mu jiye mwa bonga bonga gudi hana gunu mwa di hanele gwa etwe gu meso a Nzambi. ¹³ Hene khalenu nu gikhesa. Tudi nu kiese gia vula tangwa ta vile egi Tito wa vile kiese mukunda nu gikhesa ginyi mwa mu hwile. ¹⁴ Nga mu lezele egi ngudi nu kiese gia vula mukunda enwe mwa ngu monesele sonyi go. Uvi tangwa dikima ngu mu mi leza ndaga jia masonga, phila imoshi ,ji ndaga jinyi ta lezele Tito jia khalele jia masonga. ¹⁵ Hene gu tshigina gwenji gwa nu mi tshigina gudi gwa vula, gula wa yindula mu phila mwa nu mu lemvugila nu mu phila mwa nu mu yamba nu woma ukima nu gidigima. ¹⁶ Ngudi nenu kiese gia vula mukunda nga jiya gu mi hagela mutshima gu ndaga jikima.