¹ Hene etwe athu tudi mu kita nu Nzambi, tudi gu mi bondila egi; mu totesa go mambote wanyi mwa zudile gwa Nzambi. ² Mukunda Nzambi u mu zwela egi; " Nga gu vile mu tangwa dia bonga, nga gu salesele mu gilumbu ginyi nga gu gulusele". Hene tala tangwa dia bonga dinyidi; magino gilumbu ginyi ta jiya gu guluga. ³ Ta tshiginile go ata muthu mu moshi a tu mone gifu mu gisalo gietu; hene ta jiyile go gu kita gima gia jiya gu hwa muthu phashi. ⁴ Uvi ta nu jiyisa gu ndaga jikima egi, ta nu salela Nzambi, ta nu kanga mutshima mu phashi jia phila nu phila. ⁵ Ta nu beteya nu gu ngidishiya mu bologo, a nu zola mubulu mukunda nu etwe; ta nu kita isalo ya phashi mbala jia vula ta nu mona go phila ya gu swama nga ya gudia. ⁶ Tudi mu jiyisa egi ta nu salela Nzambi mu mutshima wa phelegeta, mu jiya, mu gu kanga mutshima, mu mutshima wa bonga, mu pheve Santu, nu mu gutshigina gwa kielega, gwa giphangi, ⁷ mu malongi a masonga, nu mu ngolo jia Nzambi, nu gu khala nu phogo jia masonga ha mago. ⁸ Ta nu kita gisalo mu gu monesa lukumu, nu gu hana sonyi, mu gu zwela ndaga jia mambo, nu ndaga jia bonga. A nu tu fwanesa nu athu a luvunu uvi etwe ta nu longa ndaga jia masonga. ⁹ A nu tu fwanesa ole athu wanyi a jiya go ata gima, uvi wa tu jiya mwa bonga. Ta nu fwaneseya gifwa athu a fwa, uvi tudi athu a monyo. Ta nu hwiya ndola uvi ta nu fwa go. ¹⁰ Ta nu kita gisalo nu khenda, uvi ta nu khala mu kiese ilumbu ikima, ta nu monega ole asugami, uvi tudi ta mvwama; ta nu monega ole athu a konda gima, uvi tudi nu ima ikima. ¹¹ A phangi a gu dimbo dia Kolinto, tudi gu mi leza ndaga mu masonga, mu mutshima wa gu kangula. ¹² Ta mi swegele go ata gima gi moshi gidi gu mutshima wetu, uvi enwe mudi mu tu kangela mutshima. ¹³ Ngu mu mi sonegela mu phila ya nu sonegela ana mitumba. Khalenu mu tu tshigina mu phila ta nu mi tshigina. ¹⁴ Mu khala mu vugana go nu enya masumu mukunda keti gudi nu gima gia gu vugisa mu katshi dia masonga nu mambo? Keti gudi nu gima gia gu vugisa mu katshi dia mwanya nu phipha? ¹⁵ Ndaga khi Kilisto a jiya gu vugisa nu satana? ¹⁶ Phila khi akilisto a jiya gudi vugisa nu aphagano? Phila khi inzo-Nzambi ya jiya gu vugana nu ima ya itege? Mukunda tudi inzo ya Nzambi wa monyo, mu phila Nzambi a zwelele egi; "Mba ngudi mu jinga mu katshi dienu, gu wenda n'enu, enwe mba mu khala mwa athu ami. ¹⁷ Hene, zogenu mu katshi diawo, dikaphenu nawo, mu kwati go ima inyi idi ya bola, nganyi mba ngu mu mi yamba. ¹⁸ Mba ngu khala nga shawo, enwe mba mu khala mwa anami a mala nu a akhetu, Eme Fumu wa ngolo jikima wa zwela.