¹ Tudi mu jiya egi gula jinzo jetu jia haha ha mavu jia fwa, Nzambi mba udi mu tu hwa jinzo. Jinzo jene jia saleye go gu mago a athu, uvi inzo imoshi ya saleye gwa mwene hakhenji; inzo yene mba idi mu jinga mvula nu mvula. ² Tangwa didi tudi mu hima mu ngolo, mukunda tudi mu tshigina ha gu ngila mu inzo inyi idi mu tu nengela gosa. ³ Mukunda gula ta ngila mu inzo yene, mba tudi mu zula mwila uko. ⁴ Tangwa tudi mu jinga mu inzo yiyi ya tenta tudi mu hima, tudi mu dila mwa vula mukunda nu ginemo gigi gia phashi tudi mu bata. Tu shi mu tshigina go gu katula mwila wuwu wa hoshia mavu, uvi tudi mu tshigina gu sudiga mwila uko wa gosa holu diawo, mukunda monyo u minye unu mba u fwa. ⁵ Nzambi muthu udi mu tu yidiga mukunda tu khale nu monyo wa phila inyi, mwene nji muthu wa tu hwile pheve yenji ole gidimbu ginyi mba a tu hwa. ⁶ Hene khalenu nu gikhesa gia vula tangwa dikima. Tu jiyenu egi gula tudi mu jinga m katshi dia mwila wuwu, Fumu wetu udi mu khala gwa leha nu etwe. ⁷ Mukunda ta nu jinga go mukunda nu ndaga jinyi ta nu mona gu meso, uvi ta nu jinga mukunda nu lukwikilu lwetu. ⁸ Hene tu khalenu nu gikhesa gia vula, tu katugenu mu lujingu lwa mwila wuwu ha gu jinga phene-phene nu Fumu Yesu. ⁹ Gima gia thomo gi tudi mu tshigina gidi gu hwa Fumu'etu kiese, ata tudi nu mwila wuwu, ata ta ya mu khala n'enji phene-phene. ¹⁰ Mukunda khungi'etu akima tu feto ya mu monega gu meso a Kilisto mukunda mba a tu sambese; nganyi muthu mukima mba udi mu zula mabula wanyi a tesana nu ndaga mu phila ya gisalo a salele mu lujingu lwa gi muthu gienji. Gula wa kitile mwa bonga mba udi mu zula mabula a bonga; gula wa kitile ndaga jia bola, mba udi mu zula mabula a bola. ¹¹ Etwe tu feto jiya phila khi ya guvwa Nzambi woma; hene tu feto phaga ha gu longa athu ndaga jene. Nzambi u tu jiya mwa bonga bonga, hene ngu mu haga mutshima egi, mu mutshima yenu mu ngu jiya mwa bonga. ¹² Ndaga ginyi ta mi sonegela jishi go egi mukunda enwe mu tu tshigine nji; uvi ta ji sonega mu phila egi mu tu monele kiese. Nganyi mba tu jiye gu leza kiese gwa athu ako wanyi a nu mona kiese kaka gu ndaga jinyi jia nu monega gu meso, uvi a nu mona go kiese gu ndaga jia goshia mutshima. ¹³ Gula tudi ta athu a gilau idi mukunda nu Nzambi, gula tudi ta athu a ngindu jia bonga, ngindu jene jidi mukunda nu enwe. ¹⁴ Mukunda gu tshigina gwa nu tshigina Kilisto gwa nu tu yala, mukunda tu jiye egi muthu mu moshi yogu Kilisto wa file mukunda nu athu akima, hene idi mu leza egi athu akima a file nu mwene. ¹⁵ Kilisto wa file mukunda nu athu akima, mukunda athu wanyi adi nu monyo ale gu jinga ndo mukunda nu ene hakhawo, uvi a jinge mukunda nu Kilisto yonu wa file enji wa zugishiye gu lufwa gwa Nzambi mukunda nu enwe. ¹⁶ Katuga tangwa didi, gushi ata muthu mu moshi go tudi mu zula mu ngindu jia gi muthu. Ata ta khalele mu bagisa thomo Kilistu mu ngindu jia gi muthu, lulu ngagi tushi mu yindula nji nganyi go. ¹⁷ Gula muthu udi mu gimvuga nu Kilistu, wa kituga muthu wa pha; ndaga jenji jikima jikulu jia katuga, ndaga jia pha jeza mu yinga jinyi jikulu. ¹⁸ Ndaga jene jikima jidi mu katuga gwa Nzambi. Ha thomo ta khalele mbeni jia Nzambi, uvi mukunda nu Kilistu ta kituga ta kituga mafut'enji. ¹⁹ Mukunda nu Kilistu, ta kituga khungi'etu akima mafuta a Nzambi. Mwene gwa hatele go ndaga jia bola jinyi athu a kitile. Hene wa tu hwile gisalo gia gu jiyisa athu ako phila mwene a kitudile athu mafut'enji. ²⁰ Hene tudi mu mi leza ndaga jiji mu jina dia Kilistu ole Nzambi mwene hakhenji udi mu tu tuma ha gu mi longishila, mu jina dia Kilistu tudi gu mi bondila enwe mbeni jia Nzambi egi hwenu Nzambi njila a mi katule gimbeni gidi mu katshi dienji nu enwe, Mwene a mi kitule mafut'enji. ²¹ Kilistu gwa khalele go nu masumu, uvi Nzambi wa mu hwile ginemo gia masumu etu, wa mu hagele njila imoshi nu athu a masumu mukunda nu etwe. Yiyi ikima mukunda Nzambi a tu tshigine mu gimvuga nu Kilistu.