¹ Hene, mukunda tudi mu kita gisalo gigi mu khenda jia tu vile Nzambi, tu feto khala nu gikhesa. ² Etwe ta bishidile gale getu ndaga jia sonyi nu ginyi jia giswegi. Ta nu jingila getu ndaga jia mambo go, to gu katula ndinga ya Nzambi. Uvi lulu ngagi tudi mu monesa masonga, tudi mu monega mbandu ya athu a bonga gu meso a Nzambi. ³ Gula sango ya bonga inyi ta nu jiyisa idi ya gu tshiga, idi ya gu tshiga mu katshi dia athu a tota. ⁴ Nzambi wa haha ha mavu wa a shiyile meso a mabanza awo, wa nu gu a kanga njila ha gu konda gu tala gieji gieji gia sango idi sango ya lukumu lwa Kilisto yonu udi mu gifwanisu gia Nzambi. ⁵ Mukunda ta nu longa go athu sango yetu ha khetu, ta nu longa sango ya Yesu Kilisto, egi mwene udi Fumu, etwe tudi ta athu a gisalo mu gutshigina gwa Yesu. ⁶ Mukunda Nzambi muthu wa zwelele egi; " Mwinda u leme mu phipha", mwinda wene wa nu lema mu mitshima yetu, ha gu hana mweji wa gu hana mayele ha gu jiya lukumu lwa Nzambi, lwa nu monega gu phala ya Kilisto Yesu. ⁷ Uvi etwe athu tudi nu gimvwama gigi gia mabungu a wuma, a konda ngolo. N'etwe tudi nganyi mukunda nu gu jiyisa athu egi, Nzambi muthu udi nu ngolo jia vula uvi etwe ndo. ⁸ Tudi mu yangishiya mu phila ikima, uvi ashi mu jitshiga go ti nu hanyi ta jiyile go gu mona phila ya gu nyigana. Ta nu jiya go gima gia gu kita, uvi tudi kaka ta kanga mutshima. ⁹ Ta nu moneseya phashi, uvi Nzambi gwa nu tu bemba go tu mone phashi, a nu tu bishila hoshi mu mavu, uvi ta nu fwa go. ¹⁰ Tangwa dikima ta nu bata phashi jia lufwa jinyi Yesu a kutanele najio, mukunda lujingu lwa Yesu lwa nu monega mu mwila wetu. ¹¹ Etwe athu mu jinga tudi mu mona tangwa dikima lufwa gu meso mukunda nu Yesu mukunda lujingu lwa Yesu lu monane mu mwila wetu wa nu fwa. ¹² Hene mukunda nu nganyi, lufwa ludi mu kita gisalo mu katshi dietu, monyo nji udi mu kita gisalo mu katshi dienu. ¹³ Uvi tudi nu lukwikilu lwa giteso gi moshi mu phila ya sonegeye egi: " nga monesele lukwikilu hene ngu mu zwela". N'etwe nji ta monesele lukwikilu, hene tudi mu zwela. ¹⁴ Tu mu jiye egi yonu wa zugishile Fumu Yesu gu lufwa, mba udi mu tu zugisa n'enji njila imoshi, mba udi mu tu bata n'enu gu twama dienji. ¹⁵ Ndaga jiji jikima jidi mukunda nu mambote enu, mukunda mutshima wa koma u vule mukunda athu a vula adi mu hana matondo nu khembo gwa Nzambi. ¹⁶ Hene tu shi mu bembelela go, ata gi muthu gietu gia gonze gidi gia bola, uvi gi muthu gietu gia mu katshi gidi gia pha konso gilumbu. ¹⁷ Mu ga tangwa ga moshi, ga ndambu ga phashi gaga gadi gabiyo, uvi gadi mu tu hwa lukumu lwa mvula nu mvula, ludi lwa balega gu koma. ¹⁸ Tu shi nji go mu tala ima inyi ya nu monega gu meso, uvi tudi mu tala ima inyi ya nu la gu monega ndo. Mukunda ima inyi ya nu monega idi mukunda nu ga tangwa gabiyo, uvi ima inyi ya nu la gu monega ndo, idi ya mvula nu mvula.