¹ Keti ta yandiga ha gudi monesa etwe hakhetu? Ket tudi nu funu ya gu zula mikanda to gu mi leza mikanda idi mu zwela egi tu shi go athu a mambo? ² Enwe hakhenu mudi mwa mikanda yetu ya sonegeye mu mitshima yenu, athu akima adi mu jiya enji adi mu tanga. ³ Mudi mu monesa egi mudi mwa mukanda wene wa sonegeye go nu tinta, uvi wa sonegeye nu pheve ya Nzambi wa monyo, wa sonegeye go holu dia maseso uvi holu dia mitshima ya athu. ⁴ Ta nu haga mutshima gwa Nzambi mu phila yene mu njila ya Kilisto. ⁵ Tu shi mu zwela go egi ta jiya gu kita gisalo gigi mu ngolo jetu, uvi Nzambi udi mu tu salesa ha gu kita gisalo giene. ⁶ Udi mu tu salela ha gu khala athu a gisalo gia gudi visa gwa bonga, gu shi ya gu sonega go, uvi ya pheve mukunda wa sonegeye udi mu hana ndola ya lufwa, uvi pheve idi mu hana monyo. ⁷ Shigo jia sonegeye holu dia maseso, hene lukumu lwa Nzambi lwa monegele tangwa mwene a hanele shigo, hene athu a gu izalayele a monele go phila ya gutala Moyize gu meso mukunda wa khalele mu sema ole tshiya, gula nga shigo jene jia batele lufwa ya monegele mu lukumu lwa phila inyi, ⁸ uvi lukumu lwa gisalo gia pheve lwa balega lukumu lwa shigo ya koma. ⁹ Nzambi ya hwila athu ndola mukunda nu gisalo a salele mu njila ya shigo, mukunda gisalo giene gidi gia lukumu. Phila imoshi Nzambi wa nu tshigina athu mukunda nu gisalo ginyi gia gi pheve a nu kita, nganyi lukumu lwa gisalo gia pheve lwa balega lukumu lwa gisalo gia shigo. ¹⁰ Lukumu lwa lulu ngagi lwa balega lunu lwa thomo; hene tudi mu zwela egi lukumu lulu lwa thomo lwa khalele go lukumu lwa bonga. ¹¹ Gula gisalo gigi gia lukumu gia jingile go, jiyenu mwa bonga egi gisalo gia mvula yiyi gia balega ginyi gu lukumu. ¹² Etwe tudi givuvu mukunda ta nu salela masonga a vula. ¹³ Ta nu kita go phila Moyize a kitile, mu phila a khalele mudi tshiga mulele gu meso, mukunda ana a gu izalayele ale gu mona ndo phila lukumu lwenji lwa khalele mu katuga. ¹⁴ A khalele mu bagisa go, tii nu magino a shi mu jiya go ata adi mu tanga mikanda ya gudi visa gwa mwa leha, mukunda mulele wene udi kaka wa a kangama gu meso. Mulele wene wa jiya gu katuga gula muthu wa ngila mu gimvuga nu Kilisto. ¹⁵ Uvi ti nu magino ata adi mu tanga mikanda ya Moyize, mulele wene udi wa tshiga mitshima yawo. ¹⁶ Uvi gula muthu mumoshi wa balula mutshima gwa Fumu Yesu, mulele wene wa jiya gu katuga. ¹⁷ Mukunda Fumu udi Pheve, hama hadi pheve ya Fumu, ha nu khala mu ngemba. ¹⁸ Etwe akima tushi nu mulele wa gu tu tshiga gu meso go, etwe tudi mu mona lukumu lwa Nzambi, tudi mu balumuga nu gu zula gifwanisu gi moshi mu lukumu lwa giteso gi moshi kaka mu phila Fumu adi Pheve.