¹ Eme pholo, eme ha khami ngu mu mi bondila nu gudi bulumwisa mu mutshima wa bonga wa Kilisto. Eme muthu wa hima tangwa ngudi mu katshi dienu, uvi nga nu khala nu gikhesa tangwa ngudi gwa leha nenu. ² Ngu mu mi bondila tangwa ngudi mu katshi dienu, ishi nu funu go ngu khale nu gikhesa gia gu ngu phusa ngu kite ndaga mu gingolo-ngolo. Ngu mu jiya mwa bonga egi gula nga tshigina, nga jiya gu monesa ngolo jiami gwa athu wanyi a nu yindula egi, ta nu kita ndaga mu gi muthu. ³ Ata tudi mu wenda mu gi musunyi, ta jiyile go gulwa itumba ya gi musunyi. ⁴ Mukunda mata tudi mu lwila ita ashi go a gi musunyi, uvi adi mata adi nu ngolo jia Nzambi, mukunda nu gu bwisa ibagi ya luphango: nu gu shiya ngindu jia luvunu. ⁵ Ta nu bwisa nji ngindu jia luvunu jinyi jia nu kanga athu njila ha gu jiya Nzambi, enji ta nu kwata konso dibanza dia athu mu phila ya gu a twameza ha gu lemvugila Kilisto. ⁶ Tudi ta yilama ha gu hana ndola mukunda nu gu konda gulemvuga gwa phila ikima, tangwa mba mu monesa egi gu lemvuga gwenu gudi gwene. ⁷ Talenu mwa bonga ndaga jene mu phila jia nu monega gu meso, gula muthu mu moshi udi mu yindula egi mwene udi wa Kilisto, wa feto jiya egi n'etwe nji tudi ta athu a Kilisto. ⁸ Mukunda ata nga tshigina gudi zalula mwa vula mukunda nu giyega ginyi ta zudile gwa Fumu mukunda nu gu mi hwa gikhesa, uvi ishi go mukunda nu gu mi bwisa, ngu shi mu vwa sonyi go. ⁹ Nga nu tshigina gu monesa go egi nga nu kamba gu mi hwa woma gu mikanda nga nu mi sonegela. ¹⁰ Mukunda athu ako a nu zwela egi: " mikanda yenji idi ya khabu nu phashi, uvi gula tudi nawo haha wa nu khala wa leba, gu zwela gwenji gwa nu khala gwa leba. ¹¹ Muthu wa phila inyi wa feto jiya egi diswaswanu gu thugu mu katshi dia ndaga jinyi nga nu mi sonegela tangwa nga nu khala gwa leha n'enu, nu ndaga jinyi nga nu mi leza tangwa nga nu khala n'enu hama ha moshi. ¹² Mukunda ta nu di haga go ndonga imoshi, to gudi fwanesa nu athu wanyi ako a nu di kumisa ene ha khawo. Uvi a nu konda mayele a gu bagisa ndaga mukunda a nu di tesa ene ha khawo, a nu di fwanesa ene ha khawo, adi a unga. ¹³ Uvi, etwe ta jiyile go gudi zalula, uvi ngudi mu kita gisalo mu giteso ginyi Nzambi a ngu hwile tangwa a ngu hwile njila ya guza mu mi sanga gu dimbo dienu. ¹⁴ Etwe ta tshiginile go gudi zalula ata ha gu tala ginano gidi mu tu kapha n'enu, ha guza mu mi batela sango ya bonga ya Kilisto. ¹⁵ Hene tu shi mudi zalula go ha gu balegesa mudidilo wa tu hageye ha gu talela gisalo gia athu ako, uvi tudi mu yindula egi lukwikilu lwenu ludi mu kituga lwa ngolo, enji gisalo ginyi tudi mu kita gi mu kituga gia koma mu katshi dienu, ¹⁶ mu ndaga idi mu talela gu longa sango ya bonga mu membo a mu khanda jiko. Gunu tu shi mu tshigina go gudi zalula mukunda nu gisalo gia athu ako. ¹⁷ Uvi muthu yonu udi mudi zalula idi mwa bonga adi zalule mukunda nu Nzambi. ¹⁸ Mukunda Nzambi gwa nu tshigina go muthu yonu wa nu di zalula mwene ha khenji.