¹ Nga tshigina egi mu kange mutshima mukunda nu ga ndambu ga uzoba wami. Uvi eya ngu kangulenu mutshima! ² Mukunda ngu mu mi vila giphi, giphi giene gidi gia ginzambi, mukunda mudi mwa fwanana nu mona mukhetu yonu wa konda gu jiya mala. Mona mukhetu mwene, tudi mu mu longesa ha gu kwela yala mu moshi udi Kilisto. ³ Ngu mu vwa woma wa vula egi mwa tshigina gu zula ngindu jia bola, mu phila nioga ya dimbile Eva mu mayele a luvunu, ngindu jiene jia bola ji katula go masonga nu mambote gwa Yesu. ⁴ Mukunda, gula muthu mu moshi weza mu mi longa sango iko ya Yesu, inyi idi ya luswaswanu nu inyi ta mi longele, to gula mwa zula pheve iko ya luswaswanu nu pheve inyi mwa zudile to sango iko idi ya luswaswanu nu sango ya bonga inyi mwa longeye, mu feto kanga mutshima. ⁵ Mukunda ngu mu yindula egi a thumwa enu wanyi mudi mu mona egi adi a koma a ngu balegele go ata fioti. ⁶ Uvi ata tangwa diko, ngu jiya gami gu zwela ,wa bonga go, ngu shi nga konda mayele go; ta khalele mu mi jiyisa nayo mwa bonga-bonga mu phila nu phila. ⁷ Keti nga kitile disumu mu phila nga di bulumwishile mukunda enwe mu zule lukumu tangwa nga mi longele sango ya bonga ya Nzambi? Keti nga mi lombele falanga ? ⁸ Idi mu monega egi nga zudile ima ya imvuga iko ha guza mu mi salesa. ⁹ Tangwa nga khalele n'enu, nu phila nga kondele ima, nga khalele nayo funu, nga mi yangishile gami go egi nga mwa ngu hwi, mukunda nu aphangi wanyi a katugile gu Masedwane a ngu hwile ima ikima nga khalele nayo funu. Nga tshiginile go ngu khale ole nga ginemo gienu, enji ngu mu hata kaka ha gu kita kaka phila yene. ¹⁰ Mu phila masonga a Kilisto adi mu katshi diami, nga jiyile go gu bemba ha gudi zalula mu membo a gu khanda ya gu Akaya. ¹¹ Mukunda nu ikhi? Keti mukunda nga nu tshigina go? Nzambi udi mu jiya egi nga mi tshigina ¹² Eme, nga feto hata ha gu kita ndaga jia bonga mukunda ngu katule luvunu, gwa athu wanyi adi mu kamba gikuma gia gudi tesa n'etwe gu ndaga adi mu di zalula. ¹³ Mukunda athu wawa adi a thumwa a mambo, adi mu dimba athu gu isalo adi mu kita, nu gu zwela egi adi a thumwa a Kilisto. ¹⁴ Ishi go ndaga ya gu yituga, mukunda Satana mwene hakhenji wa nu di zalula egi udi wanjio wa nu bata mwanya. ¹⁵ Hene, ishi ndaga ya gu yituga go gula athu enji a gisalo adi mu dimba athu ako nu gudi zalula egi adi athu a kielega. Suga yawo mba idi mu fwanana nu isalo yawo. ¹⁶ Ngu mu zwela nji egi: gushi go ata nu Muthu mu moshi wa jiya gu yindula egi ngudi nga unga. Uvi ata mwa yindula nganyi, ngu tshiginenu ole muthu wa unga, mukunda n'eme nji nga nu di haga ole ngudi gami gabiyo. ¹⁷ Ndaga ngu mu zwela tangwa didi jishi mu katuga go gwa Fumu Yesu, uvi eme ngu mu zwela mu phila ya mwenya malwi. ¹⁸ Mu phila athu a vula adi mu di zalula mu gi musunyi,n'eme nji mwa bonga ngudi zalule. ¹⁹ Mudi mu tshigina ndaga jia bola, enwe mudi mwa athu a tema, a gingambi. ²⁰ Mudi mu tshigina athu wanyi adi mu mi haga ahiga, ata adi mu mi kapha, adi mu zula ima inyi mudi nayo, adi mu mi yegula, nga ndo adi mu mi beta mbata. ²¹ Ngu mu vwa sonyi ha gu zwela ndaga yene, mukunda ta jiya gu monana egi n'etwe ta kitile ndaga jiene, uvi gula muthu mu moshi udi mudi zalula gu ndaga jia nganyi, eme ngu mu zwela ole mwenya malwi, nganyi N'eme ngu feto gudi zalula. ²² Keti athu ene adi ba ebeleyo? N'eme nji nga mu ebeleyo? Athu ene adi enya gu Izalayele? N'eme nji. Adi mu gikanda gia Abalayama? N'eme nji? ²³ Adi enya gisalo gia Kilisto? Ngu mu zwela ole nga mwenya malwi, nga muthu wa gisalo gia Kilisto wa lunga, nga nu ngila mu bologo mbala jia vula, lufwa nga nu lu mona gu meso mbala jia vula ²⁴ Mbala ji tano bayuda a ngu kuphudile fimbu gu balega makumi a wana nu imoshi, ²⁵ mbala ji tatu a ngu kuphudile nu mitshi mbala; mbala imoshi a ngu betele nu maseso, mu masuwa ta bundugile mbala ji tatu, nga balegesele phipha imoshi nu gilumbu gi moshi mu muta wa koma; ²⁶ mbala nu mbala nga wendele membo nu membo, nga khalele mu gigonza gia vula mu muta wa koma, nu mu gigonza gia nzangi, nga monele phashi jia vula mukunda nu athu ami, nga khalele mu gigonza mu katshi dia dimbo, mu gigonza mu temu dia fufuta fufuta, mu gigonza mu muta wa koma, mu gigonza gwa aphangi wanyi a luvunu. ²⁷ Nga khalele mu gisalo gia vula mu katshi dia phashi, phipha jia vula jia konda tulo gu meso, mu katshi dia nzala nu luhungu, gwa konda gima gia gudia, mu katshi dia madidi, nu thowa konda mulele wa gu sudiga. ²⁸ Katula ndaga ginyi jikima jidi mu ngu yangisa, ilumbu ikima nga khalele mu vwa khenda mukunda nu imvuga ikima. ²⁹ Nanyi wa hwila, eme ngu konde gu hwila? Gula muthu wa phusa muthu muko ha gu bwa mu masumu, ngu shi mu mona phashi go? ³⁰ Gula nga di zalula, nga jiya gudi zalula gu ndaga jidi mu talela gu konda gikhesa giami. ³¹ Nzambi udi Sha Fumu Yesu, mwene ta feto kumisa tangwa dikima, udi mu jiya egi ngu shi mu mba mambo go. ³² Gu dimbo dia gu Damasi, fumu yonu wa khalele mu yala mu jina dia fumu Aretasi wa hagele athu a dimbo dienji ha mifulo ya dimbo ha gu ngu kwata tangwa dia gu zoga mu dimbo, ³³ uvi nga hageye mu katshi dia mulongo ha gu zoleya ha ga mufulo ga gibagi gia luphango, hene nga monele phila ya gu tusuga gu mago enji ngu lenge.