¹ Henyaha, Mwanjelo wa thano washigile phungi. Nga muenene themua ingoshi mubua hashi ha mavu. Ahanene muna saphi wa wina gudi mwene. ² Wa zuludile wina na mishi ya zogele gifua yanaza mu kelenge, Mwanya nu mihehe ya bwile bwi mukunda nu mishi ya khalele muzoga mu wina. ^{3 4} Gonze ya mishi, matulu a zogele nu ajile mubua ha mavu; a huue jingolo jiavula gifwa jia gaminyi-minyi hashi ha mavu. Awambelele matulu egi : << muyi go (ndo) mubolesa muangu ha mavu, nga mayiji, nga mutshi; uvi tshitshienu gubola gudi athu agasue ago ashigo nu ginyemeno gia Nzambi ha mbombo jiawo>> ⁵ Uvi mushiyi ndo nga muthu mumoshi, uvi amonesenu malamba ngonda ji tano. Uvi malamba awo mba akhala gifwa gu sumata gua gaminyi-minyi. ⁶ Mu masugu enyanyi, athu mba kamba gufua uvi mba afigo. ⁷ Matulu ene akhalele gifwa tubalu twa londewe mukunda nu gulua ita. akhalele mubata hamito yawo yima ya fwana ipho ya lutumbu, uvi phala jiawo jiakhalele gifua phala jia'athu. ⁸ Akhalele nu sanga gifwa dia mukhetu nu mazo gifwa khoshi. ⁹ Akhalele nu tuzagu gifwa tuzagu tua utadi; mahambu awo akhalele muhaga malungu gifua malungu lua phusu-phusu nu tubalu tumuya mulua ita. ¹⁰ Mikila yawo yakhalele gifwa minono ya gaminyi-minyi; nu mikila yawo, akhalele nu ngolo jia gutshita gubola gudi athu ha mutango ya ngonda jitano. ¹¹ Mwanjelo ya jinga nu benji wakhalele fumu yawo. Jina dienji mu Hebelu diakhalele Abadoni nu gelega Apoleyo. ¹² Gufua-mwila gua gudiangela guabalegele. Tala! gungima dia ndaga eji, gudi nu malamba ayadi adi hehi ha guza. ¹³ Mwanjelo wa samano, washigile phungi, nu ngavile dizui diakhalele muzoga mu mbinga jia gu giwetshielo gia wolo gine hene gutuama dia Nzambi. ¹⁴ Dizui dimu wambela muanjelo wa samano wakhalele nu phungi egi:<< Jitulula Anjelo muwana adi agujitshiga gu muta wakoma wa Efalata.>> ¹⁵ Anjelo muwana alondewe mukunda nu kumbi dinyinyi diago nu givo giene diago, akhalele agutuluiwa ha gushiya gitshinyi gimoshi gia thathu gia'athu. ¹⁶ Guv ula gua masuta (masalayi) ha gabalu 200 000 000. Ngavile guvula guawo. ¹⁷ Tadienu luholo tshi ngamuenene tubalu nu ago akhalele mukamata holu, gu nzoji: Mukaba wawa wakhalele wabenga gifua tshuiya, bule dila bulundundu, maji-maji. Mito ya tubalu ya khalele mito ya khoshi nu makano awo, guakhalele muzoga tshuiya nu mishi. ¹⁸ Athu gitshinyi gimshi ha luthathu ashiwe gudi mihehe yabola inyi itatu: Tshuiya, mishi nu mulege-lege wa tshuiya wakhalele muzoga mu makano awo. ¹⁹ Ndaga ya ngolo jia tubalu jiakhalele mu makano awo nu mikila yawo. Ngenyi mikila yawo yakhalele gifwa nioga nu yakhalele nu mito yakhalele musthila ene ha gunamenesa athu. ²⁰ Athu ago asalele, ago adile gushiyiwa ndo gu mihehe yabola inyi, abalumuinego mitshima yawo gu midimo yatshitshile ene, abembele go gukombelela ma diabulu nu ikhokho ya wolo, arza, blonze, seso nu mitshi; ima idi yajiyilego gumona, yajiyilego guvua nga guwenda. ²¹ Nu abembele nji ndo, gusthiya athu, wanga, uthambi nu unzangi.