¹ Gu ngima dia ima inyi, ngakhalele mutala, nu ngamuenele mufulo wa guhululu mu dilu. Dijui dia thomo dia zuelele gifwa lumbinga egi: " Kanduga haha, ngu gujijige ima iza mubwa gu ngima dia ima eyi." ² Muhugo dingoshi, nganginyile mu givule nu ngamuenele ngwasa ingoshi ya guhagewa gosa, muthu mungoshi wakhadi gale holu. ³ Yago wakhalele hene, wakhalele gifwa seso dia ndando, khongolo yakhalele mukhulo gifwa maseso andando. ⁴ Mukhulo ya ngwasa, guakhalele jingwasa jiko makumi ayadi nu muwana, athu agukola makumi ayadi nu muwana akhalele ha ngwasa jinyi, asudiga gale milele ilaphe nu ipho ya wolo gu mito. ⁵ Ha ngwasa hakhalele muzoga tshiya nu myandu gifwa mvula, nu jikhuba. Myenda sambadi yakhalele nu tshiya gu tuama dia ngwasa. Myenda inyi idi mujijiga ivule sambadi ya Nzambi. ⁶ Nu nji gu tuama dia ngwasa guakhalele nu muta ujima, ula kedi-kedi gifwa nganza. Sambwa nu sambwa dia ngwasa guakhalele nu ima ya monyo yazala meso gutuama nu gungima. ⁷ Gima gia monyo gia gudiangela giakhalele gifwa khoshi, gia ngiadi gifwa muna ngombe, gia thathu giakhalele nu phala ya muthu nu gia nguana giakhalele gifwa njila ya nduwa idi muzuga. ⁸ Ima ya monyo yagasue iwana, yakhalele nu mahambu asamano ( 6 ) azala meso nu holu nu mukatshi. Yakhalele muzuela phipha mwanya, guhena ndo egi: " Musantu, musantu, musantu, udi Fumu yetu nu udi Nzambi yetu. Mwene wabalega ima yagasue, mwene udi, wakhalele nu mba ukhala." ⁹ Kumbi diagasue ima ya monyo yakhalele mutumbwisa, nu gunemesa, nu guhana hamba dia hana gudi yago wakhalele ha ngwasa, nu udi nu monyo ivo nu ivo, ¹⁰ athu agukola anyi makumi ayadi nu muwana akhalele mufugama ha mabongo gutuama dia yago udi nu monyo ivo nu ivo. Akhalele musona ipho gutuama dia ngwasa nu guzuela egi: ¹¹ "Udi watagana, aye Fumu yetu nu aye Nzambi yetu, ha guzangula lukuma, ginemwa, nu ngolo. Ndaga ya, wafugile ima yagasue mu gutshigina guaye, yagasue yafugiwe nu idi guene.