¹ Nga talele nu nga monele mona phanga wa magana holu dia mulundu wa Siyona. Wa khalele nu 144 000 ago akhalele nu jina dienji nu dia Shienji agusonega ha mbombo. ² Ngavile diji dimoshi dia mudilu dia khalele gigfwanegesa nu malungu a mita ya koma nu ya gukuma gua mvula gua bala. Lungu lwo ngavile gifwanegesa nji nu lungu lwa ashigi a lungungu adi mushiga ma lungungu awo. ³ Akhalele muyimba lungimbo luheluhe gutwama dia gife gia ufumu nu gutwama dia athu muwana nu athu agukola. Holu dia 144 000 ago sumbiwe mu gifutshi, gushi nu muthu ndo walunga gulonguga lungimbo luene. ⁴ Ene anyi adi athu atunyile gu tshita uthambi nu akhetu mukunda akhalele ndo nu uthambi. Adi athu amuhata mona phanga gwagaswe gadi muya. Adi athu asumbiwe mu gifusthi gifwanegesa nu mabundu a gilanga athomo gwa Nzambi nu mona phanga. ⁵ Gushigo nu mambo ndo mu kano diawo; Adi ashigo nu gubola. ⁶ Nga monele angelo muko umuzuga gosa, wa khalele nu mbimbi ya bonga luheluhe ya ivo nu ivo ya gutela ago adi mujinga ha mavu, gua membo agaswe, ikanda, mazuelelo nu thundu. ⁷ Wa kologele nu diji dia kola egi: << Khalenu nu woma gua Nzambi nu gumu tumbuisa, mukunda kumbi dia gulumbwilisa dieja. Mukombelelenu, wago wa fugile dilu, mavu, nzadi nu misulu ya mita.>> ⁸ Mwanjelo muko, mwanjelo wa giyadi wakhalele mu zuela egi: << idi ya gubwa, idi ya gubwa Babilona yakoma yago yakhalele mu twameza gifutshi giagaswe ha gunwa matombe a gisemo giabola.>> ⁹ Mwanjelo muko, wa gitatu, wa tombele (landudile) nu guzuela nu diji dia koma: < muthu mumoshi wa kombelela shitu nu gifwanegesa nu wazula njimbu ha mbombo nga ha koko, ¹⁰ mba unwa nji matombe a khabu jia Nzambi; matombe alondewe nu ambiwe akonda gufutudiwa mu tshopo dia khabu. Muthu umu nwa matembe ene mba ukhala mu phashi mu tshiya gutwama dia amwangelo enji a santu nu gutwama dia mona phanga. ¹¹ Mishi ya gusagesewa yawo imu kanduwa masugu agasue a konda gisugishilo nji ashi no guhuluga ndo phipha mwanya, enya gukombelela shitu nu gifwanegesa gienji, nu muthu yagasue udi nu njimbu ya jina dienji. ¹² Yeyi idi guhunguluisa ha gudindamana mu guhuima gua ago adi asantu, ago adi mutumaga gua gutuma gua Nzambi nu gutshigina mu Yesu.>> ¹³ Mu dilu, nga vile diji dimuzuela egi: << Sonega ngegi, guzela mila gukhale gudi athu agufwa, ago adi mufwa mu fumu Yesu.>> givule giazuela egi: << Ayi>>, << Hagula egi ahuluguge mu midimo yawo, ndaga ya midimo yawo mba idi gu'alandula.>> ¹⁴ Nga talele nu nga monele tuta dimoshi dila phe holu dienji hakhalele nu muthu wa khalele wadifana nu muna-muthu, wa khalele nu gipho gia lutumbu gia wolo hodia muto wenji nu phogo ya mazo ha koko dienji. ¹⁵ Henyaha mwangelo muko wazogele monjia nzambi wa tamegele yago wa khalele holu dia tuta mu diji dia kola: < phogo ya mazo yaye sendesa gu muna kumbi dia gumuna dia heta, ndaga mbuto ja hamavu ndaga jidi ja guhiya.>> ¹⁶ Luengyelu, yago wa khalele hashi godia tuta wa sonene lukengo lwenji hodi dia mavu mu mavu a muniwe nga akatshiwe. ¹⁷ Mwangelo muko wa zogele mu inzo ya Nzambi mu dilu, wa khalele nji nu phogo ya mazo imoshi. ¹⁸ Muko wazogele gudi haneno gia milambu; muko wa khalele nu huminini holu dia tshiya, wa zuelele mbimbi ya kola gua angelo yago wa khalele nu phogo ya mazo : << Sonona phogo yaye ya mazo nu batata vino ya hamavu: ndaga mabundu enji adi aguhiya.>> ^{19 20} Mwanjelo wa sonene phogo ya mazo yenji ha mavu nji wa bungishile nu yi vino ya ha mavu nu wa sonwene gumuna mu nzungu ya koma ja khabu ja Nzambi. Nu nzungu ya zogele gonze ya dimbo dia masamba, nu mahatshi a bundugile nu gufwa twa tubalu holu dia gisthini gia mavu gifwa gukoma nu gu heha 1600.