¹ Guyi guene gunu gudi muza gutenda nu gutuna gudivua mukatshi dienu? Ishigo mu ngena ya mila yenu idi muluisa ita gu idiando yenu ba? ² Mudi mulula nu mushigo nayo. Mudi mushiya nu mudi nmulula, uvi mushigo muatagana ha guheta. Mudi mulua nu mudi mutenda enue nu enue. Mushigo nu gima mukunda muanalomba ndo. ³ Mudi mulomba nu mushigo muhuya mukunda mudi mulomba muabola, ha gutagenesa nyuma yenu. ⁴ Mudi thambi! Mushigo mujiya egi ufuta nu mavu udi umbalagaji nu Nzambi? Muthu yago udi mutshigina gukhala futa dia mavu udi gudihaga mbalagaji ya Nzambi. ⁵ Nga ndo mudi mutangiza egi mikanda idi muzuela phamba hago idi muzuela egi: << Givule giambiwe mukatshi dietu gidi diago nu giphi? >> ⁶ Uvi Nzambi udi muhana ngasa yabalega gubonga, idi mukunda mikanda imuzuela egi: << Nzambi wanatuna enya gudihala, uvi muene wana hana ngasa gudi athu atagana. >> ⁷ Dihanienu diago gudi Nzambi, tunyienu diabulu nu muene mba ulenga gualeha. ⁸ Suenenu gudi Nzambi nu muene mba usuena gudi enue. Wovienu mago enu, enya gubola, nu balumunienu mitshima yenu, enya mambo. ⁹ Khadienu nu malamba, khadienu nu gikeya-keya, dilenu! Egi gulela guenu gubalumuge mu mafua nu kiese gienu mu gikenene. ¹⁰ Dibulumunienu gutuama dia Fumu, nu muene mba umithuphula. ¹¹ Aphanji'ami a mala, muzuedigo muabola mukunda nu athu ako. Muthu udi muzuela muabola mukunda nu phanji'enji ya yala, nga udi musophesa phanji'enjin ya yala milonga, udi muzuela muabola gudi mikhuala nu udi musambesa mikhuala. Gula udi musophesa milonga gudi mikhuala, ushigo muthu udi mutala mikhuala, uvi udi nzuji. ¹² Muthu mumoshi udi muhanyi ya mikhuala nu nzuji. Muene udi muene hakhenji watagana ha guhuluisa nu ha gushiya. Aye nanyi, aye udi musophesa phanji'aye milonga? ¹³ Venu, enue muanazuela egi: << Mangino nga hamene mba tuya gu dimbo dinyi, mba tutshita mvula imoshi guene, mba tutshita gusumba nu gudiga guene nu mba mba tuheta luendu. >> ¹⁴ Nanyi udi mujiya yago mba iza hamene nu monyo wenji mba ukhala gikhuatshi? Ndaga mudi gifua mbundu idi muzoga mukunda nu kumbi dimoshi nu idi mutota hangima. ¹⁵ Muajiya guzuela egi: << Gula Fumu watshigina, mba tujinga nu mba tutshita ndaga gaphanda. >> ¹⁶ Uvi luenyelu, mudi gudihala nu ndaga jienu mualondi jia gudishimanesa. Gudihala guagasue gua luholo lunu gudi guabola. ¹⁷ Ngenyi, muthu yago wajiya gutshita gima giabonga nu gula muene gitshitshilego hanyi watshita gubola.