¹ Aphanj'ami a mala, gukhadigo nu alongi avula mukatshi dienu. Tudi mujiya egi mba tukhala yagusophesewa muavula. ² Ngenyi, tudi mubua mukuta yetub yagasue mu maluholo avula. Gula muthu mumoshi gabuilego mu guzuela guenji, muene udi muthu mumoshi watagenesa gukula, watagana ha gujidisa nga muila wenji wagasue. ³ Hago tudi muhaga munengu gu kano wa tubalu mukunda nu gutujidisa, tuajiya gutuameza mila yato yagasue. ⁴ Tadienu nji mawato akoma, nga adi gawo akoma nu fundji yakola idi gualutula, adi mukhala agutuamezewa gudi gagituamezelo mu gutshigina gua mubati. ⁵ Luholo lumoshi luene nu dimi didi gidiando guazonda gia muila, uvi diene didi gudihala nu ima yakoma. Tala, tshuya tuazonda tuajiya gukonda temu dia mundu. ⁶ Dimi didi nji tshuya, mavu amoshi abola, ahagewe mulatshi dia idiando yeto. Didi mubolesa muila wagasue nu didi mulonda monyo. Didi diene hakhadio diagukondewa gudi gufua gushigo nu gisugishilo. ⁷ Shitu jiagasue jiamufoto, tunjila, minyanyela nu ima yagasue yafugiwe idi mu meya idi yagutuamezewa nu yatuamezewe gudi muthu. ⁸ Uvi gushigo nga muthu wajiya guhana tuameza dimi. Idi gubola gunu tuajiyilego gujidisa, didi diazala nu ndikila ya gufua. ⁹ Nu dimi, tudi mutumbuisa Fumu udi Shetu, nu nu dimi tudi mushinza athu afugiwe mu gifuanegesa gia Nzambi. ¹⁰ Nu dimi dmoshi diene gudi muzoga ima yabonga nu ima yabola. Aphanji'ami a mala, ikhadigo ngenyi! ¹¹ Musulu umoshi wene wajiya guhana meya abonga nu meya alula ba? ¹² Mutshi wa figie, aphanji'ami a mala, wajiya guyima mabundu a figie nu mabundu a vino ba? Meya amungua ajiyilego nji guhana meya abonga. ¹³ Nanyi mukatshi dienu udi ngambi nu watema? Adijine lujingu luabonga mu midimo yenji mu gudibulumuisa mu ungambi. ¹⁴ Uvi gula mudi nu giphi gialula nu matangi abola mu mitshima yenu, mudi hadigo nu mumbigo mambo gudi giamatshidia. ¹⁵ Ungambi ou ushigo muza gosa, uvi udi wa hamavu, ushigo wa unzambi uvi udi wa givule giabola. ¹⁶ Ndaga ya hagifundo gidi giphi nu matangi, hene nji hadi hagufutula nu ima yagasue yabola. ¹⁷ Uvi ungambi wagosa udi watuluga ha gisendeselo, hangima udi watagana, wabonga, gibungishilo, wazala nu jikhenda, bundu diabonga, ushigo nu mitshima iyadi nu udi wagiamatshidia. ¹⁸ Bundu dia giamatshidia didi diagukunyiwa mu guhuima mukatshi dia athu ago adi mukamba guhuima.