¹ Aphanji'ami a mala, mukhuatigo gutshigina gua Fumu yetu YESU KILISTO, Fumu ya lutumbu, nu gutshitshila ukaphumunyi gudi athu ako. ² Zangudienu gifua muthu mumoshi wangina mukatshi dia ekelejiya yenu yagusudiga luphete lua wolo nu yagusudiga milele ya ndando nu phutu imoshi yangina nji yagusudiga milele ya masanji. ³ Gula watala muthu udi yagusudiga milele yagubalega gubonga nu wazuela egi: << Ditumbige haha ha gifundo giabonga, >> uvi wawambela phutu egi: << Aye, magana mumolu hanyi, >> nga ndo, << Ditumbige ha malu ami. >> ⁴ Mushigo gudisambesa milonga enue hakhenu? Muabuilego nzuji nu matangi abola? ⁵ Venu, aphanji'ami a mala aguzumba, Nzambi aphonenego phutu jia ha mavu ha gukhala amonyi mu gutshigina nu phingua jia ufumu wago udi mukunda nu athu adi gumutshigina ba? ⁶ Uvi enue mudi musebulula phutu! Ishigo amonyi adi gumimuenesa malamba? Ishigo ene adi gumibata gu isambeselo ba? ⁷ Ishigo ene adi mushingana jina diabonga diago mudi mutshigina? ⁸ Ngenyi, gula udi mutagenesa mukhuala wa ufumu mu luholo yasonegewe egi: << Mba utshigina mukhenu gifua aye hakhaye, >> udi mutshita muabonga. ⁹ Uvi gula udi mutala jiphala jia athu, udi mutshita gubola, nu udi yagushiyiwa milonga gudi mikhuala. ¹⁰ Ndaga muthu yagasue watumaga gudi mukhuala, khuta wabua mu luholo lumoshi, udi mubua muenya gukulula mikhuala! ¹¹ ndaga muthu yago wazuelele egi: << Mba utshitshigo uthambi >> wazuelele nji egi << Mba ushiyigo. >> Gula watshitshilego uthambi nu gula washiya muthu, udi mubua muenya gukulula mikhuala. ¹² Ngenyi zuelenu nu tshitenu gifua athu ago mba akhala yagusambesewa mu mikhuala ya ukhaledi. ¹³ Ndaga gusophesewa milonga gudi muza gushigo nu jikhenda mukunda nu athu ago ashigo nu jikhenda. Khenda jidi mubinga gusophesewa milonga. ¹⁴ Aphanji'ami a amala, itshi idi yabonga gula muthu wazuela egi udi nu gutshigina uvi muene gashigo nu midimo? Gutshigina guene guajiyilego gumuhuluisa, ¹⁵ Gula phanji'a yala mumoshi nga phanj'a mukhetu mumoshi wasudiga muabola nga gashigo nu madia a lusugu. ¹⁶ Zangudienu gifua mumoshi ya mukatshi dienu wamiwambela egi: << Nda muabonga, khala gu tshuya nu kuta. >> Uvi enue nu gumuhana ndo nga gima gimoshi gidi nu funu mukunda nu muila, idi yabonga gu itshi? ¹⁷ Luholo lumoshi luene nu gutshigina, gula gushigo nu midimo, gudi guafua. ¹⁸ Muthu mumoshi wazuela nji egi: < nu gutshigina nu ame ngudi nu midimo. >> Ngudijine gutshigina guaye gushigo nu midimo nu ame nji ngugudijine gutshigina guami mu midimo yami. ¹⁹ Udi mutangiza egi gudi nu Nzambi, udi mutshita muabonga. Uvi nga ene ivule yabola idi mutshigina nu idi mudigita. ²⁰ Umutshigina gaye mu guheya, egi gutshigina gushigo nu midimo gudi guagituhu ba? ²¹ Shetu Abalahama gakhalelego yagumuenewa mu midimo yenji hago muene ahanene munenji Izaka? ²² Wamona giwa egi gutshigina guanawenda nu midimo yenji nu mu midimo, gutshigina guana kula diago. ²³ Ngenyi idi mutagenesa yago isono muzuela egi: << Abalahama watshiginyine gudi Nzambi nu ngenyi yamuhuwe mu giamatshidia >> Ngenyi Abalahama watamegewe egi futa dia Nzambi. ²⁴ Udi munona egi idi mu midimo yenji muthu wanakhala yagumonuewa, nu eshigo khuta gutshigina. ²⁵ Luholo lumoshi luene nji, thambi Lababa wakhalele yagumuenewa mu midimo yenji hago azanguile ngenji, nu walengesele mu njila iko? ²⁶ Ndaga, gifua muila ushigo nu monyo udi wagufua, gutshigina nji gushigo nu midimo gudi guagufua.