¹ Luenyelu, enue mudi amonyi, dilenu nu khadienu nu gikeya-keya mukunda nu malamba adi gumijila. ² Umonyi wenu udi wafukha nu milele yenu idi yagudiwa gudi uhua. ³ Wolo wenu nu falanfa jienu jidi nu ukelengenye. Ukelengenye udi muta uthemua wenu. Mba uminya thumba jienu gifua tshuya. Muatuti umonyi wenu mukunda nu masugu agisugishilo. ⁴ Tala, gishimbigo gia enya mudimo udi mukolologa (gishimbigo ginyi muakhuatele gia enya midimo akhalele mukatula mbuto mu ilanga yenu.) Nu gukolologa gua enya midimo akhalele mukatula mbuto guaheta gu matshui a Fumu ya masuta. ⁵ Muakhalele hamavu mu luholo luabalega gubonga nu muadihanene gu gubalegesa. Muazalesele mitshima yenu yagubalega gubola. ⁶ Muashiyile milonga nu muashiyile enya giamatshidia. Amiluishigo. ⁷ Khadienu nu guhuiminyina, aphanji'ami a mala, unu guza gua Fumu. Tadienu, mudimi wana kinga mabundu abonga a mavu. muene wana kinga nu guhuiminyina unu mvula ya thomo nu mvula ya gisugishilo. ⁸ Enue nji, khadienu nu guhuiminyina. dikolesenu mitshima ndaga guza gua Fumu gudi hehi. ⁹ Mukhadigo nu gudinyemenena aphanji'ami a mala, enue nu enue, hagula egi mba mutune gukhala yagusophesewa. Tadienu, nzuji wamagana ha mufulo. ¹⁰ Aphanji'amin a mala, zangudienu gifua njila yaguhata malamba nu guhuiminyina gua azueledi andaga jiagutuama ago azuelele mukunda nunjina dia Fumu. ¹¹ Tadienu, tudi muzangula ago adi mudindamana gifua adi aguzela mila. Muavile azuelele mukunda nu gudindamana gua Yobo nu muajiya luholo Fumu adi nu gisemo nu kikhenda. ¹² Aphanjiami a amala, mutigo mukumbu nga mu dilu, nga mu mavu, nga mu muzo uko. Uvi, << ai >> guenu gukhale << ai >> nu << Ndo >> ikhale << ndo >>, ngenyi, mba mubuigo mu gisambeselo. ¹³ Mukatshi dienu gudi ni muthu udi mubalega mu gilolewa ba? Akombelele. Gudi nu muthu udi musuanguluga ba? Ayimbe ngimbo jia lutumbu. ¹⁴ Gudi nu muthu mukatshi dienu udi mundala ba? Atamege akulub a ekelejiya alombe Nzambi mukunda nu muene. Amuwase maji mu jina dia Funu. ¹⁵ Gulomba gua gutshigina guana saga akhashi nu Fumu mba umuzugisa. Gula watshitshi gubola, Nzambi mba udi gumuvila jikhenda. ¹⁶ Tshiginyenu gubola guenu enue a enue nu lumbienu Nzambi mukunda nu enue nu enue, hagula egi mukhale yagusagewa. Gulomba Nzambi gua muthu watagana gudi nu ngolo jiavula. ¹⁷ Eliya wakhalele muthu gifua esue. Walombele Nzambi hagula egi mvula inogigo nu mvula yanogelego ha mavu unu mvula jitatu nu mbewu jisamano. ¹⁸ Nu Eliya walombele Nzambi hugo diko. Dilu diahanene mvula nu mavu abutile mabundu. ¹⁹ Aphanji'ami a mala, gula muthu mumoshi ya mukatshi dienu wamizola honze ya giamatshidia, muthu muko amuvutule, ²⁰ Ajiye egi muthu yagasue wavutula muenya gubola mu njila yabonga, mba uhuluisa monyo wenji nu mba utshuga gubola guavula.