¹ Luenyelu, gu itudi muzuela idi yeyi: Tudi nu Fumu ya ahanyi a milambu yago wakhalele hashi gu koko gua madia holu dia gifue gia ufumu mu madilu. ² Udi mutshitshi wa mudimo mu bugu dia usalame gikombelelo giadiango giago Fumu, nu gashigo muthu ya gumagesewa. ³ Mukunda nu fumu yagasue ya ahanyi a milambu udi yaguhagewa ha gudijiga mu gutshigina milambu nu misomo. Na idi yatagana ha gukhala nu gima gia guhana mulambu. ⁴ Luenyelu, Gula KIlisto wakhalele hashi ha mavu, gakhalelego mulonyi wa milambu ya yagasue, ndaga ya gudi nu ahanyi a milambu mu luholo lua mikhuala. ⁵ Wana kuatesa gifua gifuanesa gia givule gia ima ya mudilu. Idi diago gifua Mose wakhalele yagujiyiwa gudi Nzambi gula udi hehi ha luholo lua gutunga Gikombelelo: << Tala >>, idi guzuela gua Nzambi: << Egi udi nayo yagutsgita ima yagasue mu luholo luago lua guwambelewe holu dia mulundu. >> ⁶ Uvi luenyelu Kilisto wazanguile mudimo wakoma udi holu ndaga ya udi nji kongo dia ufuta wabonga yago yahagewe holu dia malaji abonga. ⁷ Ndaga ya ufuta wowu wagudiangela wakhalelego yabonga ( yatagana) ha gukamba luko ufuta uko wa ngiadi. ⁸ Na hago Nzambi gasengumuine gujimbila gua iphuta, wazuelele egi: << Tadienu, masugu adi muza, (guzuela gua Nzambi) guhe-guhe nu inzo ya ya Isalele nu inzo ya enya Yuda. ⁹ Mbaikhadigo gifua ufuta ( gindongo) guago gu ngatshitshile nu akhakhawo lusugu luago lu ngakuatele ha koko mukunda nu gu azola mu mavu a enya Ejibitiya. Ndaga ya adindamenego mu ufuta (udivua) nu ngahagelego nga atasho angoshi gua ene>> ¹⁰ << Ndaga ya tala ufuta wago umbangudivua n u inzo ya enya Isalele luenyelu masugu awa, >> muazuelele Fumu . << Mbanguhaga mikhuala yami mu mitshima yawo, nu mbangusonega nji mu mitshima yawo, mbangukhala Nzambi yawo nu mbakhala giphuta giami. ¹¹ Mbalongesago muthu nu muthu phanjienji nga muthu yago udi hehi nu muene muzuela egi: "Jiya Fumu", ndaga ya agasue mbangujiya sendese gu adi azonda unu gu adi agukula, mukatshi diawo. ¹² Ndaga ya mbangukhala muenya khenda gu ndaga jiawo jidi jishigo jiagiamatshidia nu mbanguwunguluga go gubila guawo. >> ¹³ Mu guzuela egi : << Muhe-muhe >>, wavutshile ufuta wagudiangela wabua ukulu. Nu wago wazuelele muene egi ukulu udi hehi nu gutota.