¹ Luenyelu nga guene gudivua guago gua ufuta wagudiangela guakhalele nu luholo ludi mutala gukombelela nu bugu diago diagijila dia hashi hamavu. ² Ndaga gikombelelo giakhalele giagulondewa. Sugu ya gudiangela muago muakhalele bugu diaguhaga gima gia guhaga tshuya, gihagelo nu dipha dia gudihaga diatamegewe egi bugu dia usalame. ³ Nu gungima dia mulele guakhalele nji bugu diago diakhalele mutamegewa egi sugu ya bugu dia usalame. ⁴ Yakhalele nu mesa a wolo mukunda nu mananashi. Guakhalele nji nu mushete wa ufuta wago wudi wagesue wa wolo mukatshi dienji nu mane, muhango wa Alona wakhalele muhaga yaji nu gihagelo gia ima ya ufuta. ⁵ Holu dia mushete wa gudivua (ufuta), Angelo ya mbuta adi mukunda nu lutumbu atshigile ivule-vule yawo bugu di tuajiyilego gukotolesa muabonga mu itshinyi. ⁶ Gu ngima dia gula ima yeyi ikhale ya gulondewa, ahanyi a milambu akhalele mungina gu lusugu n u lusugu mu sugu ya gudiangela ya gikombelelo ha gutshita mudimo wawo. ⁷ Khuta atshitshi a mudimo wa Nzambi akhalele mungina mu susgu ya ngiadi hugo dimoshi gu givo, uvi ndo gula gushigo mahatshi a guhanewa mulambu, mukunda nu muene nu mukunda nu gubolaguago gudi gua iphuta. ⁸ Givule giabonga wadijigile egi njila ya bugu diabalega usalame diakhalele go diaguzuluwa ha gumona egi gikombelelo giagudiangela giegi. ⁹ Yeyi yakhalele gifuezegeselo gia ndaga jia luenyelu. Milambu nu misomo yago yahanewe ishigo yagutagana ha gubongesa matangi a muthu wabonga gutumbuisa Nzambi. ¹⁰ Akhalele mutangiza khuta ima ya gudia, mataombe nu ima ya luhilo nu luholo lua gubuishiwa abonga. Yakhalele mikhuala ya uthu yasonegewe unu hadi mukhuala uhe-uhe mbauzoga ha bugu. ¹¹ Kilisto wajile gifua Fumu ya ngambi jia Nzambi mukunda nu ndaga jiabonga jiajile wabalegele holu dia inza ya koma nu ya bonga ya Nzambi yago yatshitshiwe nu mago aathu idi ishigo ya enya ha mavu afugiwe. ¹² Yakhalele go mukunda mahatshi a jikhombo nu jingombe, uvi mukunda nu mahatshi enji hakhenji luhololuanginyine mu bugu diago biabalega gubonga diago dishigo nu gubola hugo dimoshi mukunda nu guhana guhuima mukunda nu muhuluishi wetu ya mayilago nu malilago. ¹³ Ndaga ya gula mahatshi a jikhombo nga jingombe jia alume nu gumba uto wa gana ga saba yabuile gale yabola ya ihaga mu luholo gudi Nzambi mukunda nu guwovewa gua uthu wawo, ¹⁴ Mahugo guvula gutshi mahatshi a Kilisto ago mu Nyuma wa mailago wadihanene muene hakhenji nga tona dimoshi ndo dia gubola gudi Nzambi mbauwovua matangi etu amidimo ya gufua ha gutshitshila Nzambi yago udi nu monyo? ¹⁵ Mukunda nu ngenyi udi kongo dia ufuta (gindongo) uhe-uhe. Ndaga ya gufua guanginyineha gukatula (guzola) ago akhalele goshia ufuta wago wagudiangela mu gubola guawo, ago akhalele agutamegewa azanguile laji dia uhanganyi wa ivo nu ivo. ¹⁶ Ndaga ya hago hadi uhunganyi idi yatagana ha gujiya gufua gua muthu yago waitshitshile. ¹⁷ Ndaga ya uhinganyi wa muya udi nu ginemua khuta gula guakhalele nu gufua mukunda nu guajiyilego gukhala nu ginemua gula yago walondele guene you luko nu monyo. ¹⁸ Nu, gula gudivisa guagudiangela guahagewe mahatshi ndo. ¹⁹ Ndaga ya hago Mose gahanene gutuma nu mukhuala gudi thundu yagasue, wazanguile mahatshi a ana a ngombe nu a khombo nu meya, uvuji wakhalele muhenya nu izophe, nu wa imbile mu hugo dingoshi mukatshi dia thundu (giphuta) ²⁰ Nu wazuelele egi: << Yei idi mahatshi a ufuta wago guahanene Nzambi mukunda nu enue. >> ²¹ Mu luholo luene lumoshi, wa nogesele mahatshi holu dia gikombelo nu holu dia yengua (malonga nu tshiopho) yagosue yago yakhalele mutshitshiwa mudimo wa Nzambi ²² Nu nji mu luholo lua mikhuala, tuajiya guzuela egi yagasue idi ya guphelegesewa nu mahatshi. Gula gumbiwa gua mahatshi gutuhu nu giviwa gua khenda gutuhu. ²³ Ngenyi yakhalele yabonga hagula ifuanesa ya ima ya gosa ikhale ya guwovewa nu mulambu ya saba. Hazonda ndo, ima ya gosa yene hakhenji idi nayo yagukhala ya guago guabalegela. ²⁴ Mukunda nu Kilisto ganginyinego mu bugu diagubalega gyila diago didi gifuanesa nu muago a athu diago. Muenyemo, waile gosa ha gula amuenege luenyelu mu Nzambi mukunda nu enue. ²⁵ Ganginyinego mukunda nu gudihana muene hakhenji mahugo avula gifua (luholo lumoshi nu) fumu ya ahanyi a milambu yago wana ngina mu bugu diago dia balega usalame ivo yagesue nu mahatshi a muthu muko. ²⁶ Gula yakhalele ngenyi, na yakhalele yatagana ha muene gumona dilamba mahugo avula unu gua sendesele gugugiwa gifutshi (mavu). Uvi luenyelu idiya giamatshidia hugo dimoshi gu gisugishilo gia ndaga jiagasue luholo luago luazuelewe mukunda nu gumanesa gubola gu mulambu wenji diago. ²⁷ Muthu yagasue udi nayo yagufua hugo dimoshi gu ngima gudi muza gilumbulushilo. ²⁸ Mu luholo luene lumoshi, KiIisto nji, yago wahanewe ha gukatula gubola mu mahugo avula amuenegene lusugu luko luangiadi, ndo mukunda nu gulonda jindaga jia gubola uvi mukunda nu guhuluga gua ago anagumunengena nu guhuminyina.