¹ Hene, Tubembienu mbimbi ya gusendeselo ya Kilisto, nu tsiyenu gu mbimbi ya gukula. Tu hagindo gishina gia gubalumuna gua mitshima gu midimo ya gufua mu gutshigina gua Nzambi. ² nga fondashio ya malongo a mukunda nu gubatijiwa, nga guhagewa mago, nga guzugishiwa gu gufua nu gusophesewa gua ivo nu ivo. ³ Mba tutshita nji ima yagasue gula Nzambi wayitshiginisa. ⁴ Ndaga gushigo nu luholo khuta gudi ago a jiyile gale nu alolele gale guhua gua mudilu, ago akhalele mafuta agivule giabonga (niuma yabonga), ⁵ nu alolele gale guva mbimbi ya Nzambi nu gu ngolo jia jingolo jidi muza, ⁶ uvi abuile; gushindo nu luholo lua guvutula ha gubalumuna mitshima. Yeyi mukunda nu ahagele luko ha mutshi wa gudikikisa muna Nzambi muene hakhenji, nga amubuishile gifua gima gia musonyi mukatshi dia athu agasue. ⁷ Ndaga mavu adi muzangula meya amvula idi munoga holu dienji nu adi mubuta mitshi idi ya tagana ya kuniwe, idi muzangula luendu nu guzela mwila gudi muza gudi Nzambi. ⁸ Uvi gula abuta misomo nu miya adi mukamba gushinjiwa. Mba asugishiwa gumbiwa hajigo. ⁹ Ngatudi muzuela nganyi, mafuta ami, tuajiya ima yabonga idi mukunda nu guhuluga. ¹⁰ Ndaga Nzambi gashigo muthu yago gashigo mukunda nu hagula midimo yenu nu guzumba gu mudi nago mu jina dienji gu yago wumutshitshile mudimo gua enya gutshigina nu khadienu guatshitshila. ¹¹ Nu tudi muzumba diago egi muthu yagasue mukatshi dienu adijine midimoya luholo luagushimana unu gisugishilo, mukunda nu gudifelela gua gutshigina guavula. ¹² Tuatshiginyinega egi mudibuise imonya (athu ashigo nu ngolo ), uvi mukhale ago adi muteta ago adi ahinganyi a malaji mukunda nu gutshigina nu muguhuminyina. ¹³ Ndaga ya ha hagele Nzambi dienji-dienji (ahanele dilaji) gua Abalahama, wadilogele muene ndaga gajiyilego gudiloga nga mu jina dia muthu muko walegela gukoma gudi muene. ¹⁴ Udi muzuela egi : << mbanguhana guzela muila nu mbanguvudisa diago ago adi gu ngima diaye nga mu giphuta giaye.>> ¹⁵ Mu luholo ngenyi, Abalahama a wazanguile yago yamutendelewe gu ngima dia guhuminyina. ¹⁶ Mukunda nu athu ana gudiloga mu jina dia muthu muko yagon udi wabalegela gukoma gudi ene. Gu gisendeselo gia gudinyonga guawo guloga guawo gudi gabatshia-kano gawo mu guditendelela guawo. ¹⁷ Hago Nzambi gadilongesele ha gudijiyisa diago ahinganyi a laji, luholo lua gishina gia ndaga yenji, waditendelele nu ginyemeno gingoshi. ¹⁸ Waitshitshile ha gula gu ima yei iyadi idi ishigo gu yago idi yakola ha Nzambi gumba mambo (guhuiga) esue ago tualengele gu gibandemeno tukhadienu nu ngolo jiakola ha gudindamana mu gudifelela guago guahagewe gutuama dietu. ¹⁹ Tudi nu gudihana guakola gua diago nu gua mu monyo wetu, gudihana guago gudi mungina mukatshi gu ngima dia gijidigilo. ²⁰ Yesu wanginyine mu bugu diene diangenyi gifua muenya gu sagesewa mukunda nu esue, nu wabuile fumu wakoma wa mulambu mukunda nu masugu agasue (ivo nu ivo) gifua muazuelele Melshisedeki.