¹ Mukunda nu ngenyi tudi nayo gutshita atashio ha gula egi nga mungoshi gajiyilego gudifula, ha guheta gu laji diago diatuhagewe, ha gungina mu guhuguga gua Nzambi. ² Mukunda nu longo diedi dia bonga diatuwambelewe gifua gudi ene. Uvi longo diene diahetelego gudi ago akhalele go agudibungisa mu gutshigina nu ago atumagele. ³ Ndaga ya esue tuatshiginyine, tudi esue hakhetu mbatungina mu guhuluga guene, gifua mu idi ya guzuelewa egi: << Gifua mungadilogele mu khabu jiami, mbanginyi go nga luholo tshi mu guhuluguga guami.>> Nga idi ngenyi, midimo yenji yatshutshile yatagenesewe mu mufundashio ya mavu agasue. ⁴ Ndaga ya wazuelele bugu diko mukunda nu lusugu lua sambadi: << Nzambi wahulugile mu lusugu lua sambadi gu midimo yenji yagasue.>> ⁵ Udi muzuela luko egi: << Mbanginyi go nga luholo tshi mu guhuluguga guami.>> ⁶ Mukunda nu ngenyi, ndaga gudi ako ahagewe mu luzelevu ha gungina mu guhuluguga guenji nbu ndaga ya enya Isalele avula avile lukuma luabonga anginyinego mukunda nu gushaga guawo, ⁷ Nzambi wahagele luko lusugu lumoshi (lungoshi), ludi mutamegewa egi << mangino >> gu ngima dia masugu avula, wakhalele muzuela mu jina dia Davidi gifua mu yazuelewe gutuama egi: << Mangino, gula muavua mbimbi (dijui) yenji (dienji) mukolesago mitshima yenu. >> ⁸ Mukunda nu gula Yosuwe wahuile guhuluguga, Nzambi gakhalelego nayo guzuela ha ndaga ya lusugu luko. ⁹ Mukunda nu ngenyi gudi luko guhuluga mu lusugu lua sambadi luhagewe mu luzelevu mukunda giphuta gia Nzambi. ¹⁰ Mukunda yago udi mungina mu guhuluga gua Nzambi, wahulugugile mu guluguga gua midimo yenji gifua yakhalele egi Nzambi nji wahulugugile mu midimo ya muene yagowu. ¹¹ Ngenyi tusagaledienu ha gungina mu guhuluguga guenji ha gula muthu gabuigo mu luholo lua lua gushaga guahetele ene. ¹² Ndaga ya lukuma lua Nzambi ludi nu monyo, idi nu ngolo jiavula nu idi yabala mazo gifua phogo ya khusa (mazo khanda nu khanda). Yidi muzawuga unu ha gukhaphumuna monyo nu muhehe nu malongo nu musunyi. Idi nu ndunge jia gukaphumuna matangi nu mutshima nu gutangiza. ¹³ Gushigo nga gifugiwe gimoshi giajiya gukhala giagudisuega gu phala ya Nzambi. Uvi gima giagasue gidi gifua yago mbaulumbuiluisa. ¹⁴ Ngenyi ndaga ya tudi nu Fumu wabalega gukoma wazawugile mudilu, Yesu muna Nzambi, tudindamanyenu mu gutshigina guetu. ¹⁵ Ndaga ya tushigo nu fumu muko yago wahanene monyo wenji mukunda nu esue nu yago wajiya gutuzuelela mukunda nu guleba guetu, uvi tudi nu muthu muko yago wa luholo luagasue, khuta gashigo nga gubola. ¹⁶ Tusuenyenu nu gudifelela gu gifuegia ngasa hagula tuajiya guzangula khenda jienji mu guheta ngasa yenji yajiya gutukuatesa mu hugo diago tuajiya gukhala nayo ndaga.