¹ Kilisto watukudile ha guzoga mu uhiga. Mukunda nu ngenyi, khadienu nu ngolo, mudibembi ndo mosha ginemo gia ndaga jiabola. ² Tadienu ame Paula, ngudi gumiwambela egi gula mudi munginyishiwa mukanda, Kilisto gashigo gumikuatesa nga gu gima gimoshi ndo. ³ Ngudi gumiwambela luko egi, yago udi gudinginyisa mukanda, udi nayo gutshitshila mikhuala. ⁴ Mudi ya gudikhaphumuna nu Kilisto, khungi yenu agasue mudi mu mikhuala. Mushigo nu guzela muila. ⁵ Ndaga ya, mu givule nu gutshigina, tudi munenga guhaga mutshima mu giamatshidia. ⁶ Mu Kilisto, nga mukanda, nga wene uthondo ushigo nu ndaga ndo. Uvi khuta gutshigina mu midimo ua guzumba idi mutalewa. ⁷ Muakhala muza muabonga phushi, nanyi wamimagesa ha gula gutumaga ndo gu giamatshidia ? ⁸ Matangi a gutshita ngenyi ashigo muza gudi yago wamitamegene. ⁹ Ndambo ya gihemba gia mapha, giana jimbisa mapha. ¹⁰ Ngudi gumuhagela mutshima mu Fumu Yesu egi mushigo muza mutangiza mluholo luko. Yago udi gumitunganesa nga udi nanyi, udi gudibatela gufua guenji hakhenji. ¹¹ Anetu, gula ngudi mulonga luko ndaga jia mukanda mukunda natshi ngudi luko musagesewa ? Gula ngenyi seso dia goshi ya mutshi wa gudikikisa dia katudiwe. ¹² Ngatangiza egi, ago adi gumibata mu gubola akatuge nga akatudiwe mukatshi dienu ¹³ Ndaga ya anetu, Nzambi gamihagelego ahiga, uvi khuta gubuisa ndo luholo lununu gafundo ga guzogela ha gukhalela ndaga jia muila. Uvi dikuatesenu mu guzumba. ¹⁴ Ndaga ya mikhuala yagasue idi mulungagana mu mukhuala umoshi egi << Zumba mukuenu gifua mu wazumba muila waye >>. ¹⁵ Gula mudi gudisuma nga giditshaguta enue-enue, jiyenu egi mba mudikhapha enue-enue. ¹⁶ Ngudi muzuela egi wendenu mu givule nu mba mushigo muhata iheho ya muila. ¹⁷ Ndaga ya iheho ya muila yana gudivua ndo nu givule, nu iheho ya givule nji yana gudivua ndo nu iheho ya muila. Adi ya gukhaphumuga, hene, muajiyilego gutshita ndaga ji muatshigina gutshita. ¹⁸ Uvi gula givule gidi gumituameza, mushigo gosha mikhuala. ¹⁹ Luenyelu midimo ya muila idi ha phelo. Idi: ²⁰ Uthambi, unzangi, wanga, mambo, umonya, giphi, ²¹ gukuatewa matombe, gudia gua giphi, gukhaphumuna ikombelelo, ukhongo nu ndaga jiko jiabola. Ngudi gumiwambela egi athu anyi adi mutshita ndaga jinyi jiagasue, mba gashigo muhinyina ufumu wa Nzambi. ²² Uvi givule gidi mubuta guzumba, gusuanguluga, ²³ Guhuiminyina, gubonga gua mutshima, gudikanda. Gushigo nu mukhuala udi mutuna ima yeyi. ²⁴ Athu a Yesu-Kilisto ahagele muila nu iheho ya muila ha mutshi wa gudikikisa. ²⁵ Gula tudi mu givule, tuwendenu nji mu givule. ²⁶ Tukhadigo enya lutumbu lua gukamba malungu nu guvila ima yangane nzala.