¹ Ngudi muzueala egi hadi muhinganyi galenge nga wazonda, udi muhiga nga tshima udi fumi'ya ima. ² Uvi udi musala nu gutumaga gudi iledi nu atuameji a ima unu ha kumbi dia hagele shenji. ³ Esue nji luholo lumoshi luene, ha tuakhalele ana, tuakhalele mu ufumu wa ima ya ha mavu. ⁴ Uvi hadi kumbi dia tagana, Nzambi watuma munenji, wabutshiwa gudi mukhetu mu mikhuala, ⁵ watshitshile ngenyi ha gukula ago akhalele gonsha mikhuala, ha gula egi tutshigine egi udi mona. ⁶ Ndaga ya mudi ana, Nzambi watumine givule gia munenji mu mitshima yetu, givule giago gidi mukologoga egi << tata >>. ⁷ Mukunda nu ngenyiu mushigo luko ahiga ndo, uvi mudi ana, nu gula mudi ana, ngenyi mudi ahinyinyi gudi Nzambi. ⁸ Uvi gudiangela ha muakhalele gujiya gale Nzambi ndo, muakhalele ahiga a' athu adi gashigo Nzambo ndo. ⁹ Uvi luenyelu ha muajiya Nzambi nga ha muajiyiwa gudi Nzambi, mukunda na'tshi mudi muvutuga gu mikhuala ya gudiangela nu ya phashi ( lamba )? Muatshigina gukhala luko ahiga? ¹⁰ Mudi mukengelela masugu, ngonda jihe-jihe, sungi nu ivo. ¹¹ Ngudi nu woma mukunda nu enue egi mudimo wami nu enue ukhale wa gituhu. ¹² Ngamibubila anetu ha gukhala gifua ame ndaga ya ame nji ngabui nji gifua enue. Mua ngutshitshilego gubola nga gumoshi ndo. ¹³ Uvi mudi mujiya egi mu hugo dia thomo di nga mitele lukuma lua bonga, yakhalele mukunda nu guhola gua muila. ¹⁴ Nga tshima muila wami wakhalele wabola mukunda nu enue, uvi muangubishidilego, muangutunyilego, muanguzanguile gifua muanjelo wa Nzambi, hako gifua muene Yesu-Kilisto diago. ¹⁵ Guzela muila guenu gudi gui? ndaga ya ngajiya guzoga uthemua egi, nga yakhadi yabonga, muakhadi nayo gulohola meso enu munguhui. ¹⁶ Luenyelu ngabua mbalagaji yenu n,daga ya ngamiwambela Giamatshidia. ¹⁷ Gudi nu ako adi gumizanguila dishinda nga guminginyila uvi ishigo mukunda nu gubonga guenu. Adi mukamba gumikhaphumuna nu ame, hagula muye nu gualandula. ¹⁸ Idi yabonga gukhala nu nzala ya ndaga jia bonga, uvi ikhadigo khuta gula ngudi hene. ¹⁹ Ana'mi, ngudi luko muvua misongo ya gubuta mukunda nu enue, unu gunu Kilisto gakhala mukatshi dienu. ²⁰ Ngazumba gukhala hene luenyelu nu enue, nu gubalumuna dijui, ndaga ya ngudi ya gudibinda ha ndaga yenu. ²¹ Nguwambelenu enue muana tshigina gukhala gosha mikhuala, muana vua ndo yanuzuela mukhuala ? ²² Ndaga ya idi ya gusonegewa egi : << Habalahama wakhalele nu ana muyadi, muko nu mukhetu ya muhiga, muko nu mukhetu udi gashigo muhiga. ²³ Nga idi tshima ngenyi, yago wabutshiwe gudi muhiga wakhelele ngenyi gu muila, uvi yago wabutshiwe gudi mukhetu udi gashigo muhiga wakhalele ngenyi mu laji. ²⁴ Ndaga eji jia jiya gukotelesewa mu luholo ngegi: ndaga ya akhetu wawa muyadi adi gifua gudivisa mahugo ayadi, gua thomo gudi muza gu mulundu wa Sinayi, nu gudi mubuta ana adi ahiga. Idi Agala ( Aggar ). ²⁵ Luenyelu Agala udi mulundu wa Sinayi gu Alabiya ( Arabie ) nu udi mujijiga Yelusalema ya luenyelu ndaga ya udi mu uhiga nu anenji. ²⁶ Uvi Yelusalema yago idi gosa mudilu, gashigo muhiga nu muene ginetu. ²⁷ Ndaga ya idi ya gusonegewa egi : << Suanguluga gikunya, aye ushigo nu ana; Mba miyelele aye wadile guvua gaye ndo misongo ya gubuta. Ndaga ya nana a mukhetu wabembewe abalega nana a mukhetu udi nu yala, guvula. >> ²⁸ Luenyelu enue anetu, mudi gifua Izaki, mudi ana a gitendelelo. ²⁹ Mu hugo dinyi, mona yago wabutshiwe gu muila wasagesele yago wabutshiwe mu givule. Idi nji ngenyi mangino. ³⁰ Itshi idi ya gusonegewa? << Kaya mukhetu ya muhiga nu munenji ndaga ya muna muhiga gajiyilego guhinyina nu muna mukhetu udi gashigo muhiga. >> ³¹ Ngenyi anetu, tushigo ana a mukhetu ya muhiga ndo, uvi tudi ana a mukhetu udi gashigo muhiga.