¹ Galatiya athu a gituhu, nanyi wamilowele? muenyomo idi gumona guabonga gua Yesu-Kilisto wahagewe ha mutshi wa gudikikisa wamimuenesewe! ² Ngatshigina gujiya yeyi gua enue. Muazanguile givule gibonga gu midimo ya mikhuala nga ha gutshigina gu imuavile? ³ Mudi athu a gituhu? muasendesele gu givule giabonga ha gumanesela ndaga jia mila. ⁴ Mua muenene malamba gifua mudi mujiya, gujiya gua gituhu, gula diago gujiya gua gituhu? ⁵ Luholo lumoshi nu yago wamihuile givule giabonga nu yago watshitshile ndaga jia koma mukatshi dienu udi mutshita mukunda nu midimo ya mikhuala na muguvua nu gutshigina? ⁶ Gifua: << Habalahama watshiginyine gua Nzambi nu ya mutshiginyishiwe mu giamatshidia >>. ⁷ Jiyenu egi ago adi mutshigina adi ana a Habalahama; ⁸ Isona yadiangele guzuela egi Nzambi mba uzuelela miphaganyi mukunda nu gutshigina. Lukuma lua bonga lua longesewe gutuama gudi Habalahama. << Mukunda nu aye iphuta yagasue mba ikhala nu guzela muila.>> ⁹ Mukunda nu ngenyi, ago adi nu gutshigina adi nu guzela muila nu Habalahama yago udi nu gutshigina. ¹⁰ Ago adi mudifelela mukunda nu mudimo wa mikhuala, adi gosha gushiyiwa, ndaga yasonegewe egi gushinyiwa: << gushinyiwa gudi nga nanyi udi gashigo mu luholo gifua yasonegewe mu mukanda wa mikhuala, nu gashigo mu itshitshila. >> ¹¹ Luenyelu idi diago ya gujiyiwa egi Nzambi mba gazuelelago muthu mukunda nu muikhuala ndaga: << Agiamatshidia mba akhala nu monyo mukunda nu gutshigina guawo.>> ¹² Mukhuala ushigo muza gu gutshigina, uvi : << Yago udi mutumaga mu ima yeyi yagasue ya mikhuala mba ukhala nu monyo mukunda nu mukhuala.>> ¹³ Kilisto watusumbile mu gushinyiwa gua mukhuala, habuile muene gushinyiwa mukunda nu esue, ndaga idi ya gusonegewa egi << akhale ya gushinyiwa yagasue udi ya gujitshigiwa gosa' mutshi.>> ¹⁴ Gishina giakhalele egi guzela muila guakhalele gudi Habalahama guajiya guza gudi aphagano a mu Kilisto Yesu mukunda nu wajiya guzangula malaji a givule ( nyuma ya bonga) mukunda nu gutshigina. ¹⁵ Anetu, ngudi muzuela mu luholo lua uthu. Gifua muazanguwa muthu gu mudimo ( gudivisa nu muenya mudimo), nga muthu mumoshi ndo wajiya gukatula laji dia Nzambi nga gumulezela nga itshi iko. ¹⁶ Luenyelu malaji ahanewe gudi Habalahama nu gudi agasue adi gungima dienji ( nga gukunda dienji). Yazuelewego egi: << gudi agungima dienji >>, gufuezegesa gudi avula; gudivisa nu muenya mudimo (nga guzanguwa gu mudimo)khuta muthu mumoshi gudi mungoshi << muenya mudimo waye >> udi Kilisto. ¹⁷ Luenyelu ngudi muzuela yeyi, ufuta udi wagujiyiwa diago gudi Nzambi wajiyilego gumuenewa watunyiwa gale gudi mukhuala wago wayile mu givo gia 430 gu ngima dienji. ¹⁸ Ndaga ya gula uhinyinyi wajile mu luholo lua mukhuala, wajilego mu luholo lua laji dingoshi, uvi Nzambi wahanene diago uhinyinyi gudi Habalahama mu luholo lua laji dimoshi. ¹⁹ Mukunda nu itshi mukhuala wakhalele guene? Wakhalele wagulundjiwa holu mukunda nu malamba unu gumuenega gua enya mu hungu dia enya Habalahama yago laji dia hanewe nu mukhuala wambiwe wazuelewa gudi Anjelo mu luholo lua kongo ( ngambi ). ²⁰ Luenyelu kongo nga ngambi udi munginyisa gubalega gua muthu mungoshi, muenyomo Nzambi udi mumoshi. ²¹ Ngenyi mukhuala udi mutuna malaji a Nzambi ? diago ndo ! ndaga ya gula mukhuala umoshi udi watagana guhana monyo wahanewe, giamatshidia giakhalele nayo guza mukunda nu mukhuala wene. ²² Uvi gusonega guatshuigile yagasue gosha gubola. Ngenyi laji dia Nzambi haguyuhuluisa mu gutshigina guetu mu Yesu-Kilisto guahanewe gudi ago atshigina. ²³ Uvi gutuama dia gula egi gutshigina mu Kilisto Yesu guze, tuambiwe mu bologo nu mubambewa gudi mukhuala unu gumuenega gua gutshigina. ²⁴ Ngenyi mukhuala wajile gifua mubambi wetu unu guza gua kumbi dia Kilisto ha gula wajiya guzuelela mukunda nu gutshigina. ²⁵ Luenyelu hadi gutshigina guene, tushigo luko gosha mubambi. ²⁶ Ndaga ya mudi agasue ana a Nzambi mu gutshigina mu Yesu-Kilisto. ²⁷ Enue agasue mua batijiwe mu Kilisto, mua sudigishiwe Kilisto. ²⁸ Gushigo nga muyuda nga muenya Geliga, nga muhiga nga udi gashigo muhiga, nga yala nga mukhetu ndaga ya mudi agasue muthu mungoshi mu Kilisto-Yesu. ²⁹ Gula mudi enya Kilisto na mudi enya hungu nga giphuta gia Habalahama, ahinyinyi mu luholo lua laji dienji.