¹ Ivo kumi nu iwana ngavutugile luko gu Yeluselema nu Barnabas ngabatele nji Tito. ² Ngakandugila mukunda nu gudimuenegesa gua Nzambi gudi ame munguwambela ha guya. Ngawambelele mulongesa mukatshi dia muphanyi, uvi ngakhalele muzuela gifua lukuma ya gudisuega gu meso a athu akoma ago akhalele mutuameza. Ngakhalele mutshigina guya egi ngushigo muya nu gulenga (guzula phushi) nga guya ndo egi ngakhadi mulenga phushi jiagituhu. ³ Nu muene Tito futa diami muenya Gelega (Grec) wakhalele nu ame gakhalelego mubanjinyiwa ha gudimba gu mukanda. ⁴ Nga mafuta a mamboalamawe mu gisuegi mukunda nu gu ha gutala diphanda dietu ditudi nadio mu Kilisto-Yesu. Atshiginyine gutubuisa ahiga a mikhuala. ⁵ Tuahuilego nga gakumbi gazonda, mukunda egi giamatshidia gia lukuma luabonga lugi nayo ya gusombegesa mukunda nuy enue. ⁶ Uvi gudi ago athu akhalele muzuela egi akhalele atuameji, angubatelego nga gima. Luholo lu akhalele, yangutalelego, ame Nzambi ganatumaga nga muthu mungoshi. ⁷ Ajiyile egi ngatamegewe mukunda nu guzuela lukuma luabonga gudi jingulungu nga jithondo. ⁸ Mukunda nu Nzambi muene mumoshi wanatshita mùu gimupostolo gia petelo mukunda nu guzuela lukuma luabonga gudi jingulungu nga thondo, udi mutshita nji gudi ame, ha guzuela mukunda nu aphangi'ami. ⁹ Hajiyile ene ngasa yanguhuile Nzambi, Yakoba, Petelo nu Yone ajiyiwe gifua makunji atuhuile mlumene gu koko gua madia, gua Barnaba nu gua ame, giyilo giagudijiga gutshigina guawo ha guya gudi aphaganyi nu guahua mukanda. ¹⁰ Atuwambelele nji ha esue gutshigina gutamegewa egi tudi phutu, yago nganatshigina diago gutshita. ¹¹ Hago Sefase gayile gu antiosha, ngadijijigile diago gudi muene ndaga ya wakhalele nu gubela. ¹² Gutuama dia gula egi athu atumiwe gudi Yakoba guza gale ndo, Petelo wakhalele mudia nu jingulungu nga thondo. Uvi hago hajile athu ene, amukuatele nu wakhalele haleha-leha ha gulenga gukhala hehi nu aphaganyi mukunda nu woma gudi athu ago ayile gu mukanda. ¹³ Nu nji aphaganyi etu ako enya yuda asalele adibungishile mukatshi dia mambo awo. ¹⁴ Uvi ha ngawungulugile egi ashigo mulandula lukuma kua diago, ngawambelele Sefase gu tuama diawo agasue << gula aye udi muenya yuda, wanakhala gifua muphagano, uvi ndo mu luholo lua enya yuda, luholo tshi wajiya gujinginyisa aphagano ha gukhala gifua enya yuda? >> ¹⁵ Esue ago tudi enya yuda a gubutshiwa nu tushigo gifua aphagano enya gubola, ¹⁶ tujiye egi nga mumoshi ndo mba ubingishiwa mukunda nu midimo ya mikhuala uvi mukunda nu gutshigina mu jina dia Yesu Kilisto. Tuajile mukunda nu gutshina mu Kilisto hagula egi mbatubingishiwe mukunda nu gutshigina mu Kilisto, uvo ndo mukunda nu midimo ya gutshigina, mukunda nu gushigo nga nu mungoshi mba ubingishiwa mukunda nu midimo ya gutshigina. ¹⁷ Uvi gula tudi Nzambi hagula atubingise mu Kilisto, tudi gumona esue hakhetu enya gubola, Kilisto waza luenyelu muenya mudimo wa gubola ? Nga hazonda ndo! ¹⁸ Ndaga ya gula tua tunga luko luholo lua mukhuala, luholo luago lungabuishile, ngudi gudijijiga ame hakhami mushiyi wa mikhuala. ¹⁹ Gu mukhuala ngafuile mukunda nu mukhuala mukunda nu ngajiya guhuluga mukunda nu Nzambi. ²⁰ Nga hagewe ha mutshi wagudikikisa nu Kilisto. Ishigo ame ngudi nu monyo, uuvi Kilisto udi nu monyo mukatshi diami, uvi monyo ungudi nawo gu muila, ngudi nawo mu gutshigina guami gudi muna Nzambi yago wanguzumbile, nu wadihanene muene hakhenji mukunda nu ame. ²¹ Ngushigo mubishila ngasa ya Nzambi, ndaga ya gula giamatshidia gidi guene mukatshi dia mikhuala, na Kilisto wa labele genji gufua.