¹ Anetu, gula muthu wakuatewa mu gubola, enue mudi mu givule, mudi nayo gumubata nu guhuiminyina. Dikengelelenu ha gula mukhadigo ya gulolewa. ² Dibatenu ginemo ngenyi mudu mutagenesa mukhuala wa Kilisto. ³ Gula muthu udi mutangiza egi muene muthu ya diago, uvi gula gashigo muthu ya diago, ngenyi udi gudilola muene hakhenji. ⁴ Muthu nu muthu atalulule midimo yenji. Mu ngenyi wajiya guheta ndaga jia guditumbuishila, uvi gudifelela gudi muthu muko ndo. ⁵ Ndaga ya muthu nu muthu mba ubata ginemo gienji. ⁶ Yago udi mulongewa mbimbi, udi nayo gukhapha ima yagasue yabonga nu mulongeshi. ⁷ Mudihuigigo ndaga Nzambi gana lelewa ndo. Idi mukuna mukua muthu yene mba gahela. ⁸ Yago udi mukuna mukunda nu ndaga jienji mba udi mubela dilamba.Uvi yago wa kuna mukunda nu givule mba ubela monyo wa mayilago mu givule. ⁹ Tuhodigo muila mu gutshita gubonga ndaga ya kumbi dimuza mba tudi mubela suga ndo. ¹⁰ Ngenyi ha tudi nu gahugo, tutshitenu ndaga jia bonga gudi muthu yagasue. ¹¹ Tadienu guleha gua mukanda unga misonegene mu mago ami. ¹² Ago adi mutshigina gumonega athu abonga mu muila, adi gumibanjiginya ha gungina mukanda, ha gula musagesewa ndo ha mutshi wa gudikikisa wa Kilisto. ¹³ Ndaga ya nun ene ago anginyile mukanda, anabambago mikhuala. Uvi adi mukamba gumimba gu mukanda ha nene gutumbuga. ¹⁴ Ngana guditumbuisa ndo, gula ishigo mukunda nu mutshi wa gudikikisa wa Yesu-Kilisto. Holu dia wene, hambiwe mamudidi mukunda nu ame nu ame mukunda nu mavu amudidi. ¹⁵ Ndaga ya, nga mukanda nga uthondo wana tangewa ndo, khuta ima ihe-ihe idi mutangewa. ¹⁶ Gudi athu agasue mba akhala mu mukhuama wuwu, guhuima nu khenda jikhale gudi ene nu gudi Isalele ya Nzambi. ¹⁷ Sendese mangino, muthu gungusagesa ndo, ndaga ya ngudi nu njimbu ya Yesu. ¹⁸ Guzela muila gua Fumu yetu Yesu-Kilisto gukhale nu enue anetu. Ikhale ngenyi.