¹ Gula na Nzambi wamizugishile gu gufua nu Kilisto, kambienu ima ya gosa, gunu Kilisto udi waditumbiga gu koko wa madia ya Nzambi. ² Hagenu matangi enu gu ima ya gosa, uvi muhagigo matangi enu gu ima idi ha mavu. ³ Ndaga mudi yagufua nu monyo wenu udi wagusuega nu Kilisto mukatshi dia Nzambi. ⁴ Kumbi diago Kilisto, monyo wenu mba umuenega, hene mba mu muenega nji nu muene mu lutumbu. ⁵ Na shiyenu idiando ya mila yenu idi holu dia mavu (uthambi, gubola, nzala yabola nu gukombelela isongo (ikhokho). ⁶ Idi mukunda nu ima yene inyi khabu jia Nzambi jianaza gudi ana a gushaga. ⁷ Idi mu ndaga jia ngenyi enue nji muakhalele muwenda hathomo, kumbi diago muakhalele mujinga mukatshi dienji. ⁸ Uvi luenyelu, mudi nayo gubemba jindaga jiagasue (khabu jiakola, khabu, matangi abola, mashingo (mashingana) nu mbimbi jiabola jidi muzoga mu kano wenu). ⁹ Mudihuigigo enue nu enue, ndaga muabembele (muabishidile) uthu ukulu nu makalegelo enji agasue, ¹⁰ nu muasudigile uthu uhe - uhe, udi muza luko mu gujiya mu luholo lua gifuanegesa gia muthu wa ifugile. ¹¹ Idi mukatshi nu ngenyi hene gushigo nga Gelega nga Yuda, nga muenya mukanda nga muthu gashigo muenya mukanda, nga muenya mbundudi, nga Siteya, nga muhiga, nga muthu udi nu ukhaledi, uvi Kilisto udi yagasue nu mu yagasue. ¹² Na sudigienu, gifua ethu aphonewe a Nzambi, asantu nu enya guzumba, abutshiwe mu khenda jia nzambi, mu gubonga, mu gudibulumuna, mu guhuima nu guhuiminyina. ¹³ Ditalenu mumoshi nu mumoshi. Divilenu jikhenda enue nu enue. Gula muthu mumoshi udi nu mulonga nu muthu muko, muvidienu jikhenda mu luholo lumoshi luene Fumu wamividile jikhenda. ¹⁴ Holu dia ndaga jiagasue, khadienu nu guzumba, guene gudi gutubata gu gubonga. ¹⁵ Egi guhuima gua Kilisto gukhale mu mitshima yenu. Idi mukunda nu guhuima guene muatamegewe mu muila umoshi. Nu khadienu nu guwunguluga gubonga guamitshitsgiwe. ¹⁶ Egi mbimbi ya Kilisto ikhale mukatshi dienu mu umonyi wenji wagasue. Mu ungambi wagasue, dilongesenu nu dilezenu mumoshi nu mumoshi nu khunga, nu ngimbo jia unzambi. Yimbilenu Nzambi nu mutshima umoshi wa guwunguluga gubonga. ¹⁷ Nu ndaga mu mutshita, mu mbimbi nu mu midimo, itshitenu yagasue mu jina dia Fumu Yesu. Hanyenu hambadiahana gudi Nzambi Tata mukunda nu muene. ¹⁸ Akhetu a mahata, khadienu mutumaga gudi alumi'enu, mu luholo luatagana mu Fumu. ¹⁹ Mala, zumbienu akaji'enu, nu mukhadigo mualula bua gudi akaji'enu. ²⁰ Ana, tumagienu gudi abuti enu mu ndaga jiagasue, ndaga idi yabonga gutuama dia Fumu. ²¹ Atata, mukambelago anenu, hagula egi akhale aguleba mila. ²² Ahiga, tumagienu gudi mafumu enu mu luholo lua thumba mu ndaga jiagasue, ishigo khuta hameso awo ha guasuanguluisa, uvi nu mutshima umoshi wa giamatshidia. Venu woma wa Nzambi. ²³ Nga luholotshi mumutshita mudimo, utshitenu nu matangi amoshi, gifua mumutshitshila Fumu uvi ishigo mukunda nu athu. ²⁴ Muajiya egi mba muzangula gishimbigo gudi Fumu. Idi Fumu Kilisto mudi mutshitshila mudimo. ²⁵ Ndaga muthu yagasue udi mutshita mudimo wa mambo mba uzangula ndola ya gubola, nu gushigo nga gubua nu muthu mumoshi go.