¹ Mafumu, hanyenu ahiga enu ndaga jidi jiatagana nu jia giamatshidia. Muajiya egi nu enue nji mudi nu Fumu mumoshi mu dilu. ² Khadienu muadindamana mu gulomba. Khadienu mutala mu gulomba nu mu midimo ya ngasa. ³ Lombienu khungi mukunda nu esue nji, hagula egi Nzambi uzulule mufulo umoshi mukunda nu mbimbi, mukunda nu guzuela giamatshidia giasuegewe jia Kilisto. Mukunda nu mbimbi, ngudi yagujitshigiwa miyololo. ⁴ Lombienu hagula egi ngukhadigo nu musonyi hago ngudi mulongesa. ⁶ Wendienu mu ungambi gudi athu ashigo enya gutshigina, nu sumbienu kumbi. ⁵ Egi mbimbi jikhale khuta jiabonga. Egi mbimbi jienu jikhale jiagubungisa nu mungua hagula egi mujiye luholo lua guvutula gu mihu ya muthu. ⁷ Mukunda nu ndaga jiagasue jidi gungutala ame, Tishiki mba udi gumiwambela. Muene udi phanji'etu ya yala yaguzumba, muenya mudimo wa giamatshidia, nu muhiga gifua ame mukunda nu Fumu. ⁸ Ngumutuma gudi enue mukunda mukhale nu gujiya gua ndaga jietu jihe-jihe nu hagula egi amihane gingolo. ⁹ Ngamutumi nu Onezima, phanji'etu ya yala yaguzumba, muenya mudimo wa giamatshidia, udi nii mumoshi ya mukatshi dietu. Mba adi gumiwambela ndaga jiagasue jiabalegele gugu. ¹⁰ Futa diami dia bologo, Alistalake wamimenega, nu Malako gisonyi'a Balanabase (yago wamihanene mikhuala yetu; gula waza gudi enue mu muzangule) ¹¹ nu Yesu nji udi mutamegewa egi Yusutusa. Adi enya yuda ambiwe gumukanda ago ngudi mutshita nawo mudimo mukunda nu Ufumu wa Nzambi. Akhalele mukunda nu ame athu amoshi adi gunguhana ngolo. ¹² Epafalasa wamimenega. Udi mumoshi ya mukatshi dienu nu muhiga wa Yesu - Kilisto. Wana lua ita mukunda nu enue mu gulomba, hagula egi mukhale muadindamana nu muazala nu gudifelela mu gutshigina gua Nzambi. ¹³ Ndaga ngudi muta uthemua wenji, egi udi mutshita mudimo wakola mukunda nu enue, mukunda nu athu a gu Laodise, nu mukunda nu athu ago adi gu Iyeladipolisa. ¹⁴ Luka udi munganga yaguzumba, nu Demasa adi gumimenega. ¹⁵ Menegienu aphanji'a mala adi gu Laodise, nu Nimfasa, nu ekelejiya idi munzo yenji. ¹⁶ Kumbi diago mukanda ou mba utangewa mukatshi dienu, utangelenu nji ekelejiya ya gu Laodise, nu mutangenji mukanda udi muza gu Laodise. ¹⁷ Wambelenu Alashipe, << Tala muabonga mudimo wazanguile gudi Fumu hagula egi uwutshite muabonga. ¹⁸ Lumene loulu luasonegewa gu mago ami hakhami, ame Paula. Wungulugenu miyololo yami. Egi ngasa ikhale nu enue.