¹ Ndaga ngatshigina egi mujiye gukola tshi gua ita yago nga luile mukunda nu enue, mukunda nu enya gu Laodise, nu mukunda nu athu ako avula amuenenego phala yami. ² Ngumutshita mudimo hagula egi mitshima yawo ikhale yagukolesewa mukunda nu gudibungisa mu guzumba nu mu umonyi wagasue wagudifelela gua gukotelesa, mu gujiya gua giamatshidia guagusuega gua Nzambi, imutshigina guzuela egi Kilisto. ³ Mukatshi dienji gudi guagusuega umonyi wagasue wa ungambi nu gujiya. ⁴ Ngudi gumiwambela ngenyi hagula egi nga muthu mumoshi amihuigigo mu mbimbi ya luzonzo. ⁵ Nu nga tshima ngushigo nenu hamoshi gu muila, ngudi nenu hamoshi mu nyuma. Ngasuanguluga ha gumona gudilonda guenu gua mundonga nu gukolesela gua gutshigina guenji mu Kilisto. ⁶ Luholo lumoshi luene muazanguile Kilisto udi Fumu, wendenu mukatshi dienu. ⁷ Khadienu yagudindamana mu miji yenji, khadienu yagutungiwa mukatshi dienji, khadienu yaguhagewa mu gutshigina gifua mualongesewe, nu khadienu yaguzala nu gujiya. ⁸ Khadienu nu utaledi egi gukhadigo nga muthu mumoshi wajiya gumibata mu matangi a uthu nu mambo agituhu adi muza gudi gikulu gia athu, gifuanegesa nu ima ya ha mavu wawa, nu ishigo yatagana nu Kilisto. ⁹ Ndaga ngolo jiagasue jia Nzambi jidi mukatshi dienji. ¹⁰ Mudi yaguzala mukatshi dienji. Muene udi fumu ya ufumu wagasue nu uhinyinyi wagasue. ¹¹ Mukatshi dienji muakhalele nji ya gumbiwa gu mukanda ushigo wa athu mu thumba ya muila, uvi muambiwe gu mukanda wa Kilisto. ¹² Muafundiwe nenji gu gubatijiwa, nu muazugile mukatshi dienji mu gutshigina mu ngolo jia Nzambi jiazugishile Kilisto mukatshi dia agufua. ¹³ Hago muakhalele yagufua mu gubola nu gutuna gumbiwa mukanda wa thumba yenu, udi gumibata gu monyo nu mba utuvila jikhenda gu gubola. ¹⁴ Wakukumuine mukudi nu mikhuala yakhalele yagusonegewa mukunda nu esue. Wa ikatshuile jiagasue nu wajikhokhele misomo gu mutshi wa gukikisa. ¹⁵ Watambuile jingolo nu uhinyinyi, wa jihagele ha phelo nu wa jibingile gu mutshi wagukikisa. ¹⁶ Ngenyi, mubembigo nga muthu mumoshi amisophese milonga mukunda nu ndaga ya gudia nga gunua, nga mukunda nu ndaga ya lusugu lumoshi lua mawano nga mukunda nu ngonda ya gihe-gihe, nga masugu a gisabato. ¹⁷ Ndaga jieji jidi mubuisa phipha gu ndaga jidi muza, uvi muila udi mukatshi dia Kilisto. ¹⁸ Gukhadigo nga muthu mumoshi watshigina gudibulumuisa nu gukombelela anjielo amikuye ndando yenu. Muthu wa ngenyi udi gudinginyisa mu ndaga jio adi mumona nu umubua muenya gudihala mukunda nu gutangiza gua muila. ¹⁹ Muene gashigo gudibungisa nu muto. Muila wagasue wanakhala wagudishiwa gu muto nu wanakhala wagubungisa nu idiando iko nu mishiya; nu muila wanakula mukunda nu guleha gumuza gudi Nzambi. ²⁰ Gula mudi yagufua nu Kilisto mu mikhuala ya mavu, na mukunda natshi mudi mujinga gifua mudi yagunanewa gudi mavu: ²¹ << Ukhuatigo! ulodigo! ukhuatigo! >> ²² Ndaga jieji jiagasue jia hagewe mukunda nu unzangi mu midimo yawo, mu luholo lua mikhuala nu malongo a athu. ²³ Mikhuala yene idi yadifuanegesa nu ungambi wa unzambi watshitshiwe gudi ene hakhawo, gudibulumuisa nu gutuma gua momonesa muila wenji malamba. Uvi ashigo nga nu ginemua gimoshi gudi nzala ya thumba.