¹ Ishigo diago nu funu yagula egi ngumisonegele mukunda nu gukuatesa gudi gua gutumiwa gudi athu a Nzambi adi gu yuda. ² Ndaga ya, ngudi mujiya gubonga gua mitshima yenu, ingana gudihalela gudi enya Masedonia. Ngana gu’awambela egi ane’tu agu gelega adi hehi mu gukuatesa, sendese givo gia balegele. Gudizalumuna guenu guavumbununa athu avula mukatshi diawo. ³ Hene ngudi gumitumina ane’tu wawa, hagula egi gushimana gu ngashimanene gukhadigo gua gituhu. Ngatshigina egi mukhale diago hehi, gifua nga izuelele. ⁴ Ndaga ya gula ngaza nu ane’tu agu Masedonia, nu gula mushigo hehi, na mba ikhala musonyi gudi esue, uvi nu gudi enue nji ⁵ Idi mukunda nu ngenyi, nga tumi ane’tu, ha gumikuatesa ha gulonda ima imuahanene laji. Hagula egi ima yene ikhadigo gifua ya gubanjiginyiwa. ⁶ Jiyenu egi muthu wakuna ha zonda, mba uhela ha zonda nu yago wakuna ha koma, udi nayo guhela ha koma. ⁷ Muthu nu muthu ahane inyi galondi mu mutshima wenji, ndaga ya Nzambi udi muzumba yago udi muhana nu gusuanguluza. ⁸ Nzambi mba umizalesa nu guzela muila, hagula egi mu ndaga jiagasue mukhale nu ima yavula mukunda nu mudimo wabonga wagasue. ⁹ Gifua idi ya gusonegewa egi: wakhapha umonyi wenji wagasue, wa uhana gudi jiphutu ndaga ya ungambi wenji ushigo nu gisugishilo. ¹⁰ 10. Ndaga ya, yago wanahana mbuto gudi akunyi a mahia nu ima mukunda nu gudia guawo, mba udi muhana mukunda nu gubonga guenu, mbuto jiabonga. ¹¹ Mba umibitshishila yavula, hagula egi mukule nu gudizalumuna guenu, hagula egi athu avula atumbuise Nzambi. ¹² Ndaga ya mudimi wuwu, ushigo khuta mukunda nu gukuatesa athu a Nzambi, uvi udi nji gishina gia gusuanguluga nu gia gutumbuishila Nzambi yetu. ¹³ Gifua mudi mushimanewa gudi athu agasue, mudi mutumbuisa Nzambi mu gutumaga guenu gu mbimbi ya Nzambi nu gudizalumuna gu mudi mujijiga mu uhanelo wenu. ¹⁴ Mu guzumba guawo gudi enue, adi mukombelela Nzambi mukunda nu guzela muila gua mihuiwe gudi Nzambi. ¹⁵ Nzambi atumbuishiwe mukunda nu khapho dienji diakoma.