¹ Ame phaula, ame hakhami ngudi gumitamega, mu gudibulumuisa nu gutuluga gua mutshima gua kilisto. Ngudi ya gudibulumuisa ha ngudi gutuama dienu uvi nu makhaso mukunda nu enue hangudi haleha. ² Ngudi gumizonza hangudi hene nu enue. Mba ngukhadigo nu makhaso ha gudihagela mutshima, gifua ngudi mutangiza gukhala, hangudi mutuna ago adi mutangiza egi tudi nu monyo mu muila nga mu uthu. ³ Kumbi diagasue, hatudi muwenda mu muila, tuajiyilego guluisa uthu. ⁴ Ndaga ya mata atudi muluila ashigo amu muila. Uvi adi mu ngolo jia Nzambi ha gubuisa ndaga jiabola. ⁵ Tudi mubuisa yagasue ya tungiwa hagutuna gujiya Nzambi nu tudi mubata matangi agasue hagutumaga gudi kilisto. ⁶ Tudi hehi ha guhana ndola gu makalagelo agasue adi ashigo mutumaga, gula gutumaga guenu gudi gua tagana. ⁷ Tadienu muabonga ndaga idi haphelo gutuama dienu. Gula muthu udi mutangiza egi udi muthu ya kilisto, atngize nji egi esue nji tudi athu a kilisto. ⁸ Ndaga ya, ngushigo nayo guvua musonyi, ngatshima ngadishimana mukunda nu ufumu watuhuiwa gudi Fumu ha gumikolesa uvi gumibuisa ndo. ⁹ Ikhadigo gifua ngudi gumibuisa hashi mu mikanda yami. ¹⁰ Ndaga ya athu ako adi muzuela egi, mikanda yenji idi yadiago nu yabalega jingolo, uvi muene gu muila gashigo nu ngolo nu mbimbi jienji jishigo jiagula mukhadi muvua. ¹¹ Athu angenyi, amukotelesa itudi muzuela mu mikanda yetu. Ha tushigo hene, tudi mutshita luholo lumoshi luene gifua ha tudi hene. ¹² Tuayilego gifua ha gudihaga mu ndonga nga gudithesa nu ago adi guditumbuisa ene hakhawo, uvi hadi gudithesa ene-ene, na ashigo nu ndunge. ¹³ Esue tushigo nayo gudishimana muavula, uvi tudi musala mu gitshinyi gi Nzambi gatuhagele, nga haguza gudi enue gua leha gu mudi. ¹⁴ Tuaditumbuishilego mukunda nu ngenyi, hagutala guleha gua njila idi gutukhaphumuna. Tuajile athu athomo gudi enue ha gumibatela mbimbi ya kilisto. ¹⁵ Tushigo gudishimana muavula mukunda nu midimo yangane, uvi tudi muhaga mutshima egi gutshigina guenu mba gudi mukula mu fundo dienu dia mudimo nu mba gudi mukoma mangololo. ¹⁶ Hagula egi tulongese mbimbi ya Nzambi mu membo adi balege gu mbodienu, tushigo mutshigina gudishimana mu midimo ituatshitshi mu mavu a’athu ako. ¹⁷ Uvi yago udi gudishimana, adishimane mukunda nu Fumu. ¹⁸ Ndaga ya ishigo yago udi gudilombela hakhenji udi mutshiginyiwa go uvi yago Fumu gadi mulombela muene udi mutshiginyiwa.