¹ Ngatshigina egi mu kolesele gu ndambo jia malui ami. Ayi, kolesedienu. ² Ngudi nu difuwa diavula mukunda nu enue, ndaga mudi gifua gandongo ga ngasogi mukunda nu yala mumoshi. Yala muene kilisto. ³ Ngudi nu woma wabala egi muajiya guhuigiwa ha gutuna gukuatagana nu kilisto, gifua Eva gahuigiwe gudi nyoga. ⁴ Ndaga ya gula muthu muko waza gumilongesa Yesu muko, udi gashigo yago tuamilongesele, nga lukuma luko, nga givule giko, mudi nayo gumunemesa nu gumukolesa. ⁵ Na ngudi mutangiza egi, ngalabele gami gudibulumuna gutuama dia apostolo ago akhalele mutangiza egi angubalegela gukoma. ⁶ Ngatshima ngushigo mutema guzuela, uvi ngudi mutema gujiya. Mu ndaga jiagasue nu mu maluholo agasue tua mijijiga nayo. ⁷ Ngatshitshile gubola ha gudibulumuisa ame hakhami nu ha gumikandugisa, ha gumilongesa mbimbi ya Nzambi ba ? ⁸ Ngatambula Eklezia jiko, mukunda nu gumitshitshila enue. Nu muhudi di tuakhadi nenu mu lamba, ngahagelego ginemo giami gudi muthu. ⁹ Ndaga ya, anetu a gu Masedonia atshitshile yagasue mukunda nu ame, nu ngatunyi gukhala ginemo mukunda nu enue. ¹⁰ Mukunda giamatshidia gia kilisto gidi gudi ame, ndaga inyinyi ya lutumbu, ishigo nayo gungutunyishiwa mu mavu a galega. ¹¹ Mukunda na’tshi? Mukunda ngushigo gumitshigina? Uvi Nzambi yowu mujiya egi ngamitshigina. ¹² Itshi ngudi mutshita, nu mba ngutshita ha gukatula gabuba ga’athu adi mutshigina gudithesa nu esue mu ndaga’ eji, jidi ene gudi tumbuishila. ¹³ Athu anyinyi adi apostolo a mambo, enya mudimo wa mambo adi musudiga gifua apostolo a kilisto. ¹⁴ Nu ishigo gisagumuisa ndo. Ndaga ya satana hakhenji wanabua nji gifua muanjelo wa mu muanya. ¹⁵ Ishigo nji gisagumuisa go, gula enya mudimo wawa adi gudisudigisa gilema gia enya giamatshidia. Gisugishilo giawo mba gikhala gifua mudi midimo nga makalagelo awo. ¹⁶ Nguzuele luko, muthu ganguzangulago egi ngudi mukata tunzammbu-nzambu, gula idi ngenyi, nguzangulenu mu luholo lununu, hagula ngudishimane gandambo. ¹⁷ Ndaga jingudi muzuela mu lulendo, jishigo jia Fumu, uvi ngudi muzuela gifua muenya malui. ¹⁸ Mukunda athu avula adi guditumbuisa mu uthu, ame nji ngudi guditumbuisa. ¹⁹ Mudi mutshiginyisa ndaga jiabola, enue ngambi. ²⁰ Muanatshigina muthu udi gumibuisa ahiga, udi gumikhaphumuna, udi gumikuya, nga gumiwasa. ²¹ Ngudi muvua nu musonyi haguzuela ngenyi. Ndaga ya, tuakhalelego nu ngolo ha ndaga yene. Ayi, hadi muthu guditumbuisa, na ngudi gudishimana nji. ²² Adi enya hebelu ? ame nji ngudi muenya hebelu. Enya isalele? Nu ame nji. Adi ajigulu jia Abalahama? Ame nji ngudi mujigulu ya Abalahama. ²³ Na ngasendesa guzuela gifua gikonyi. Adi enya mudimo wa kilisto? Ame ngudi ya guabalega mu midimo, mu guwasewa, gumbiwa mu bologo, nu mu gufua gu ngudi mutagana nago. ²⁴ Mahugo atano ngawasewe tubama makumi atatu nu divua gudi enya yuda. ²⁵ Mahugo atatu ngawasewe gudi enya Lomo, nu hugo dimoshi ngasonewe jiseso, mahugo atatu ngabundugile nu wato, hugo diko dimoshi ngatshitshile lusugu lua mudidi mu kiawo. ²⁶ Mu guwenda, ngataganene nu ingonza ya guzala gua mita, nu ingonza ya nzangi, nu inginza iko idi muza gudi aphangi’ami enya yuda nu ago adi ashigo enya yuda. Ngakhalele mu ingonza mu membo akoma, mu muta wakoma, mu temu nu gudi aphangi ako a mambo. ²⁷ Ngatshitshishiwe midimo yakola, nu gukhikhiwa guavula, ngakhalele mubanda nu gikole-kole, hako nzala nu luhungu, ngamuenene lamba diavula, hako nji thowa. ²⁸ Ngushigo muzuela ndaga jiagasue, ngudi mubata ginemo gia ndaga jingudi najio mukunda nu Eklezia yagasue. ²⁹ Gula muthu gashigo nu ngolo, ame nji, ngushigo nu ngolo, gula muthu wabua mu gubola, ngudi muvua gubala guakola. ³⁰ Gula idi guiene egi ngudishimane, ngudi nayo gudishimana guy ago idi mujijiga guleba guami gua muila. ³¹ Nzambi, tata ya Fumu yetu Yesu-Kilisto, yowu mujiya, ngushigo mumba mambo. ³² Ha ngakhalele gu Damasi, Aletasa wahagele athu ha mufulo wa dimbo ha gungukuata, ³³ Uvu anguzolele ha nela ya gibayi gia dimbo, angumbile mu kinda, angutulula hashi, hene ngalengele.