¹ Ngajiya gudishimana uvi ngushigo muheta gima ha ngudi gu itshita. Muabonga nguzuele mkunda nu nzoji nga gimona gia meso gio Fumu ga ngujijiga. ² Ngudi mujiya muthu mumoshi mu kilisto, idi gale ivo kumi nu iwana, wathuphudiwe gosa mu dilu dia thathu. Nga wayile nu muila wenji egi ndo; Nzambi hakhenji umijiya. ³ Muthu muene ngudi gumujiya nu muila wenji nga ndo ; Nzambi hakhenji umujiya. ⁴ Wakandugile gu phaladisu nu wavile jimbimbi jiafula ha guzuela. ⁵ Ngenyi ngajiya gudishimana mu jina dia muthu mununu uvi mu jina diami ndo, nu guleba gua muila. ⁶ Gula nji ngatshigina gudishimana, ngajiyilego gukhala muenya malui, ngudi nayo guzuela gialatshidia. Uvi ngyudi mutuna gudishimana, hagula egi muthu gakhadigo nu matangi ako holu dia yago adi mumona nga adi muvua gudi ame. ⁷ Hagula egi ngule guzala ndo nu gudihala mukunda nu nzoji nga gimona meso, ngosonewe yakola gifua ngenji ya satana ha gunguwasa nu gungukatula gudihala guene. ⁸ Ngakombelele Nzambi mahugo atatu mukunda nu misongo yene ha gumulomba egi angukatule nayo. ⁹ Wanguvutuile egi: guzela muila guami gudi guatagana mukunda nu aye, ndaga ya ngolo jiami jidi mu guleba gua muila. Ngenyi ngudi gudishimana mu guleba gua muila hagula egi ngolo jia Kilisto jikhale mukatshi diami. ¹⁰ Hene ngudi gudishimana mu guleba gua muila, mu mashingo, mu gusagesewa, mu gikenene mukunda nu Kilisto. Mukunda ha ngudi ngolo ndo, hene ngudi nu ngolo jiavula. ¹¹ Mu gubanjiginya guenu, ngabua muenya malui, uvi yakhala mulomba egi mungulombele, ndaga ngushigo ngazonda gudi apostolo akoma, ngatshima ngushigo nu gima ndo. ¹² Makalagelo adi mujijiga egi ngudi mupostolo, atshitshiwe mukatshi dienu nu guhuiminyina gua diago. Yakhalele ijiyilo, ipha nu ndaga jia gushimana. ¹³ Mu itshi muazangudiwe gosh’a Eklezia jiko. Hene ngakhalelego ginemo guenu ndo. Ngutoteselenu. ¹⁴ Ngudi hehi haguza gumitala hugo dia thathu, nu mba ngushigo mukhala ginemo mukunda nu enue, ndaga ya, ngushigo mukamba umonyi wenu uvi ngudi gumikamba enue muene. Ishigo ana adi mukuba mukunda nu ajishawo, uvi ajishawo adi mukuba mukunda nu ana’awo. ¹⁵ Mba ngukhala nu gusuanguluga haguzola nu gulandula nu guzola mukunda nu mionyo yenu. Gula ngudi gumitshigina, ngudi nayo gutunyiwa gudi enue ba? ¹⁶ Mukunda ngakhalelego ginemo mukunda nu enue, muthu muko wajiya gutangiza egi ngudi muenya mulebo, ngakhalele gumitela miheto mu mambo ami. ¹⁷ Athu ngamitumidile, ajile gumisagesa nu gumitambula ima mu gutema? ¹⁸ Ngazonzele Tite haguza gumbodienu, nu ngatumine nji munetu yago mudi mujiya. Mudi mutshigina guzuela egi Tite wamisagesele ? tuatshitshilego nu muene nu ame luholo lumoshi go ba ? ¹⁹ Hugo dialeha muakhadi mutangiza egi tudi mukamba gudikotelesa gudi enue. Ndo geti ! tudi muzuela gifua mua tshigina Kilisto gutuama dia Nzambi. ²⁰ Ngudi nu woma egi, ha mbanguza luko gudi enue, ngule gumisanga ndo mu luholo lu ngudi mutshigina, nga ngule gumisanga ndo mu luholo lu mudi mutshigina. Ngudi nu woma egi mba ngusanga gumana, giphi, khabu, izuele-zuele, nu ima ima iko yabola. ²¹ Woma udi egi, ha mbanguza, Nzambi anguhane musonyi mukunda nu enue, ngukhale mulambagana mukunda nu ago adi agubua mu gubola, nu ashigo mubemba ndaga jiabola.