¹ Idi hugo dia thathu nguza muza gu mbodienu. Gufundiwa guagasue gudi nayo gukhala nu uthemua wa’athu muyadi nga mutate gifua mudi muzuela mikanda. ² Ngudi nu ngenji ya guhana gudi ago abuile mu gubola nu gudi athu ako agasue. Ngaihanene gale mu hugo dia ngiadi di ngajile gumitala, uvi ngudi gu izuelulula luenyelu egi ngushigo hene. Hugo dia gungima ha mbanguza gudi enue, mbangushigo muvila muthu jikhenda ndo. ³ Mudi mutshigina gutala gula diago Kilisto wanazuela mukatshi diami. Nganyi mbamudi gu iheta. Kilisto gashigo waleba mukatshi dienu, uvi udi mujijiga jingolo jienji mukatshi dieni. ⁴ Diago wahagewe ha mutshi wa gudikikisa mukunda nu guleba guenji, uvi luenyelu udi nu monyo mu ngolo jia Nzambi. Tudi tualeba nu muene, uvi mu luholo luetu lua gutshita, tudi ne’nji nu monyo mu ngolo jia Nzambi. ⁵ Tadienu hakhenu gula mudi nu monyo mu gutshigina. Enue mujiya egi Yesu-Kilisto udi mukatshi dienu, mambo? Zuela egi mushigo muatagana ha gijijiga gutshigina guenu. ⁶ Enue mujiya egi esue tudi hehi ha gujijiga gutshigina guetu. ⁷ Tudi mukombelela Nzambi hagula mutshitshigo gubola. Ishigo hagula esue tuzoge athu abonga go, uvi hagula egi mutshite yago idi yatagana. ⁸ Tushigo nu gima giabola gia gutshita gu giamatshidia gia Nzambi, tudi nayo gukalaga mu giene. ⁹ Tudi musuanguluga ha tudi tualeba, uvi enue mudi nu ngolo. Gula ngenyi tudi mulomba mu gukombelela guetu egi mukhale muatagana. ¹⁰ Hene ngudi gumisonegela ngenyi, ame gualehe. Hambangukhala mukatshi dienu, ngukhadigo nayo gutshitshila ufumu ungazangula gudi Fumu ha gumikudisa mu gutshigina uvi gumikhaphumuna ndo. ¹¹ Hagumanesela ane’etu a mala nu akhetu, tshitshienu mudimo wa gutunga, khadienu gudivua, khadienu mu guhuima, ngenyi Nzambi ya guzumba udi mukhala nu enue. ¹² Dihanenu jimene jia usantu. ¹³ Asantu agasue nji amihua lumene. ¹⁴ Guzela-muila gua Fumu yetu Yesu-Kilisto, guzumba gua Nzambi nu gudibungisa gua givule giabonga gukhale nu’enue agasue.