¹ Tudi mutshigina gumivambela anetu a mala nu akhetu, mukunda nu guzela muila gua Nzambi gua dimuenegesene mu Eklezia ya gu Masedonia. ² Mu hugo dia malamba awo, gusuanguluga nu uphutu wawo gua buta gudizalumuna guavula. ³ Ngudi gumiwambela egi, ahanene yago akhalele nayo mu gutshigina guawo hakhawo. Nu ngudi themua ⁴ Atulombele ha guatuma ha guya mukuatesa athu a Nzambi adi gu Yuda. ⁵ Yakhadi gisagumuisa gudi esue. Adihanyi thomo gudi Fumu, gungima mu gutshigina gudi Nzambi, adihana nji gudi esue. ⁶ Hene tuabubila Tite ha guya gombodienu nu ha guhatelesa mudimi wa gudizalumuna nu gu ‘umanesela. ⁷ Mudi nu umonyi wagasue : gutshigina, guzuela guabonga, gujiya nu guzumba gu mudi nawo mukunda nu esue. Hene tudi mutshigina egi mukhale amonyi mu mudimo wa gudizalumuna. ⁸ Ishigo mukhuala ngudi gumihua uvi idi mukunda nu gutala guzumba guenu. ⁹ Ndaga ya, mudi mujiya guzela muila gua Fumu yetu Yesu kilisto. Muene yago wakhalele nu umonyi uvi wabuile phutu mukunda nu enue ha gumibuisa amonyi. ¹⁰ Ngenyi ngudi gumihua matangi ami ha ndaga yene : idi yabonga ha enue gulandula gutshita yago imua sendesele mu givo gia balegele. Muakhalele athu athomo, ngatshima mu gutshita ndo, uvi muakhalele hehi ha gutshita. ¹¹ Landudienu nu manesedienu imua sendesele. Hagenu matangi abonga ha gumanesela gifua ha muahagele matangi ha gusendesa. Manesedienu nu yago mudi nayo. ¹² Ndaga ya gula muahaga matangi ha guhana, Nzambi udi mutambula mulambu, nu udi khuta mutala yago idi nu muthu. ¹³ Ishigo guene egi, mungine mu mikudi mukunda nu athu ako. Teleshienu. ¹⁴ Hanyinyi mudi nu ima yavula, ngenyi muajiya gukuatesa athu ako. Gula ndo, ha mudi enue mu lamba, ene nji hadi ene nu ima yavula, ajiya gumikuatesa. Ngenyi muatelesa. ¹⁵ Gifua idi ya gusonega egi: yago wana heta yavula, gakhalelego yagubalegela, nu yago wana heta yazonda gashigo mufua nu inzala. ¹⁶ Nzambi atumbuishiwe, muene watshitshile egi Tite akhale nu gusuanguluga mukunda nu enue gifua esue. ¹⁷ Watshigina gulomba guetu, nu watshigina nuene hakhenji nu makhaso ha guza gudi enue? ¹⁸ Hangoshi nu muene tudi mutuma munetu yago udi mutumbuga mukunda nu mudimo wenji wa gulongesa lukuma luabonga. ¹⁹ Muene watombewe gudi enya Eklezia haguya gututuala mu njila ituayile nu gutshita mudimo wa gudizalumuna mukunda nu lukuma lua Fumu nu gujijiga giheho gietu gia gukuatesa athu ako. ²⁰ Tudi mutuna gufetewa gudi athu, mu luholo tudi muzangula falanga jiavula. ²¹ Tudi mutshigina gutshita ndaga jiabonga gu meso a Fumu nu gutuama dia’athu. ²² Tudi mutuma munetu gudi enue, tuamukhikha mahugo avula nu muene wajijiga manyinyi. Luenyelu udi luko nu manyinyi avula mukunda nu mutshima ugadi muhaga gudi esue. ²³ Ha ndaga ya Tite, udi yago ngana wenda nenji nu gutshita ne’nji mudimo mukunda nu enue. Mukunda nu anetu ako, adi muza ne’nji, adi atumiwi a Eklezia nu adi mutshita mudimo mukunda nu lukuma lua kilisto. ²⁴ Adijigienu egi mu’azumba diago, hagula egi Eklezia ajiye egi tuabinga ha gumisuangulugila.