¹ Anetu aguzumba, mukunda malaji ene adi etu, tukatulenu majilo agu muila nu gu givule gietu, ha guhata usantu mu gulenga Nzambi. ² Tuhetesenu fundo mu mitshima yenu, tuatshitshilego gubola gudi muthu nda. ³ Ngushigo muzuela ngenyi mukunda nu gumishiya milonga, ndaga ya mudi nu difundo mu mitshima yetu, mukunda nu monyo nga gufua. ⁴ Ngudi gudihala mukunda nu enue, nu gusuanguluga guami gudi guavula, nga mu gubua. ⁵ Ha tuahetshi gu Masedonia, khenji yuheta gale guhuima ndo. Tundaga tuavula, nu gula gudivua ndo guavula, woma nji mukatshi. ⁶ Uvi Nzambi yago wana hana malundu gudi athu ashigo nu ngolo, watuhua malundu mu guza gua Tite. ⁷ Ngushigo musuanguluga khuta mukunda nu guza guenji, uvi nji mukunda mudi gumulunda, nu luhulo atuwambela guzumba guenu, lamba dienu nu gukenena guenu gua mitshima mukunda nu ame. ⁸ Ngatshima mukanda ungamisonegene wamihuile gikenene, ngushigo gu umuenena lamba luenyelu ndo. Ngakenene mutshima ha ngamuenene egi mukanda wene wamihuile gikenene. ⁹ Uvi luenyelu ngudi nu gusuanguluga. Ishigo mukunda nga mihanyi gikenene ndo, uvi mukunda gikenene giamikuatesa ha gubalumuna makalagelo enu. Gikenene guenu gudi muza gudi Nzambi, ngenyi mushigo nu imuatotesa. ¹⁰ Ndaga ya gikenene gudi muza gudi Nzambi gidi mubata gubalumuna gua mutshima nu guhuluga, uvi gikenene gia ha mavu gidi mubata gufua. ¹¹ Muamona luholo gikenene gia Nzambi gia buta gudibela mukatshi dienu ? musonyi, woma nu gukamba egi ungambi ukhale guene mu ndaga jiagasue, muajijiya egi mushigo enya milonga. ¹² Ngatshima ngasonega mukanda ununu, ishigo mukunda nu muthu watshitshi gubola nga mukunda nu muthu watshitshiwa gubola, uvi hagula egi mujiye gutuama dia Nzambi luholo’ tshi mudi gudihana gudi esue. ¹³ Idi mukunda nu ngenyi tudi mukolesewa. Nu nji tudi nu gusuanguluga luko mukunda nu Tite yago waheta givule gihe-gihe gudi enue. ¹⁴ Ndaga ya gula ngamitumbula mu gubonga gudi muene, ngakhalelego nu musonyi. Idi mu luholo tuana gumuwambela giamatshidia mu ndaga jiagasue, tuazuelele nji giamatshidia gudi Tite mukunda nu enue. ¹⁵ Nu, guzumba guenji mukunda nu enue, gudi luko guakola hadi mutangiza muene gutumaga guenu nu guyamba gu muamuyambele nu woma nu gudigita. ¹⁶ Ngudi nu gusuanguluga ndaga ya ngajiya gumihagela mutshima mu kumbi diagasue.