¹ Mukunda tudi mutshita nenu mudimi hamoshi, tudi mukombelela egi guzelz-muila gu muazangula gudi Nzambi gukhadigo gua gituhu. ² Ndaga ya Nzambi udi muzuela egi, ngabalumuna meso gudi aye mukumbi diabonga, nu mu lusugu lua guhuluga ngajile gu gukuatesa. Tala kumbi diabonga, mangino lusugu lua guhuluga. ³ Tushigo mutshigina gukhala seso jia gikhakhushilo, gula ndo mudimo wetu mba ushiwa giphapha. ⁴ Uvi ndaga jiagasue tuajijiga egi tudi enya mudimo wa Nzambi, tudi mukolesela mu malamba nu guhuiminyina gua mutshima. ⁵ Tua wasewa nu tua mbiwa mu bologo, tua tshitshishiwa midimo yakola, atu tunyisa gubanda tulo nu ima ya gudia, ⁶ Uvi esue tudi mumuenegesa egi tudi enya mudimo wa Nzambi mu guhuiminyina nu gubonga gua mutshima mu givule giabonga, mu guzumba, ⁷ Mu mbimbi jia giamatshidia, mu ngolo jia Nzambi udi nu mata a giamatshidia ha mago ayadi. ⁸ Tudi mutshita mudimo nu ginemua nu mu gulelula, mukatshi dia gubanjiginyiwa jindaga nga mu lukuma, adi gututa mambo uvi esue tudi mulongesa giamatshidia. ⁹ Tudi mutshita mudimo gifua athu adi ashigo mujiyiwa uvi tudi mujiyiwa muabonga, gifua athu agufua uvi tudi nu monyo, gifua enya ndola mukunda nu makalagelo etu uvi tushigo mutumiwa gu gufua. ¹⁰ Tudi mutshita gifua athu adi nu gikenene uvi tudi nu gusuanguluga, gifua tudi phutu uvi tudi mubuisa athu avula amonyi nga mvuandu, hako gifua tushigo nu gima uvi tudi nu ima yagasue. ¹¹ An’et enya kolinto, tua miwambela giamatshidia giagasue nu tua tugudila mitshima yetu. ¹² Tua mikangelelego mitshima yetu uvi enue mua tukangelele mitshima yenu. ¹³ Ngudi muzuela gifua gudi ana azonda egi khadienu nu guzumba gifua gu tudi nago mukunda nu enue. Tukangudilenu mitshima yenu. ¹⁴ Mudibungisago nu athu ashigo enya gutshigina. Ndaga yadiago ya jiyilego gudibungisa nu ndaga ya mambo, nga muanya wajiyilego gudibungisa nu phipha, ¹⁵ nga Kilisto gudivua nu diabulu nga luko muenya gutshigina nu yago udi gashigo muenya gutshigina. ¹⁶ Luholo tshi inzo ya Nzambi yajiya gudivua nu ikhokho ya’aphaganyi ? ndaga ya tudi jinza jia Nzambi ya monyo gifua mudi muzuela muene hakhenji egi : mba ngukhala mukatshi diawo nu mba nguwenda hakatshi diawo. Mba ngukhala Nzambi yawo nu ene mba’akhala athu ami ? ¹⁷ Hene Fumu gazuela egi : zogienu mukatshi diawo nu sudigenu usantu. Mukuatshigo ima idi yabola, ngenyi, mba ngudi gumiyamba. ¹⁸ Mba ngukhala shenu nu mba mukhala ana’ami.