¹ Tudi mujiya egi gula jinzo jietu jia ha mavu jia buishiwa, mba tukhala mu jinzo jia Nzambi. Jinzo jiene, jia tungiwego mu mago a’athu, uvi jinzo jia ivo nu ivo gosa. ² Mu tenta didi, tudi mudila nu gunenga ha gudigishiwa inzo ya gosa. ³ Ndaga ya tudi ya gusudigishiwa, mba tushigo musangewa thowa. ⁴ Diago kumbi tudi mu tenta, tudi mudila nu ginemo. Ishigo egi mukunda adi gutuvulula milele, uvi mukunda adi gutusudiga hagula egi yagi idi ya gufua ikhale yaguminyiwa gudi yago idi ya monyo. ⁵ Yago udi mulonda ndaga jiji jiagasue udi Nzambi. Udi gutuhua givule gifua laji dia ndaga jidi muza. ⁶ Salenu nu gujiya egi ha tudi nu monyo mu uthu, tudi haleha nu Fumu. ⁷ Ndaga ya tudi muwenda mu gutshigina uvi mu gumona ndo. ⁸ Tuakhadi nayo gukhala gualeha nu muila, ha gukhala nu monyo nu Fumu. ⁹ Ngenyi tua ibuisa ndaga ya gishina, tuajiya gukhala mu muila wene nga gukhala guma guko ha gu usuanguluisa. ¹⁰ Ndaga ya, mba tudi muzoga khungi ‘agasue gu tuama dia nzuji yetu Yesu-Kilisto, guene gunu, muthu nu muthu mba uheta inyi ya londewe mukunda nu muene, mu jindaga jia tshitshile muene mu muila wenji mukunda nu gubonga nga gubola. ¹¹ Esue mujiya gulenga Nzambi nga gumuvua woma, hene tudi mukamba gutshiginyisa athu agasue. Nzambi udi gutujiya diago nu ngudi mutangiza egi enue nji mudi gutujiya. ¹² Tushigo gudilombela esue hakhetu gudi enue, uvi tuatshigina gumihua kumbi dia gudihala mukunda nu esue. Ngenyi muajiya guvutula gudi ago adi gudishimana gonze uvi moshia mutshima ndo. ¹³ Ndaga ya gula tudi tuaheya idi mukunda nu Nzambi nu gula tudi tuatema, idi mukunda nu guzumba guenu. ¹⁴ Mukunda guzumba gua kilisto gudi gutubanjiginya nu tudi gudihala egi muthu mumoshi wafile mukunda nu athu agasue, ngenyi athu agasue adi nu dishinda gu gufua guenji ? ¹⁵ Wafile mukunda nu athu agasue, hagula egi, anyi adi nu monyo, akhadigo nu monyo mukunda nu ene hakhawo uvi akhale nu monyo mukunda nu yago wafile nu wavutuga nu monyo mukunda nu ene. ¹⁶ Mukunda nu ngenyi, tushigo musamba muthu mu mikhuala ya uthu, ngatshima tuatalele kilisto ngenyi mu masugu agudiangela. ¹⁷ Gula muthu udi mu kilisto, udi muthu muhe-muhe, ima ikulu ya balegele gale. Tala yabuile gale ima ihe-ihe. ¹⁸ Yagasue inyinyi idi muza gudi Nzambi, yago udi gutubungisa nu muene mu kilisto nu wahanene mudimo wa gubungisa. ¹⁹ Nzambi wakhalele mukatshi dia kilisto, wabungisa mavu nu muene hakhenji nu gutala ndo gubola guawo nu wambile mukatshi dietu lumene lua gudibungisa. ²⁰ Ngenyi tudi gifua kongo dia kilisto, hako gifua gutamega gua Nzambi gudi mubalega gudi esue. Tudi gumibubila mukunda nu guzumba gue kilisto. Khadienu ya gudibungisa nu Nzambi. ²¹ Watshitshile egi kilisto akhale mulambu mukunda nu gubola guetu, uvi muene’ gajiyilego gutshita gubola, wabuile muthu wabola mukunda nu esue hagula egi esue tubue athu abonga gu meso a Nzambi.