¹ Ngenyi , mukunda tua zangula mudimo wene nu tua heta khenda jia Nzambi, tushigo nayo guhola muila ndo. ² Tua tunyi njila jia musonyi nu jia mafumbe. Tushigo musala mu luholo luabola nu tushigo muvumbiga mbimbi ya Nzambi. ³ Gula lukuma luabonga ludi lua gutshuiga mulele, idi khuta mukunda nu ago adi muya gu gufua. ⁴ Mu ngenyi nzambi ya ha mavu watshuigile ivule y’athu adi ashigo nu gutshigina. Ashigo atagana ha gumona mueji wa lukuma luabonga, lutumbu lua kilisto luago ludi gifuanesa gia Nzambi. ⁵ Tushigo mulongesa ndaga jietu, uvi ndaga jia Yesu-kilisto gifua Fumu nu esue hakhetu gifua enya mudimo wenu mukunda nu guzumba gua Yesu. ⁶ Ndaga ya Nzambi hakhenji wazuelele egi: Mueji mba ulema mu phipha. Nu mba ulema mu mitshima yetu ha guhana tshuiya mu ujiyilo wa lutumbu lua Nzambi gutuama dia Yesu-Kilisto. ⁷ Uvi tudi nu umonyi wabonga mukatshi dia nzungu jia mavu ha gumonegesa diago egi ngolo jidi jia Nzambi uvi jishigo jietu ndo. ⁸ Tudi mu lamba uva tushigo ya gubua nu gusuga ndo, tushigo ya gutotesa guhaga gua mutshima. ⁹ Tudi ya gusagesewa uvi tua bembewego, tudi ya guwasesa unu ha mukhuala uvi tushigo ya guzangelewa ndo. ¹⁰ Tudi mubata gu mila yetu gufua gua Yesu, hagula egi monyo wa Yesu umuenege gu mila yetu. ¹¹ Esue tudi nu monyo, tudi ya guhanewa gu gufua mukunda nu guzumba gu tua Zumba Yesu hagula egi monyo wa Yesu uzoge gu mila yetu ya uthu. ¹² Hene, gufua gudi mu mudimo wenji gudi esue uvi monyo udi mu mudimo wenji gudi enue. ¹³ Uvi tudi nu givule gimoshi gia gutshigina mu luholo idi ya gusonegewa egi: Ngatshigina nu Ngenyi ngudi muzuela. Na tudi mutshigina nji nu tudi muzuela. ¹⁴ Tudi mujiya egi yago wazugishile Fumu Yesu gu gufua, mba utuzugisa nji nu muene, nu mba utubata gutuama dienji. ¹⁵ Yagasue idi mukunda nu guzumba guenu, hagula egi mukunda guzela muila gua muanganene holu dia’athu avula, guhana hamba dia hana gudi muvula mu lukuma luaNzambi. ¹⁶ Ngenyi, tuajiyilego guhola mila. Ngatshima uthu wetu wa gonze wamuangewa uvi mukatshi tudi mutungiwa luko ha lusugu. ¹⁷ Mu kumbi dimoshi galamba gazonda gaga gadi gutulonda ha gubata ginemo gia lutumbu lua gubalega gukoma. ¹⁸ Tushigo mutala gu ima idi mumuenega, uvi tudi mitala yago idi ishigo mumuenega. Idi mumuenega idi ya kumbi diazonda. Ishigo mumuenega idi musala ivo midimbila khusu.